Korrupsiyaya qarşı mübarizə sahəsində

kompleks tədbirlər davam etdirilir

Mütəşəkkil cinayətkarlığın təhlükəli təzahürlərindən olan korrupsiyaya qarşı mübarizə, vəzifəli şəxslərin səlahiyyətlərindən sui-istifadə hallarının qarşısının alınması dövlətimizin diqqət mərkəzindədir və bu sahədə prokurorluq orqanları tərəfindən ardıcıl, sistemli tədbirlər davam etdirilir.

Cari ilin yanvar-sentyabr ayları ərzində Azərbaycan Respublikasının Baş prokuroru yanında Korrupsiyaya qarşı mübarizə idarəsi tərəfindən korrupsiya hüquqpozmaları ilə əlaqədar 133 cinayət işi başlanılmış, 147 şəxs barəsində 88 cinayət işi tamamlanaraq baxılması üçün müxtəlif məhkəmələrə göndərilmişdir.

Baş prokurorluğun mətbuat xidmətindən AzərTAc-a bildirmişlər ki, bu cinayətlər əsasən rüşvət alma (passiv rüşvətxorluq), vəzifəli şəxsin qərarına qanunsuz təsir göstərmə (nüfuz alveri), vəzifə səlahiyyətlərindən sui-istifadə etmə, vəzifə səlahiyyətlərini aşma, vəzifə saxtakarlığı, talama, dələduzluq, cinayət yolu ilə əldə edilmiş pul vəsaitlərini leqallaşdırma və sair faktlarla əlaqədar olmuşdur.

Belə ki, Dövlət Sosial Müdafiə Fondundan prokurorluğa daxil olmuş, qurumun Suraxanı şöbəsinin maliyyə-uçot sektorunun işçiləri tərəfindən pensiyaların ödənişi və uçotu sahəsində saxtakarlıq edilməklə külli miqdarda dövlət əmlakının mənimsənilməsi barədə material üzrə Azərbaycan Respublikasının Baş prokuroru yanında Korrupsiyaya qarşı mübarizə idarəsi tərəfindən araşdırma aparılaraq cinayət işi başlanılmışdır.

İstintaqla müəyyən edilmişdir ki, Səfər Hüseynov Dövlət Sosial Müdafiə Fondunun Suraxanı rayon şöbəsinin müdiri vəzifəsini icra edərkən pensiyaların qanunvericiliyə uyğun olaraq ödənişini təmin etməli olduğu halda, qulluq səlahiyyətlərindən qulluq mənafeyinə qəsdən zidd olaraq istifadə etməklə şöbənin baş məsləhətçisi T.Kərimova, maliyyə- uçot sektorunun müdiri K.Muradov, məsləhətçi-mühasib K.Hüseynova və qeyriləri ilə, yəni qabaqcadan əlbir olan bir qrup şəxslə 2008-2010-cu illərdə əvvəllər ailə başçısını itirməyə, əlilliyə və yaşa görə pensiya almış ayrı-ayrı şəxslərin pensiya alma müddətlərinin bitməsinə baxmayaraq, onların hesablarına tamah niyyəti ilə bilə-bilə yalan məlumatlar daxil etməklə, cəmi 995.642 (doqquz yüz doxsan beş min altı yüz qırx iki) manat məbləğində pul vəsaitini köçürərək, vətəndaşların bilavasitə özlərindən və onların adından guya itirilmiş kart kimi sifariş verərək əldə etdiyi yeni plastik kartlarla həmin pul vəsaitlərini götürüb şəxsi ehtiyaclarına sərf etməklə ona etibar edilmiş külli miqdarda özgə əmlakını talamışdır.

Bundan başqa, istintaqla müəyyən edilmişdir ki, Akif Sərkarov DSMF-nin Suraxanı rayon şöbəsinin maliyyə-uçot sektorunun aparıcı məsləhətçi-mühasibi vəzifəsində işləyərkən qulluq mövqeyindən istifadə edərək 2009-2010-cu illərdə iki şəxsin adına köçürülmüş xeyli miqdarda, yəni 5338 manat məbləğində özgə əmlakını talamış, öz xidməti vəzifələrini lazımi qaydada yerinə yetirməyərək vəfat etmiş pensiyaçıların adlarına 8758 manat məbləğində artıq ödənişlər edilməsi ilə dövlətin qanunla qorunan mənafeyinə mühüm zərər vurmuşdur.

Törətdiyi cinayət əməllərinə görə Səfər Hüseynov qulluq mövqeyindən sui-istifadə etməklə külli miqdarda özgə əmlakını talama, vəzifə səlahiyyətlərindən sui-istifadə etmə və vəzifə saxtakarlığına görə cinayət məsuliyyəti nəzərdə tutan Azərbaycan Respublikası Cinayət Məcəlləsinin 179.3.2-ci, 308.1-ci və 313-cü maddələri ilə təqsirləndirilən şəxs qismində cəlb edilmiş və barəsində məhkəmənin qərarı ilə həbs qətimkan tədbiri seçilmişdir.

Bundan əlavə, həmin şöbənin maliyyə-uçot sektorunun müdiri -baş mühasibi Kərim Muradov və qeyriləri cəmi 12 şəxs törətdikləri əməllərə görə Cinayət Məcəlləsinin 179.2.3-cü, 179.2.4-cü (qulluq mövqeyindən istifadə etməklə özgə əmlakını xeyli miqdarda ziyan vurmaqla talama), 313-cü (vəzifə saxtakarlığı) və 314.1-ci (səhlənkarlıq) maddələri ilə təqsirləndirilən şəxs qismində cəlb edilərək onlara həmin maddələrdə nəzərdə tutulan ittiham elan edilmiş və cinayət işinin istintaqı tamamlanaraq baxılması üçün Bakı Ağır Cinayətlər Məhkəməsinə göndərilmişdir.

Vurulmuş zərərdən ibtidai istintaq zamanı 320 min manat vəsaitin dövlətə ödənilməsi təmin edilmişdir.

"Qobu" dəvəçilik üzrə dövlət kənd təsərrüfatı istehsalı müəssisəsi Məhdud Məsuliyyətli Cəmiyyətinin sabiq sədri Balağa Səmədovun barəsində başlanmış cinayət işinin istintaqı zamanı müəyyən edilmişdir ki, o, qeyd olunan müəssisənin rəhbəri vəzifəsində işləyərkən öz qulluq mövqeyindən istifadə etməklə külli miqdar təşkil edən 14370 manat dəyərində 353 baş ona etibar edilmiş xırdabuynuzlu heyvanları mənimsəmə və israf etmə yolu ilə talamış, qeyrilərinin cinayət əməlləri nəticəsində cəmiyyətə vurulmuş 60 baş dəvə və 47 baş xırdabuynuzlu heyvanların dəyəri olan, ümumilikdə 31 min 25 manat məbləğində maddi ziyanın ödənilməsi imkanını aradan qaldırmaqla cəmiyyətin qanunla qorunan mənafelərinə ağır nəticələrə səbəb olan zərər vurmaqla vəzifə səlahiyyətlərindən sui-istifadə etmiş, tamah və sair şəxsi niyyətlə rəsmi sənədlərə bilə-bilə yalan məlumatları daxil edərək vəzifə saxtakarlığı etmişdir.

Bundan başqa, B.Səmədov xidməti vəzifəsinə laqeyd münasibəti nəticəsində tabeçiliyində olan şəxslərin öhdəsində olan 8759 manat dəyərində 5 baş dəvənin və 163 baş xırdabuynuzlu heyvanların çatışmazlığını vaxtında aşkara çıxarmamaqla cəmiyyətin qanunla qorunan mənafelərinə ağır nəticələrə səbəb olan zərər vurmaqla səhlənkarlıq etmişdir.

Törətdiyi cinayət əməllərinə görə Balağa Səmədov qulluq mövqeyindən sui-istifadə etməklə külli miqdarda özgə əmlakını talama, ağır nəticələrə səbəb olan vəzifə səlahiyyətlərindən sui-istifadə etmə, vəzifə saxtakarlığı, səhlənkarlığa görə cinayət məsuliyyəti nəzərdə tutan Cinayət Məcəlləsinin 179.3.2-ci, 308.2-ci, 313-cü və 314.2-ci maddələri ilə təqsirləndirilən şəxs qismində cəlb edilərək məhkəmənin qərarı ilə barəsində həbs qətimkan tədbiri seçilmiş və cinayət işi üzrə ibtidai istintaq tamamlanaraq baxılması üçün Bakı Ağır Cinayətlər Məhkəməsinə göndərilmişdir.

Vətəndaş Üzeyir Cəfərov və Balakişi Cəbrayılovun müraciəti üzrə başlanmış cinayət işinin istintaqı zamanı müəyyən edilmişdir ki, Aydın Tarverdiyev Salyan rayonu Xıdırlı bələdiyyəsinin sədri vəzifəsində işləyərkən bələdiyyənin ərazisindən 9 ha torpaq sahəsi almaq üçün ona müraciət edən Yusif Cəfərovdan qanunsuz hərəkətlərə, yəni torpaq hərracı və müsabiqəsi keçirmədən, bələdiyyə üzvlərinin xəbəri olmadan sənədləri saxtalaşdırmaqla 9 ha torpaq sahəsinin Y.Cəfərovun arvadı Cəfərova Leyla Ramiz qızının adına rəsmiləşdirməsinə görə 72000 (yetmiş iki min) manat pul tələb edərək, hissə-hissə 71000 (yetmiş bir min) manat rüşvət almış, bilə-bilə yalan məlumatlar daxil etdiyi saxta sənədləri Yusif Cəfərova təqdim edərək torpaq sahəsinin ayrılmasına dair qanunsuz qərar qəbul edib həmin torpağın alqı-satqı yolu ilə vətəndaşın mülkiyyətinə verilməsini təşkil edərək, bələdiyyənin mülkiyyətindən çıxarıb Xıdırlı bələdiyyəsinin qanunla qorunan mənafelərinə ağır nəticələrə səbəb olmaqla zərər vurmuş və tamah niyyəti ilə vəzifə saxtakarlığına yol vermişdir.

Bundan əlavə, Aydın Tarverdiyev Xıdırlı bələdiyyəsinin sədri vəzifəsində işləyərkən öz qulluq mövqeyindən istifadə etməklə, 2010-cu ilin iyun ayında Balakişi Cəbrayılovun adına olan Xıdırlı kəndi ərazisindəki kənd təsərrüfatı təyinatlı 1 ha torpaq sahəsinin təyinatının dəyişdirilməsini təşkil edəcəyini sonuncuya vəd etmiş, həyata keçiriləcək sənədləşmənin rüsumu adı ilə 1800 (min səkküz yüz) manat pulu və torpaq sahəsinin Azərbaycan Respublikasının Daşınmaz Əmlakın Dövlət Reyestri Xidmətinin Hüquqlarının Dövlət Qeydiyyatı haqqında Daşınmaz əmlakının dövlət reyestrindən Çıxarışın əslini götürmüş, həmin Çıxarışı qrafik proqram təminatından istifadə etməklə axınlı printerdə çap etdirib Balakişi Cəbrayılova təqdim edərək hüquq verən rəsmi dövlət sənədini qanunsuz hazırlamaqla saxtalaşdırmış və sonuncunun xeyli miqdarda əmlakını aldatma yolu ilə ələ keçirib dələduzluq etmişdir.

Aydın Tarverdiyev Cinayət Məcəlləsinin 178.2.3-cü, 178.2.4-cü (qulluq mövqeyindən istifadə etməklə xeyli miqdarda ziyan vurmaqla dələduzluq), 308.2-ci (ağır nəticələrə səbəb olmaqla vəzifə səlahiyyətlərindən sui-istifadə), 311.3.3-cü (külli miqdarda rüşvət alma), 313-cü (vəzifə saxtakarlığı) və 320.1-ci (rəsmi sənədləri saxtalaşdırma) maddələri ilə ittiham elan edilərək məhkəmənin qərarı ilə barəsində həbs qətimkan tədbiri seçilmiş və cinayət işi tamamlanaraq baxılması üçün Bakı Ağır Cinayətlər Məhkəməsinə göndərilmişdir.

Bu müddət ərzində istintaqı aparılmış və hazırda icraatda olan cinayət işləri, habelə törədilmiş və ya hazırlanan cinayətlər haqqında məlumatlarla bağlı materiallar üzrə fiziki və hüquqi şəxslərin hüquqları bərpa olunaraq onlara vurulmuş 3 milyon 965 min manat ziyanın ödənilməsi təmin edilmiş, zəruri hallarda təqsirləndirilən şəxslərə məxsus əmlak müəyyənləşdirlərək üzərinə həbs qoyulmuşdur. Eyni zamanda, korrupsiya hüquqpozmalarına şərait yaradan halların aradan qaldırılması məqsədilə müvafiq dövlət orqanları və özəl qurumların rəhbərlərinə təqdimatlar göndərilmişdir.

Hazırda Azərbaycan Respublikasının Baş prokuroru yanında Korrupsiyaya qarşı mübarizə idarəsinin istintaq şöbəsi tərəfindən müxtəlif sahələr üzrə korrupsiya hüquqpozmaları ilə əlaqədar 86 cinayət işinin istintaqı davam etdirilir.

Həmin cinayət işlərinin nəticəsinə dair ictimaiyyətə mütəmadi olaraq məlumat veriləcəkdir.

Azərbaycan.-2011.-10 sentyabr.-S.5.