Leninqrad vilayətinin vitse-qubernatoru: Azərbaycan icması həm iqtisadiyyatda, həm siyasətdə, həm də mədəniyyətdə mühüm mövqe tutur

Azərbaycan icması hazırda Leninqrad vilayətində həm iqtisadiyyatda, həm siyasətdə, həm də mədəniyyətdə mühüm mövqe tutur. Biz ona çox böyük hörmətlə yanaşırıq. Bu fikri Leninqrad vilayətinin vitse-qubernatoru Aleksandr Kuznetsov Azərbaycanın Rusiyadakı səfiri Polad Bülbüloğlunun, ölkəmizin Sankt-Peterburqdakı baş konsulu Qüdsi Osmanovun və "Yedinaya Rossiya" partiyasının seçki qərargahının rəhbəri, regional siyasi şurasının katibi Aleksandr Xudilaynenin iştirakı ilə keçirilən görüşün yekunlarına əsasən KİV-lər üçün brifinqdə səsləndirmişdir.

Vitse-qubernator Azərbaycan rəhbərliyi, səfirliyi və konsulluğu ilə birlikdə keçirilmiş son tədbiri - Sovet Ordusuna Azərbaycandan çağırılmış, Leninqradı müdafiə etmiş və mühasirədən çıxarılmasında böyük rol oynamış şəxslərə ucaldılan abidənin Heydər Əliyev Fondunun vitse-prezidenti Leyla Əliyevanın iştirakı ilə açılış mərasimini misal gətirərək demişdir: "Bu tədbir layiqincə və çox gözəl keçdi. Burada Kirov rayonunun bir çox sakinləri iştirak etdilər. Yəqin ki, millətlərarası münasibətlərin əsası da məhz bunda - dədə-babalarımızın etdiklərini unutmamağımızdadır. Bu xatirə gələcəyə cəsarətlə baxmağımıza kömək edir".

Onun sözlərinə görə, leninqradlılar təkcə şəhərin kimlər tərəfindən qorunduğunu, mühasirənin kimlər tərəfindən yarıldığını deyil, həm də buradan, mühasirə şəraitindən çıxarılan ailələrinin, baba və nənələrinin kimlər tərəfindən qəbul edildiyini də unutmurlar. Qonaqpərvər Azərbaycan xalqı onlara yardım göstərmişdir. Salamat qalanlar yaşamağa davam etmək və vətəni dirçəltmək üçün geri qayıtmışlar. Vitse-qubernator demişdir: "Bunun üçün sizə çox sağ olun deyirik və qarşınızda baş əyirik".

Vitse-qubernator vurğulamışdır ki, Azərbaycan diasporunun siyasətdə özünü təsdiq etmək üçün böyük potensialı vardır. O demişdir: "Görüşdə Azərbaycan diasporunun deputat nişanı gəzdirən bir çox təmsilçiləri iştirak edirdilər. Bu isə o deməkdir ki, insanlar onları seçmişlər və onlar da insanların maraqlarını layiqincə təmsil edirlər. Nevskaya Dubrovka bələdiyyəsinin başçısı Sayad Əliyev Qanunverici Məclisə namizəddir. Mən əcdadlarımızın xatirəsinə göstərdiyi münasibətə görə ona minnətdarlığımı bildirdim. İyunun 22-də biz Nevski Pyataçokda həlak olanların xatirəsinə ucaldılan abidəni açdıq. Mərasimdə Nevski Dubrovka sakinləri də iştirak edirdilər. Belə bir başçı olmasaydı, yəqin ki, bu tədbiri keçirmək mümkün olmazdı. Başçının belə münasibəti göstərir ki, o, artıq təcrübəli siyasətçidir. Başa düşür ki, bu yolla, həmçinin Rusiya və Azərbaycan münasibətlərini qurur. Ona təkcə başçı kimi deyil, həm də Azərbaycan icmasının nümayəndəsi kimi baxırlar. Bu, siyasətdə yer tutub icmanı təmsil edənlər üçün örnək olmalıdır. İqtisadiyyatda, siyasətdə və mədəniyyət sahəsində belə ləyaqətli insanlar olduqca çoxdur. Bu gün onlar öz icmalarında layiqli yer tutan, vətənini unutmayan, ənənələrinə riayət edən, lakin eyni zamanda yaşadıqları ölkənin layiqli vətəndaşları olan ağıllı, savadlı və nəcib insanlardır".

Asya HACIZADƏ,

AzərTAc-ın xüsusi müxbiri

Sankt-Peterburq

Azərbaycan.- 2011.- 28 oktyabr.- S. 6.