BTC tikilərkən aşkarlanmış arxeoloji tapıntılar haqqında kitab nəşr olunub

bp özünün BTC və ÇQBK layihələrindəki tərəfdaşları ilə birlikdə "Boru kəməri dəhlizində keçmiş və gələcək irs - Azərbaycan, Gürcüstan, Türkiyə" adlı kitabı ictimaiyyətə təqdim edib.

Kitab Heydər Əliyev adına Bakı-Tbilisi-Ceyhan neft və "Şahdəniz" qazını daşıyan Cənubi Qafqaz Boru Kəmərinin Xəzərdən Aralıq dənizinə qədər olan marşrutu boyunca tikinti zamanı aşkar olunmuş arxeoloji tapıntıları əks etdirməklə mədəni irsin qorunmasına dair sanballı bir tədqiqatın nəticələrini özündə birləşdirir.

Azərbaycan Milli Elmlər Akademiyasının Arxeologiya və Etnoqrafiya İnstitutu, Gürcüstanın Milli Muzeyi və Türkiyənin Qazı Universiteti tərəfindən aşkar edilmiş bu qiymətli apxeoloji tapıntılar qorunmaq, tədqiq edilmək və gələcək nəsillərə çatdırılmaq üçün hər üç ölkənin hökumətinə təhvil verilib. BTC və ÇQBK boyunca aşkar olunmuş bütün arxeoloji tapıntılar haqqında dəyərli tədqiqat materiallarını və elmi məlumatları əks etdirən bu kitab həm də dünyanın ən qədim mədəniyyətlərindən birinə sahib olan üç ölkənin - Azərbaycan, Gürcüstan və Türkiyənin tarixi irsi ilə tanışlıq üçün bir mənbədir. Kitab üç dildə - Azərbaycan, gürcü və ingilis dillərində tərtib olunub.

Bu arxeoloji tədqiqatlar və kitab mədəni irsin qorunması yönümündə BTC və ÇQBK boru kəmərləri boyunca həyata keçirilmiş böyük proqramın bir hissəsidir. 2008-ci ildə başlanmış həmin proqramın ictimai təbliğat və bacarıqların yaradılması kimi iki əsas məqsədi vardı və proqram üç əsas tərəf - Qobustan Dövlət Tarixi-Bədii Qoruğu, Azərbaycan Arxeologiya və Etnoqrafiya İnstitutu və Gürcüstan Milli Muzeyi üçün nəzərdə tutulmuşdu.

Təqdimat mərasimindəki çıxışında bp-nin Azərbaycan, Gürcüstan və Türkiyə üzrə regional prezidenti Rəşid Cavanşir demişdir: "bp şirkəti və onun tərəfdaşları həqiqətən fəxr edirlər ki, Xəzərdən Aralıq dənizinə qədər bizim boru kəmərləri boyunca olan ərazilərdə tarixən məskunlaşmış ən qədim sivilizasiyaların mədəni irslərinin tədqiqinə dəyərli töhfə veririk. Bizim bu proqramımız azərbaycanlı, gürcü, türk, britaniyalı və amerikalı arxeoloqları tikinti zamanı boru xətti boyunca səfərbər edərək yüzlərlə illər mövcud olan, amma bizə məlum olmayan və heç vaxt qazıntı işləri aparılmamış sahələri aşkar etmək imkanı yaradıb".

Sözügedən tədqiqatın nəticələri hər üç ölkə üçün çox qiymətli milli-mədəni və tarixi irs tapıntılarıdır. Onların bəziləri hətta regional əhəmiyyət kəsb edir. Odur ki, yeni kitab hər üç xalqın milli-mənəvi irsinin və dəyərlərinin qorunması səylərinə sanballı töhfədir.

Azərbaycan.-2011.-14 sentyabr.-S.8.