«Azərbaycan ixrac kataloqu-2011» layihəsinin təqdimatı olmuşdur

Sentyabrın 19-da Azərbaycan Marketinq Cəmiyyətinin Xarici İşlər Nazirliyinin dəstəyi ilə həyata keçirdiyi "Azərbaycan ixrac kataloqu-2011" layihəsinin təqdimatı olmuşdur.

AzərTAc xəbər verir ki, təqdimatda Azərbaycan Marketinq Cəmiyyəti idarə heyətinin sədri Rəhim Hüseynov ölkə iqtisadiyyatının qeyri-neft sektorunun inkişafı üçün ixrac kataloqunun nəşrinin əhəmiyyətindən danışmışdır. Bildirmişdir ki, Azərbaycan Marketinq Cəmiyyəti bu il ölkə şirkətlərinin rəqabətqabiliyyətli məhsul və xidmətlərinin dünya bazarlarına çıxarılması, yeni xarici istehlak bazarları və tərəfdaşların tapılması ilə əlaqədar mövcud problemin həlli məqsədilə sözügedən layihəni həyata keçirmişdir.

Kataloq çap və CD formatında 3 min nüsxə ilə, ingilis dilində hazırlanmışdır. Kataloq xarici ölkələrdəki Azərbaycan diaspor təşkilatlarının, beynəlxalq qurumların ölkəmizdəki nümayəndəliklərinin, ictimai və dövlət təşkilatlarının vasitəsilə yayılacaq, yerli və beynəlxalq sərgi və konfranslarda təqdim olunacaqdır. Kataloqda qeyri-neft sektoru, əsasən qida sənayesi, istehsal, xidmət, turizm, tikinti və digər sahələr üzrə fəaliyyət göstərən şirkətlər əks olunmuşdur.

Daha sonra xarici işlər nazirinin müavini Mahmud Məmmədquliyev, Milli Məclisin deputatı İlham Məmmədov və digər çıxış edənlər kataloqun nəşrini Azərbaycanın ixracat potensialının artırılması istiqamətində çox səmərəli bir addım kimi qiymətləndirmişlər.

Azərbaycan.-2011.-20 sentyabr.-S.5.