AMEA Tarix İnstitutunun direktoru Yaqub Mahmudov Kiyevdə ukraynalı həmkarları ilə görüşmüşdür

MDB-nin iştirakçısı olan dövlətlərin elm və yaradıcı ziyalılarının Kiyevdə keçirilən VI forumunun işində iştirak etmiş Azərbaycan Milli Məclisinin deputatı, Milli Elmlər Akademiyasının müxbir üzvü, AMEA-nın A.Bakıxanov adına Tarix İnstitutunun direktoru Yaqub Mahmudov Heydər Əliyev adına Ukrayna-Azərbaycan Sosial Elmlər İnstitutunda olmuşdur.

Y.Mahmudov və "Təhsil" nəşriyyatının direktoru Bəhruz Axundov institutun binası qarşısında ulu öndər Heydər Əliyevin büstü önünə tər çiçəklər düzmüşlər.

Sonra institutun direktoru, professor İvan Bidzyura ilə görüş olmuşdur.

Yaqub Mahmudov, həmçinin Ukrayna Milli Elmlər Akademiyasına getmiş, kiyevli həmkarları ilə görüşlər keçirmişdir.

Görkəmli alim ölkəmizin Ukraynadakı səfirliyində olmuş və səfir Eynulla Mədətli ilə görüşmüşdür.

Oktyabrın 19-da Yaqub Mahmudov "Azərbaycan Respublikasının və Ukraynanın müstəqilliyinin bərpa edilməsinin 20 illiyi: diplomatik münasibətlərin yaradılmasından strateji ortaqlığadək" mövzusunda Azərbaycanın Ukraynadakı səfirliyi və Taras Şevçenko adına Kiyev Milli Universitetinin Beynəlxalq Münasibətlər İnstitutu tərəfindən təşkil olunmuş "dəyirmi masa" iclasında iştirak etmişdir.

Tədbir çərçivəsində, həmçinin Yaqub Mahmudovun Ukrayna dilində "Azərbaycan: tarixi oçerklər" kitabının təqdimatı olmuşdur.

Zeynal AĞAZADƏ,

AzərTAc-ın xüsusi müxbiri

Kiyev

Azərbaycan.- 2011.-23 oktyabr.- S. 3.