DST-nin Avropa Regional Komitəsinin 61-ci sessiyası çərçivəsində keçirilən brifinqdə miqrasiya məsələlərindən danışılmışdır

Bakıda Dünya Səhiyyə Təşkilatının (DST) Avropa Regional Komitəsinin 61-ci sessiyası çərçivəsində brifinq keçirilmişdir.

AzərTAc xəbər verir ki, brifinqdə DST-nin Avropa Regional Bürosunun strateji proqramlar və xüsusi layihələr üzrə direktoru Aqis Tsouros sessiyada müzakirə olunan məsələlər barədə məlumat vermişdir. Bildirmişdir ki, İslandiyadan Qazaxıstana qədər ərazini əhatə edən Avropada insanların sağlamlığında müxtəliflik mövcuddur. Ona görə də 2020-ci ili də əhatə edəcək sağlamlıq proqramı tələb olundu. Biz bu proqramı iki ildir ki, hazırlayırıq. Sessiyaya təqdim olunan proqram ilkin variant kimi nəzərdə tutulmuşdur.

Sessiyada insan sağlamlığına təsir göstərən sosial amillərin müzakirə edildiyini diqqətə çatdıran A.Tsouros miqrasiya məsələlərindən də danışmışdır. Bildirmişdir ki, miqrantların sağlamlıq hüquqları qorunmalıdır, onlara virus mənbəyi kimi baxmaq olmaz. Bunun üçün hər bir ölkədə qiymətləndirmə mexanizmi olmalıdır. Hər hansı bir miqrant xəstəlik daşıyıcıdırsa, o müalicə edilməlidir ki, başqalarını yoluxdurmasın.

İnsan orqanlarının qeyri-qanuni köçürülməsinə münasibət bildirən qonaq bunun insan hüquqlarına zidd olduğunu bildirmişdir. O demişdir ki, Dünya Səhiyyə Təşkilatı bunu qəti olaraq pisləyir və dünya səhiyyəsində insan orqanlarının köçürülməsi transplantasiyası yalnız qanuni formada həyata keçirilə bilər.

Azərbaycan.-2011.-14 sentyabr.-S.5.