Azərbaycan ilə Avropa İttifaqı arasında vahid aviasiya məkanı yaradılması planlaşdırılır

Avropa Komissiyası tərəfindən yayılmış bəyanatda deyilir: "Avropa Komissiyası Azərbaycan ilə Avropa İttifaqı (Aİ) arasında vahid aviasiya məkanı barədə razılaşmaya nail olmaq niyyətindədir".

AzərTAc xəbər verir ki, həmin sazişdə tərəflər arasında hava məkanının mərhələlər üzrə açılması və Aİ-nin bu sahədə qanunvericiliyinin Azərbaycanda tətbiq edilməsi nəzərdə tutulur.

Avropa Komissiyasının bəyanatında deyilir: "Azərbaycanın mühüm strateji məkanda - Avropa ilə Asiyanın qovuşduğu ərazidə yerləşməsi bu ölkəni Aİ ilə vahid aviasiya məkanı yaradılmasına dair sazişin imzalanması üçün real namizədə çevirir. Azərbaycan hökuməti 2011-ci ilin yanvarında vahid aviasiya məkanı barədə Aİ ilə saziş hazırlanmasına dair danışıqlara hazır olduğunu bildirmişdir. Avropanın bəzi aviasiya şirkətləri Bakı istiqamətində yeni reyslər açmağa hazır olduqlarını bildirmişlər".

Azərbaycan.- 2011.- 7 sentyabr.- S. 4.