Yeni miniatür kitab çapdan çıxmışdır

Respublika "Kitab" Cəmiyyətinin xəttilə son illərdə müxtəlif çeşidli və məzmunlu miniatür kitabların çap edilməsi artıq ənənə halını almışdır. Ədəbiyyat, mədəniyyət, incəsənət, elm, təhsil, idman, xarici siyasət, diaspor quruculuğu və digər sahələrdəki nailiyyətlərimizi əks etdirən bu unikal nəşrlər kitabsevərlərin böyük marağına səbəb olur.

Bu günlərdə "Kitab" Cəmiyyətinin təşəbbüsü ilə görkəmli iqtisadçı alim, akademik Əhməd Mahmudovun zəngin ömür yoluna və elmi fəaliyyətinə həsr edilmiş yeni miniatür kitab işıq üzü görmüşdür. "İNDİQO" nəşriyyatında buraxılmış 40x45 mm formatlı "Əhməd Mahmudov - iqtisad elminin korifeyi" adlı miniatür nəşr supercildi və nəfis poliqrafik tərtibatı ilə ilk baxışdan diqqəti cəlb edir. 168 səhifəlik minikitabda elm xadiminin həyatının ən əlamətdar hadisələri əks olunmuşdur. Burada güclü zəkası, möhkəm iradəsi, həssaslığı, mənəvi dünyası ilə seçilən böyük alimin apardığı araşdırmalardan, tədqiqatlardan, iqtisad elminə gətirdiyi yeniliklərdən söhbət açılır, elm təşkilatçısı kimi AMEA-nın İqtisadiyyat İnstitutunun təşəkkülündə və inkişafında xidmətləri xüsusi vurğulanır. Əsərdə akademikin həyatının Moskva dövrü geniş işıqlandırılır, dünyanın məşhur iqtisadçı alimləri ilə birgə apardığı elmi tədqiqatlar, qələmə aldığı kitablar, təltifləri, mükafatları barədə çoxsaylı faktlar əsasında əhatəli məlumat verilir. Ötən əsrin 60-cı illərinin ortalarında SSRİ Ali Attestasiya Komissiyasının qərarı ilə Azərbaycan EA-da yaradılmış doktorluq dissertasiyası üzrə ixtisaslaşdırılmış şuraya başçılıq edən akademik Əhməd Mahmudovun respublikada iqtisadçı alimlərin yetişməsində müstəsna xidmətləri qeyd olunur.

Miniatür kitabda elm xadiminin ziyalılığı, yüksək insani keyfiyyətləri, xarakterini səciyyələndirən xüsusiyyətlər müxtəlif epizodlarla açılıb göstərilir. Əhməd Mahmudovun 1941-1945-ci illər müharibəsində keçdiyi döyüş yolu ilə bağlı məqamlar isə oxucularda xüsusi maraq doğurur.

100 nüsxə tirajla çap olunmuş kitabda 45 ədəd rəngli fotoşəkil yerləşdirilmişdir.

Azərbaycan.-2011.-9 sentyabr.-S.8.