Heydər Əliyev Fondunun təşəbbüsü ilə Gürcüstanda soydaşlarımızın yaşadığı kəndlərdə yeni məktəb binaları istifadəyə verilmişdir

Gürcüstanda yeni dərs ilinin başlandığı gün - sentyabrın 15-də Kvemo Kartli-Borçalı bölgəsinin Bolnisi rayonundakı Həsənxocalı və Cəfərli kəndlərində Heydər Əliyev Fondunun təşəbbüsü ilə yeni məktəb binaları istifadəyə verilmişdir.

Hər iki məktəb kompyuter dəstləri və müvafiq mebellərlə təchiz olunmuşdur. Həsənxocalı kənd məktəbində 100-dək, Cəfərli kəndindəki təhsil ocağında isə 50-dək şagird təhsil alır.

Hər iki məktəbin açılış mərasimində iştirak edən Heydər Əliyev Fondunun əməkdaşı İlqar Mustafayev kollektivləri yeni dərs ilinin başlanması münasibətilə təbrik etmiş, onlara yeni dərs ilində uğurlar diləmişdir. Bildirmişdir ki, Heydər Əliyev Fondu bir neçə ildir Gürcüstanda soydaşlarımızın məskunlaşdığı bölgələrdə müxtəlif tipli layihələr həyata keçirir. Bu layihələrin sırasında məktəblərin müvafiq ləvazimatlar, avadanlıqlar və dərsliklərlə təchizatı, binaların əsaslı təmiri, yeni binaların tikilib istifadəyə verilməsi mühüm yer tutur.

İ.Mustafayev demişdir ki, bu il Fondun təşəbbüsü ilə Gürcüstanın Bolnisi rayonunda inşa edilmiş iki məktəb binası ilə yanaşı, Marneuli və Qardabani rayonlarının hər birində də bir məktəb binası tikilmişdir. Yaxın günlərdə hər iki məktəb binası istifadəyə veriləcəkdir. Fond gələcəkdə də bu ənənəni davam etdirəcəkdir. Çalışacağıq ki, soydaşlarımız yaşayan kəndlərdə qəza vəziyyətində olan bir məktəb binası belə qalmasın.

Mərasim iştirakçıları gürcüstanlı soydaşlara qayğı və diqqətə görə Azərbaycan Respublikasının Prezidenti İlham Əliyevə, həmçinin Heydər Əliyev Fondunun prezidenti Mehriban xanım Əliyevaya dərin minnətdarlıqlarını bildirmişlər. Onlar əsası ümummilli liderimiz Heydər Əliyev tərəfindən qoyulmuş Azərbaycan-Gürcüstan dostluğunun ulu öndər siyasi məktəbinin layiqli yetirməsi, Prezident İlham Əliyev tərəfindən uğurla davam etdirilməsindən böyük məmnunluq duyduqlarını bildirmişlər.

Tədbirdə Azərbaycanın Gürcüstandakı səfirliyinin məsul əməkdaşı Şövqi Mehdizadə, Kvemo Kartli-Borçalı bölgəsi qubernatorunun müavini Hüseyn Yusifov və digər rəsmi şəxslər iştirak etmişlər.

İslam ƏLİYEV,

AzərTAc-ın xüsusi müxbiri

Tbilisi

Azərbaycan.-2011.-16 sentyabr.-S.4.