Bakıda DST-nin Avropa Regional Komitəsinin 61-ci sessiyası işini davam etdirmişdir

Sentyabrın 14-də "Gülüstan" sarayında Dünya Səhiyyə Təşkilatının (DST) Avropa Regional Komitəsinin 61-ci sessiyası işini davam etdirmişdir.

AzərTAc xəbər ki, sessiyada DST Avropa Regional Bürosunun direktoru xanım Jujanna Yakab həyata keçiriləcək islahatlar barədə məruzə ilə çıxış etmişdir. Bildirmişdir ki, DST-nin regionda əhalinin sağlamlığının qorunmasında fəaliyyətini gücləndirmək və bölgədə liderliyini saxlamaq üçün buna ehtiyac duyulur. DST-nin strukturu və icra mexanizmləri, büdcəsi haqqında sessiya iştirakçılarına məlumat verən regional büronun direktoru bu qurumun fəaliyyət istiqamətlərindən də bəhs etmişdir.

Sonra müxtəlif ölkələrin nümayəndələri məruzə ətrafında müzakirələrə başlamışlar. Müzakirələrdə iştirak edən DST-yə üzv ölkələrin nümayəndələri məruzədən irəli gələn məsələlərə münasibət bildirmişlər. Qeyd edilmişdir ki, dünya əhalisinin sağlamlığına cavabdeh olan bu qurumun yarandığı vaxtdan 60 il ötür. Bu illər ərzində sərhədlər dəyişilmiş, bir çox ölkələr maliyyə böhranı ilə üzləşmişlər. Odur ki, belə islahatların aparılması, DST-nin nizamnaməsinə əlavələr edilməsi zəruridir. Çıxış edənlər DST-nin islahatlar prosesini dəstəklədiklərini bildirmişlər.

Müzakirələr zamanı Azərbaycan Respublikası Səhiyyə Nazirliyinin nümayəndəsi də çıxış edərək DST ilə əlaqələrdən danışmış və islahatların keçirilməsində bu təşkilata kömək göstərəcəklərini diqqətə çatdırmışdır.

Nəticə olaraq DST-nin İcraiyyə Komitəsinin tərkibinə və digər bölmələrə yeni üzvlərin seçilməsi qərara alınmışdır.

Qeyri-yoluxucu xəstəliklər və ziyanlı alkoqol istehlakının azaldılması ilə bağlı Avropa fəaliyyət planları sessiya iştirakçılarına təqdim olunmuşdur.

Sessiyanın bugünkü toplantısı planların diskussiyası ilə işini yekunlaşdırmışdır.

DST-nin Avropa Regional Komitəsinin 61-ci sessiyası sentyabrın 15-də işini davam etdirəcəkdir.

Azərbaycan.-2011.-15 sentyabr.-S.2.