Bakıda Azərbaycan-Avstriya biznes forumu keçirilmişdir

Sentyabrın 19-da İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AzPROMO) və Avstriya-Azərbaycan Ticarət Palatasının təşkilatçılığı ilə Azərbaycan-Avstriya biznes forumu keçirilmişdir.

Tədbirdə rəsmi şəxslərlə yanaşı, hər iki ölkənin sənaye, kənd təsərrüfatı, tikinti, səhiyyə, logistika, alternativ enerji, tullantıların utilizasiyası və s. sahələrdə fəaliyyət göstərən iş adamları iştirak etmişlər.

Forumda çıxış edən rabitə və informasiya texnologiyaları naziri, Azərbaycan-Avstriya Hökumətlərarası Komissiyanın sədri Əli Abbasov, iqtisadi inkişaf nazirinin müavini Niyazi Səfərov, Vyana şəhərinin vitse-meri xanım Renate Brauner ölkələrimiz arasında iqtisadiyyatın müxtəlif sahələrində mövcud əməkdaşlığın daha da inkişaf etdirilməsi imkanları, iş adamları arasında əlaqələrin genişləndirilməsinin əhəmiyyəti barədə məlumat vermişlər. Bildirilmişdir ki, ölkələrimiz arasında dinamik inkişaf edən əlaqələrimizin geniş perspektivləri vardır. Forum iki ölkə arasında ticarət-iqtisadi əməkdaşlığın inkişafına töhfəsini verəcəkdir.

Azərbaycanda yaradılmış əlverişli biznes və investisiya mühiti ölkəmizi xarici investisiyalar üçün cəlb etmişdir. Natiqlər əldə edilmiş nailiyyətlərin Azərbaycanda həyata keçirilən uğurlu iqtisadi siyasətin nəticəsi olduğunu bildirmiş, avstriyalı iş adamlarını ölkəmizdə yaradılmış əlverişli biznes mühitindən yararlanmağa dəvət etmişlər.

AzPROMO-nun prezidenti Adil Məmmədov Azərbaycanın investisiya və ixrac imkanları, rəhbərlik etdiyi fondun fəaliyyəti və həyata keçirdiyi layihələr barədə məlumat vermişdir.

Biznes forumunda Avstriya-Azərbaycan Ticarət Palatasının prezidenti Alon Şklarek, Palatanın təsisçi üzvü Gabi Lanski, "TİNA Vienna" şirkətinin baş direktoru Aleksandra Voql təmsil etdikləri qurumların fəaliyyəti barədə təqdimatlarla çıxış etmişlər.

İkitərəfli görüşlərlə davam edən görüşdə iqtisadi əlaqələr və əməkdaşlıq perspektivləri müzakirə olunmuşdur.

AzərTAc

Azərbaycan.-2011.-20 sentyabr.-S.7.