Avropa Şurası ilə Azərbaycan arasında əlaqələr inkişaf edir

Sentyabrın 2-də ölkəmizdə səfərdə olan Avropa Şurası Parlament Assambleyasının (AŞ PA) Hüquq məsələləri və insan hüquqları komitəsinin sədri Kristos Pirqurides jurnalistlərlə brifinq keçirmişdir.

Kristos Pirqurides ölkəmizlə Avropa Şurası arasında əlaqələrin yüksələn xətlə inkişafından məmnunluğunu ifadə etmişdir. O, 5 il əvvəl də Bakıda olduğunu, ötən müddət ərzində Azərbaycanın sürətlə inkişaf etdiyini bildirmişdir.

AŞ PA-nın Hüquq məsələləri və insan hüquqları komitəsinin sədri bildirdi ki, ölkəmizdə insan hüquq və azadlıqlarının qorunması istiqamətində önəmli işlər görülmüşdür. Ölkədə həyata keçirilən islahatlar onu deməyə əsas verir ki, Azərbaycan demokratik dövlətdir.

Brifinqdə Kristos Pirqurides Ermənistan-Azərbaycan, Dağlıq Qarabağ münaqişəsindən söz açaraq demişdir ki, Ermənistanın Azərbaycan torpaqlarını işğal etməsi Avropa dəyərlərinə və beynəlxalq hüququn norma və prinsiplərinə ziddir. Hesab edirəm ki, işğal altında olan ərazilər Azərbaycana qaytarılmalıdır. Ermənistan işğalçılıq mövqeyinə son qoymalıdır ki, bölgədə sülh və əmin-amanlıq təmin edilsin.

Azərbaycan.- 2011.- 3 sentyabr.- S. 2.