Bakı beynəlxalq tədbirlərin mərkəzinə, möhtəşəm quruculuğun ünvanına çevrilib

Azərbaycan xalqı dövlət müstəqilliyinin bərpasının 20-ci ildönümü ərəfəsindədir. Prezident İlham Əliyevin "Azərbaycan Respublikasının dövlət müstəqilliyinin bərpasının iyirminci ildönümü haqqında" 21 yanvar 2011-ci il tarixli Sərəncamına əsasən, müstəqilliyimizin 20 illik yubileyi dövlət səviyyəsində təntənə ilə qeyd ediləcək.

Həmin sərəncamda nəzərdə tutulmuş Tədbirlər Planına uyğun olaraq indiyədək çoxlu sayda tədbirlər keçirilmişdir. "Azərbaycan" qəzetinin təşəbbüsü ilə ayrı-ayrı şəhər və rayonlarda, dövlət orqanlarında keçirilən "dəyirmi masa"lar da bu qəbildəndir.

Dövlət müstəqilliyinin bərpasının 20-ci ildönümü ilə bağlı qəzetimizin Səbail Rayon İcra Hakimiyyəti ilə birgə keçirdiyi növbəti "dəyirmi masa"da paytaxt

Bakının timsalında Səbail rayonunun keçdiyi inkişaf yolundan söhbət getdi.

"Dəyirmi masa"nı giriş sözü ilə açan "Azərbaycan" qəzetinin baş redaktoru, Milli Məclisin deputatı

Bəxtiyar SADIQOV dedi:

- Hörmətli "dəyirmi masa" iştirakçıları!

1991-ci ildə sovet imperiyasının dağılması ilə bütün müttəfiq respublikalar kimi, Azərbaycan da özünün dövlət müstəqilliyini əldə etdi. Lakin Azərbaycanın müstəqilliyə qovuşması, bu istiqamətdə ölkəmizdə baş verən ictimai-siyasi proseslər əksər sovet respublikalarından köklü şəkildə fərqlənirdi. Bu fərq birinci növbədə ondan ibarət idi ki, Azərbaycan öz dövlət müstəqilliyini bərpa etmişdi. XX əsr dünya tarixindən də bəlli olduğu kimi, keçmiş sovet respublikalarının cəmi bir neçəsinin sovet imperiyasının yaradılmasına qədər müstəqil dövləti mövcud olub ki, onlardan biri də Azərbaycandır. 1918-ci ildə xalqımızın qabaqcıl ziyalıları Rusiyada baş verən siyasi proseslərdən sonra sıx birləşərək Azərbaycan Xalq Cümhuriyyətinin, ölkəmizin müstəqilliyinin əsasını qoymuşdular. Bu mənada 1991-ci ildə Azərbaycan, digər sovet respublikalarından fərqli olaraq, müstəqilliyini bərpa etdi.

Azərbaycan Xalq Cümhuriyyətinin qısa müddətdə həyata keçirdiyi tədbirlər xalqımızın tarixində silinməz iz buraxdı, milli dövlətçilik ənənələrinin bərpası işində böyük rol oynadı. Cümhuriyyətin ömrü qısa olsa da, xalqımızda azadlıq, müstəqillik ideyalarını daha da gücləndirdi. Buna görə müstəqillik hisləri azərbaycanlıları sonrakı dövrdə heç zaman tərk etmədi, azadlıq ideyaları şüurlara hakim kəsildi. Ötən əsrin 80-ci illərinin sonlarında Azərbaycanda baş qaldıran milli-azadlıq hərəkatı da xalqımızın özünün müstəqillik ideyalarını gerçəkləşdirmək istəyindən xəbər verirdi. Azərbaycan xalqı bu yolda şəhidlər verdi, müsibətlər gördü. Bu mənada biz dövlət müstəqilliyinə hamar yollarla deyil, əzab-əziyyətlə, məhrumiyyətlərlə gəlib çıxmışıq. Bütün bunları ümumiləşdirərək deyə bilərik ki, digər sovet respublikalarının müstəqilliyə nail olmaları SSRİ-nin dağılması nəticəsində baş verdisə, Azərbaycanın dövlət müstəqilliyi dövrün, zamanın qaçılmaz tələbi idi.

1991-ci il oktyabrın 18-də qəbul edilmiş "Azərbaycan Respublikasının Dövlət Müstəqilliyi haqqında Konstitusiya Aktı" ilə Azərbaycanın dövlət müstəqilliyi elan olundu. Konstitusiya Aktında deyilir: "Azərbaycan Respublikasının Ali Soveti Azərbaycan Milli Şurasının 1918-ci il mayın 28-də qəbul etdiyi İstiqlal Bəyannaməsinə, Azərbaycan Respublikasının demokratik prinsiplərinin və ənənələrinin varisliyinə əsaslanaraq və "Azərbaycan Respublikasının dövlət müstəqilliyinin bərpası haqqında" Azərbaycan Respublikası Ali Sovetinin 1991-ci il 30 avqust tarixli Bəyannaməsini rəhbər tutaraq bu Konstitusiya Aktını qəbul edir və müstəqil Azərbaycan Respublikasının dövlət quruluşunun, siyasi və iqtisadi quruluşunun əsaslarını təsis edir".

Ümumiyyətlə, Konstitusiya Aktında müstəqil Azərbaycan dövlətinin formalaşdırılması ilə bağlı mühüm müddəalar yer alıb. Lakin 1991-1992-ci illərdə bir-birini əvəzləyən iqtidarlar bu müddəaları reallaşdırmaq qabiliyyətindən məhrum idilər. Hətta onların səriştəsizliyi az qala milli müstəqilliyin də məhv olmasına gətirib çıxaracaqdı. Bir-birini əvəz edən A.Mütəllibov və AXC-Müsavat iqtidarları, əslində, dövlətçilik deyil, hakimiyyətlərini qoruyub saxlamaq maraqlarından çıxış edir və beləliklə, hələ kövrək olan dövlət müstəqilliyini təhlükə altına salırdılar. 1991-1993-cü illərdə hakimiyyətdə olanlar yeni yaranan müstəqil dövlətin möhkəmlənməsi üçün nəinki bir iş görmədilər, əksinə, ölkəni dünyada gedən bütün proseslərdən uzaq salaraq təklənməsinə, təcrid olunmasına xidmət göstərdilər. Bütün bunlar isə, nəticə etibarilə, müstəqilliyin məhvinə aparırdı. Hakimiyyət çəkişmələrinin məntiqi nəticəsi kimi cəbhədəki uğursuzluqlar və daxildə separatçı meyillərin güclənməsi müstəqilliyimizin məhvinə doğru gedən prosesi sürətləndirirdi.

Belə bir vəziyyətdə xalqın tələb və istəyi ilə hakimiyyətə qayıdan ulu öndər Heydər Əliyevin sayəsində ölkəmiz mürəkkəb vəziyyətdə öz müstəqilliyini və suverenliyini qorumağı və möhkəmləndirməyi bacardı. Əvvəlki iqtidarların buraxdığı kobud səhvlər Heydər Əliyevin uzaqgörənliyi ilə aradan qaldırıldı, müstəqilliyimizin qorunması üçün qətiyyətli tədbirlər görüldü. İctimai-siyasi sabitlik bərpa edildi, dövlətçiliyin təməl prinsipləri yaradılaraq möhkəmləndirildi, müstəqil Azərbaycan dünya birliyinin tamhüquqlu üzvünə çevrildi. Həmin dövrü şərh edərkən Heydər Əliyev deyirdi: "İlk illərdə buraxılan kobud səhvlərə baxmayaraq, dövlətçiliyin qorunması üçün qətiyyətli tədbirlər görüldü, ölkədə davamlı ictimai-siyasi sabitlik bərpa edildi... Müharibənin dayandırılması, daxili vəziyyətin nizamlanması, ictimai-siyasi sabitliyin möhkəmləndirilməsi və regionda Azərbaycanla qonşu dövlətlər arasında yaranmış gərginliyin normal məcraya salınması Azərbaycanın müstəqil dövlət kimi yaşamasını və sonrakı inkişafını şərtləndirdi".

Bu gün Azərbaycan dövlətinin qazandığı bütün uğurlar ulu öndər Heydər Əliyevin müdrikliyi sayəsində müstəqilliyimizin qorunub saxlanmasının nəticəsidir. Heydər Əliyev siyasətini layiqincə yaşatmaqla yanaşı, həm də dövlət idarəçiliyində və siyasət meydanında yeni məktəbin banisi olan Azərbaycan Prezidenti cənab İlham Əliyevin həyata keçirdiyi dərin məzmunlu və çoxşaxəli siyasi kurs isə dövlət müstəqilliyini daha da möhkəmləndirir. Prezident İlham Əliyevin qətiyyəti sayəsində ulu öndərin yeni neft strategiyasının uğurla reallaşması, iri enerji layihələrinin işə düşməsi və yeni iqtisadi layihələrə start verilməsi, eləcə də regionda cərəyan edən proseslərlə bağlı ölkə başçısının müdrik siyasi baxışları Azərbaycanın müstəqilliyinin daha da möhkəmlənməsinə, dövlətçiliyimizin daha da qüdrətlənməsinə xidmət edir. Müstəqil daxili və xarici siyasət yeridən Azərbaycanın yalnız regionda deyil, beynəlxalq miqyasda da söz sahibi olan ölkə kimi tanınması, Prezident İlham Əliyevin həyata keçirdiyi çoxşaxəli siyasət, qazandığımız bütün uğurlar əminliklə söyləməyə əsas verir ki, Azərbaycanın dövlət müstəqilliyi heç vaxt əldən verilməyəcək, əbədi olacaqdır.

Qarşıdan dövlət müstəqilliyinin bərpasının 20-ci ildönümü gəlir. Prezident İlham Əliyevin "Azərbaycan Respublikasının dövlət müstəqilliyinin bərpasının iyirminci ildönümü haqqında" 21 yanvar 2011-ci il tarixli Sərəncamına əsasən, müstəqilliyimizin bərpasının ildönümü təntənəli şəkildə qeyd olunacaq. Sərəncamda Prezident İlham Əliyevin müstəqilliyimizlə bağlı fikirləri olduqca qürurvericidir: "İyirmi illik inkişaf yolumuzun ən parlaq nəticəsi ondan ibarətdir ki, bu gün Azərbaycan, sözün əsl mənasında, artıq tam müstəqil ölkədir. Ölkəmizdə gerçəkləşdirilən siyasət daim Azərbaycan xalqının maraqlarına xidmət göstərir. 2010-cu ildə Azərbaycanda Dövlət Bayrağı meydanının açılışı olmuş və dünyanın ən yüksək bayrağı ucaldılmışdır. Bu meydan Azərbaycanın son iyirmi ildə keçdiyi inkişaf yolunun rəmzinə çevrilmişdir".

Sərəncama əsasən artıq xeyli vaxtdır ki, ölkəmizdə və xarici dövlətlərdə müstəqilliyimizin ildönümü ilə bağlı müxtəlif tədbirlər keçirilməkdədir. Öz səhifələrində dövlətçilik ənənələrimizin təbliğinə hər zaman böyük yer verən "Azərbaycan" qəzeti də müstəqilliyimizin bərpasının 20-ci ildönümü ilə bağlı "dəyirmi masa"larını davam etdirir. Bu "dəyirmi masa"larda ölkəmizdə müstəqillik illərində baş verən proseslərə nəzər salınır, bölgələrimizin və bütövlükdə respublikamızın sosial-iqtisadi inkişafı fikir süzgəcindən keçirilir.

Növbəti tədbirimizin Bakının Səbail rayonunda keçirilməsi təsadüfi deyil. Səbail paytaxtın ən qədim rayonlarından biridir. Bu rayonu tarix və memarlıq abidələrinin xəzinəsi də adlandırmaq olar. İçərişəhər ölkəmizin YUNESKO tərəfindən dünya mədəniyyət irsinin inciləri sırasına daxil edilmiş möhtəşəm tarixi abidələrindən biridir. Qız qalası isə Bakının, eləcə də Səbail rayonunun rəmzidir. Azərbaycan Respublikasının əsas dövlət orqanları burada yerləşir. Heydər Əliyev Fondu, Azadlıq meydanı, Şəhidlər xiyabanı, Fəxri xiyaban, habelə bir çox istirahət və gəzinti obyektləri, Fəvvarələr meydanı, Dənizkənarı Milli Park da Səbail rayonundadır. Paytaxtın mərkəz hissəsi ilə yanaşı, Badamdar və Bibiheybət qəsəbələrindən, Bayıl və 20-ci Sahə adlanan yaşayış massivlərindən ibarət olan Səbail rayonu son illərdə böyük inkişaf yolu keçib və "dəyirmi masa"da bu barədə ətraflı söhbət açılacaq.

İndi isə çıxış etmək üçün söz Səbail Rayon İcra Hakimiyyətinin başçısı Asif ƏSGƏROVa verilir:

Asif ƏSGƏROV:

- Müstəqilliyimizin bərpasının 20 illiyi münasibətilə bu tədbirin paytaxtımızın mərkəzi rayonu olan Səbail rayonunda keçirilməsinə görə "Azərbaycan" qəzetinin redaksiyasına öz təşəkkürümü bildirirəm. Xatırlatmaq istəyirəm ki, Azərbaycan Respublikasının Prezidenti İlham Əliyev Azərbaycanın dövlət müstəqilliyinin bərpasının 20 illik yubileyinin ölkəmizin həyatında müstəsna əhəmiyyət daşıyan ictimai-siyasi hadisə olduğunu nəzərə alaraq və müstəqillik illərində respublikamızın keçdiyi zəngin inkişaf yolunda qazandığı parlaq nailiyyətlərin təbliğini təmin etmək məqsədi ilə "Azərbaycan Respublikasının dövlət müstəqilliyinin bərpasının iyirminci ildönümü haqqında" 21 yanvar 2011-ci il tarixli Sərəncam imzalamışdır. Bugünkü tədbirimiz də həmin sərəncamda nəzərdə tutulmuş tədbirlər çərçivəsində keçirilir.

Dövlət müstəqilliyimizin əldə olunması, qorunub saxlanılması və inkişaf etdirilməsi uzun illər ərzində çəkilmiş ağır zəhmətin şirin bəhrəsidir. 20 il zaman baxımından o qədər də böyük dövr olmasa da, müstəqil Azərbaycan bu müddətdə çox mühüm uğurlara imza atmış, beynəlxalq birliyin layiqli üzvünə çevrilmişdir. Azərbaycan xalqı əldə etdiyi azadlığı və müstəqilliyini yüksək qiymətləndirir, onu daimi və dönməz edən insana - ümummilli lider Heydər Əliyevə dərin məhəbbətini ifadə edir. Çünki Azərbaycanın dövlət müstəqilliyi məhz Heydər Əliyevin titanik fəaliyyəti nəticəsində əbədiləşmişdir.

1991-ci ildə müstəqilliyini yenicə bərpa etmiş Azərbaycan ilk illərdə kompleks problemlərlə üzləşdi. Bu problemlərin başında həmin vaxtlar respublikaya "rəhbərlik" edənlərin qətiyyətsizliyi, "kölə psixologiyası"nda yaşamaq niyyətləri və bu rəhbərlərin xalqın ali mənafeyini mərkəzin maraqlarına qurban vermələri dayanırdı. O dövrdə Azərbaycan rəhbərliyi müstəqillik ideyalarını, prinsiplərini qəbul etmək, mənimsəmək iqtidarında deyildi.

Həmin ərəfədə Dağlıq Qarabağda münaqişə yenicə alovlanırdı. Ermənistan ərazilərimizi ilhaq etmək üçün hərbi təcavüzünü genişləndirirdi. Xalqımızın siyasi-ictimai xadimlərinin terror aktlarına məruz qalmaları, ərazilərimizin işğalı, hakimiyyət çəkişmələrinə start verilməsi Azərbaycanın dövlət kimi varlığını sual altına almışdı. Mövcud vəziyyətdən istifadə edərək hakimiyyəti silah gücü ilə ələ alan AXC-Müsavat cütlüyünün iqtidarı dövründə isə ölkəmiz tam olaraq anarxiya və xaos girdabına yuvarlandı, daxili çəkişmələr özünün pik nöqtəsinə çatdı. Gəncədə baş vermiş hadisələrdən sonra ölkəmiz faktiki olaraq parçalanmaq və müstəqilliyini itirmək təhlükəsi ilə üz-üzə qalmışdı. Beləliklə, müstəqilliyimizin ilk illərində Azərbaycan çox ciddi problemlərlə üzləşmiş, ölkənin siyasi, iqtisadi, sosial və digər sahələri iflic olmuşdu.

Bu mürəkkəb situasiyada Azərbaycana ölkəni dərin böhrandan çıxaracaq, dağıdıcı qüvvələri və meyilləri neytrallaşdıracaq, xaos və anarxiyaya son qoyacaq və müstəqilliyimizi əbədi edəcək lider tələb olunurdu. Bu missiyanın öhdəsindən isə yalnız xalqımızın böyük oğlu Heydər Əliyev öz zəngin dövlətçilik təcrübəsi ilə gələ bilərdi. Xalqın istək və tələbi ilə 1993-cü ilin iyununda Heydər Əliyev Bakıya gəldi və həyata keçirdiyi təxirəsalınmaz tədbirlərlə qısa zaman kəsiyində vətəndaş müharibəsi təhlükəsinin, hakimiyyət böhranı və boşluğunun, anarxiyanın qarşısını aldı. Həmin dövrdəki prosesləri praqmatik təfəkkürün fonunda dəyərləndirən ulu öndər Heydər Əliyev deyirdi: "Azərbaycan heç bir ölkənin təsiri altına düşməyəcəkdir. Azərbaycan öz müstəqilliyini qoruyacaqdır. Bu da bir Prezident kimi mənim siyasətimin əsas ana xəttidir. Bunun üçün də hamı bir yolla getməlidir. Burada başqa bir yol yoxdur. Burada başqa yolla gedən adam, demək, məqsəd daşıyır. O məqsədlərə bu gün Azərbaycanda yer yoxdur".

Heydər Əliyevin siyasi hakimiyyətə qayıdışından sonra Azərbaycan məhv olmaqdan qurtuldu, müstəqilliyimizin əbədiliyi təmin edildi, dövlətçiliyin milli əsaslarının yaradılması istiqamətində köklü dəyişikliklər baş verdi. Ulu öndərin həyata keçirdiyi kompleks strateji tədbirlər sayəsində siyasi sabitlik bərqərar olundu, iqtisadi islahatlara başlanıldı. Bunun nəticəsində ölkədə maliyyə vəziyyəti sabitləşdi, iqtisadiyyata cəlb olunan investisiyaların həcmi ildən-ilə artdı, xalqın həyat səviyyəsi yaxşılaşmağa başladı.

Bu gün bizi sevindirən ən əsas amil odur ki, ulu öndərin ölməz ideyaları Prezident İlham Əliyev tərəfindən uğurla davam etdirilir, milli maraqlarımızın qorunmasında, əhalinin rifah halının yaxşılaşdırılmasında qəti və prinsipial mövqe nümayiş etdirilir. Ötən müddət ərzində dövlət başçısının əzmkar fəaliyyəti nəticəsində Azərbaycan dünyanın ən dinamik inkişaf edən ölkəsinə çevrilmişdir. Həyata keçirilən düzgün siyasət nəticəsində ölkəmizin büdcə xərcləri 20 milyard dollara çatmışdır. Strateji valyuta ehtiyatları ilbəil artaraq 38 milyard dollar təşkil etmişdir.

Bakı-Tbilisi-Ceyhan, Bakı-Tbilisi-Ərzurum kimi nəhəng transmilli layihələrin həyata keçirilməsi ölkəmizin siyasi və iqtisadi mövqelərini daha da möhkəmləndirmişdir. Hazırda Bakı-Tbilisi-Qars dəmir yolu tikintisi davam edir. Xəzər dənizində neft-qaz çıxarılması ilbəil artır. Bir neçə gün əvvəl Fransanın "Total" şirkəti Xəzərin Azərbaycan sektorundakı "Abşeron" strukturunda yeni iri qaz yatağı akşar edildiyini açıqlamışdır. Ölkə başçısı bu məsələ ilə bağlı qeyd etmişdir: "Bu əlamətdar hadisə Azərbaycanın neft-qaz potensialının indiyə qədər təsdiqlənmiş ehtiyatlardan qat-qat çox olduğunun növbəti sübutudur". Dövlət başçısı yeni yatağın Azərbaycanın regionda və dünyada mövqeyinin möhkəmlənməsinə, respublikanın sosial-iqtisadi inkişafının daha da güclənməsinə, xalqın maddi-rifah halının yaxşılaşmasına mühüm təsir göstərəcəyini vurğulamışdır. Bu bizi çox sevindirir və ölkəmizin inkişafı istiqamətində apardığı uğurlu siyasətə görə Prezident İlham Əliyevə minnətdarlığımızı bildiririk.

Müstəqilliyimizin bərpasından ötən illər paytaxtımızın mərkəzi rayonu sayılan Səbail rayonunun tarixində də öz izlərini qoymuşdur. Bütün siyasi proseslərin mərkəzində olan rayonumuzda keçən müddət ərzində bütün sahələrdə sürətli inkişaf və tərəqqi əldə olunmuş, böyük irəliləyişlər baş vermişdir.

Ölkə başçısının sahibkarlığın inkişafı, işsizliyin aradan qaldırılması və yeni iş yerlərinin açılması ilə bağlı proqram tapşırıqlarının həyata keçirilməsi rayonumuzun inkişafı ilə bağlı prioritet istiqamətlərdən olmuşdur. Bu sahədə rayon icra hakimiyyəti, müəssisə və təşkilatlar, özəl qurumlar, məşğulluq və digər aidiyyəti orqanlar tərəfindən məqsədyönlü işlər davam etdirilərək sahibkarlığın inkişafına hərtərəfli şərait yaradılmış, bir sıra müəssisələrin fəaliyyəti bərpa olunmuş, yeni hüquqi və fiziki şəxslərin fəaliyyətinə imkanlar açılmışdır.

Azərbaycan Respublikası Dövlət Neft Şirkəti, Dövlət Xəzər Dəniz Gəmiçiliyi, bp şirkəti və digər iri müəssisələr Səbail rayonunun sənaye potensialının inkişafına öz töhfələrini verirlər. Əgər 2000-ci ildə rayonun sənaye müəssisələri tərəfindən 100 milyon manatlıq sənaye məhsulu istehsal edilmişdisə, 2010-cu ilin yekunlarına görə, bu rəqəm 20 milyard 172,3 milyon manat olmuşdur. Səbail rayonunda fəaliyyət göstərən müəssisə və təşkilatlar tərəfindən 2003-2011-ci il daxil olmaqla bütün maliyyə mənbələri hesabına əsas kapitala yönəldilmiş investisiyaların həcmi 21 milyard 320,8 milyon manat təşkil etmişdir. Təkcə 2010-cu ildə bu rəqəm 2299,7 milyon manat olmuşdur. Beləliklə, Səbail rayonunda 2003-cü illə müqayisədə ümumi məhsul buraxılışı 4 dəfə artaraq 24978,7 milyon manata çatmışdır. Sənaye məhsulları istehsalı 4, tikinti-quraşdırma işləri 1,2, nəqliyyat xidməti 4, rabitə xidməti 3,8 dəfə artmışdır.

Prezident İlham Əliyevin diqqət və qayğısı nəticəsində son illərdə ölkədə aparılan genişmiqyaslı abadlıq-quruculuq işləri Səbail rayonunda da öz əksini tapmışdır. Ölkə başçısı rayonda görülən işlərə xüsusi əhəmiyyət vermiş, açılış mərasimlərində şəxsən iştirak etmişdir. Məhz onun təşəbbüsü və rəhbərliyi altında hər bir azərbaycanlı üçün müqəddəs məbədgaha çevrilmiş Heydər Əliyev Fondunun, unikal mədəniyyət mərkəzi olan "Üns" teatrının, dünya mədəniyyət inciləri sırasına salınan Beynəlxalq Muğam Mərkəzinin və bir çox yeni obyektlərin tikintisi başa çatmış, rayonda yerləşən, demək olar ki, bütün elm, təhsil, mədəniyyət mərkəzləri, istirahət yerləri əsaslı təmir olunaraq abadlaşdırılmışdır.

Yalnız son illər ərzində Şahmat Məktəbi, Mərkəzi Klinik Xəstəxananın ambulatoriyası, Milli Məclisin yeni korpusu, Hesablama Palatasının yeni binası, Bakı Biznes Mərkəzi, "Park Bulvar" Ticarət və İstirahət Mərkəzi, "Dalğa Plaza" iş mərkəzi, 6 ünvanda yeraltı piyada keçidi, Qərb Universitetinin biznes mərkəzinin yeni korpusu, "Crown Hotel", "Park INN" və "Ramada" mehmanxana kompleksləri, "Teleqüllə" kompleksi inşa olunmuş, İstiqlal abidəsinin açılışı olmuşdur. Səbail rayonu ərazisində həyata keçirilən əzəmətli və irimiqyaslı layihələrdən biri hər birimizin fəxr etdiyi möhtəşəm Dövlət Bayrağı meydanıdır.

Ölkə rəhbərinin tapşırıqlarına əsasən Dövlət Filarmoniyası, Şirvanşahlar sarayı, Dövlət Kukla, Dövlət Gənc Tamaşaçılar, Rus Dram teatrları, Muzey Mərkəzi, Azərbaycan Tarixi, Dövlət İncəsənət, Azərbaycan Ədəbiyyatı muzeyləri, "Yaşıl teatr" Konsert Kompleksi, MTN Mədəniyyət Mərkəzinin binası, metronun "İçərişəhər" stansiyasının binası, şəhər sakinləri və paytaxtımızın çoxsaylı qonaqlarının əsas gəzinti və istirahət yerləri olan 13 park və Dənizkənarı Milli Park, Yazıçlar Birliyi, Rəssamlar və Bəstəkarlar ittifaqlarının binaları, Respublika Klinik Uroloji Xəstəxanası, "Respublika" mehmanxanası, 132-134 saylı Təhsil Kompleksi, Mərkəzi Poçtamtın binası, Şəhidlər xiyabanı, Fəxri xiyaban, Bəhram Gur abidəsi, Milli Kitabxana, Hökumət evi və bir çox digər obyektlər əsaslı təmir və yenidənqurmadan sonra istifadəyə verilmişdir.

Milli mənəvi dəyərlərimizə böyük hörmət və ehtiramla yanaşan ölkə başçısının səyləri nəticəsində ulu öndər Heydər Əliyevin tapşırığı ilə tikilmiş Bibiheybət məscidi genişləndirilərək möhtəşəm ziyarətgaha çevrilmiş, İçərişəhərdə Cümə, Gileyli və Həzrət Məhəmməd məscidləri əsaslı təmir olunmuşdur. Hazırda dünya mədəniyyət incilərindən sayılan XII əsr memarlıq abidəsi olan Qız qalasında bərpa-konservasiya işləri aparılır.

Bu gün rayon ərazisində Azərbaycan Xalçası və Xalq Tətbiqi Sənəti Dövlət Muzeyi üçün yeni binanın, Parlament prospektində "Alov qüllələri" kompleksinin, Neftçilər prospektində "Four Seasons", "Hilton" və "Mariot" mehmanxanalarının, Badamdar qəsəbəsində MTN-in yeni hospitalının və Oksford məktəbi üçün yeni tədris korpusunun tikintisi aparılır. Neftçilər və Bülbül prospektlərində, Azneft meydanında yeni yeraltı keçidlərin inşası başa çatmaq üzrədir.

Təmir-bərpa işlərinə gədikdə isə, 20-ci yaşayış sahəsində "Neftçi" İdman-Sağlamlıq Mərkəzinin "Bibiheybət" stadionu əsaslı şəkildə yenidən qurulur. Burada AFFA tərəfindən 2 yeni stadion, inzibati bina və mehmanxana tikilir. Dövlət Musiqili Komediya Teatrının, Mahnı Teatrının, Səadət Sarayının binalarında da əsaslı təmir aparılır.

Bildiyiniz kimi, ölkə başçısı tərəfindən 2011-ci il "Turizm ili" elan olunmuşdur və sevindirici haldır ki, bu il Bakı şəhərində istifadəyə verilməsi nəzərdə tutulan 6 ədəd beşulduzlu mehmanxananın 4-ü məhz Səbail rayonunun ərazisindədir.

Ölkə səviyyəli işlərlə yanaşı, rayonda bir sıra digər işlər də həyata keçirilmişdir. Belə ki, Badamdar qəsəbəsində Bakı Elektrik Şəbəkəsinin "Badamdar" yarımstansiyası, Səbail Rayon Enerji və Satış İdarəsinin, Səbail Rayon Polis İdarəsinin, YAP Səbail rayon təşkilatının yeni inzibati binaları, Badamdar qəsəbəsində "Nur" klinikası, 20-ci yaşayış sahəsində 120 yerlik, Bibiheybət qəsəbəsində 70 yerlik yeni uşaq bağçaları, 51, 236 və 239 nömrəli orta məktəblər üçün yeni tədris korpusları, 2 nömrəli lisey üçün yeni akt və idman zalı, Badamdar qəsəbəsində xeyir-şər evi tikilmiş, Bibiheybət qəsəbəsində II Dünya müharibəsində həlak olmuş döyüşçülərin xatirəsinə abidə kompleksi ucaldılmış, 20-ci Sahədə yolötürücü dairə qurulmuşdur.

Rayon icra hakimiyyətinin təşkilatçılığı ilə Badamdar qəsəbəsində mədəniyyət evi, Azərbaycan Vətən Müharibəsi Veteranları Birliyi Səbail rayon təşkilatının, rayon veteran təşkilatları şuralarının qərargahlarında, 2 və 12 nömrəli uşaq musiqi məktəblərində, 39, 85, 110, 130, 136 nömrəli uşaq bağçalarında, 15 nömrəli uşaq və 34 nömrəli poliklinikalarda əsaslı təmir işləri aparılmış, Badamdar qəsəbəsində 2 yeni istirahət bağı, 2 istirahət guşəsi, 12 "Abad həyət" istifadəyə verilmiş, mərkəzdə 80-dən çox həyətdə təmir-abadlıq işləri aparılmışdır.

"2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nda Səbail rayonuna geniş yer ayrılmış, yay aylarında aparılan işlər çərçivəsində 5 orta, 1 peşə məktəbində, 2 uşaq və texniki yaradıcılıq mərkəzlərində əsaslı təmir-yenidənqurma işləri artıq başa çatmışdır. Dövlət proqramlarına müvafiq olaraq rayonda əhalinin elektrik və qaz təchizatında çox müsbət dəyişikliklər əldə olunmuşdur. Köhnə transformatorlar yeniləri ilə əvəz olunmuşdur, yeni elektrik və qaz xətləri çəkilişləri davam etdirilir. Əhalinin içməli su ilə təminatını yaxşılaşdırmaq məqsədi ilə Badamdar qəsəbəsində 2 yeni su anbarı tikilmişdir, su və kanalizasiya şəbəkələrinin yeniləşməsi, rayon ərazisindəki yolların əsaslı təmiri prosesi uğurla davam etdirilir.

Gələn il ölkəmiz "Eurovision-2012" mahnı müsabiqəsinin iştirakçılarını qəbul edəcəkdir. Sevindirici haldır ki, müsabiqə üçün yeni konsert meydançası - "Bakı-Büllur" zalı məhz Səbail rayonu ərazisində tikilir. Hazırda Dövlət Bayrağı meydanından mərkəz istiqamətində yeni magistral yol çəkilir, mühəndis-kommunikasiya qurğuları quraşdırılır.

Göründüyü kimi, müstəqillik illərində respublikamızın digər rayonları ilə yanaşı, Bakı şəhərinin mərkəzi rayonu olan Səbail rayonu da sosial-iqtisadi cəhətcə sürətlə inkişaf etmiş, insanların həyat səviyyəsi durmadan yüksəlmişdir. Səbail rayonunda qazanılan uğurlar, əldə olunan yüksək nəticələr ulu öndər Heydər Əliyevin adı və fəaliyyəti, onun siyasi kursunun layiqli davamçısı Prezident İlham Əliyevin xüsusi diqqət və qayğısının nəticəsidir. Bu gün xalq öz rəhbərinə inanır, taleyini etibar etdiyi Prezidentinin gördüyü işləri, atdığı bütün addımları dəstəkləyir, onun başçılığı altında Azərbaycanın gələcəyinə inamla baxır. Biz də müstəqil respublikamızın və Səbail rayonunun tərəqqi və çiçəklənməsi naminə bundan sonra da bütün vəzifələrin öhdəsindən layiqincə gəlməyə çalışacaq, rayonun mövcud imkanlarını xalqımıza xidmət göstərməyə səfərbər edəcəyik.

Bəxtiyar SADIQOV:

- Həyata keçirilən düşünülmüş inkişaf strategiyasının nəticəsi olaraq ölkəmizin hər yerində iqtisadi sahədə keçmiş ənənələr bərpa olunur. İri müəssisələrin yerləşdiyi Səbail rayonunda bu sahədə vəziyyət ürəkaçandır. Diqqəti cəlb edən əsas məsələ isə məhz yeni tipli iqtisadiyyatın Səbail rayonunun yüksəlməsində əsas amilə çevrilməsidir. Bu barədə danışmaq üçün söz Azərbaycan Dövlət İqtisad Universiteinin dosenti, tarix elmləri namizədi Zəfər Bayramova verilir:

Zəfər BAYRAMOV:

- Gələn ay müstəqilliyimizin bərpasının 20 ili tamam olur. Bu 20 il bizə çox şey öyrətdi. Müstəqilliyimizin ilk illərində xalqımız çox böyük tarixi sınaqlardan çıxdı. Lakin bütün dünyaya sübut edə bildi ki, müstəqil dövlət kimi yaşaya və inkişaf edə bilər.

Müstəqilliyimizin ilk illərində hakimiyyətsizlik, iqtisadi tənəzzül və Ermənistanın hərbi müdaxiləsi nəticəsində ölkədə xaos yaranmışdı. Daha sonra daxili çəkişmələr, beynəlxalq aləmdə Azərbaycana biganəlik və düşmən dövlətə bilavasitə dəstək göstərilməsi respublikamızın vəziyyətini daha da ağırlaşdırmışdı.

Yalnız Azərbaycan xalqının dahi oğlu Heydər Əliyevin 1993-cü ildə siyasi hakimiyyətə qayıdışından sonra ölkəmiz başının üstünü almış bütün fəlakətlərdən xilas oldu, bütün sahələrdə müsbət dəyişikliklərin əsası qoyuldu. Ən əsası, ulu öndərin dövlətçilk sahəsində zəngin təcrübəsi, siyasi idarəçiliyi, uzaqgörənliyi sayəsində Azərbaycanın dövlət müstəqilliyinin dönməzliyi tam təmin olundu.

Bu gün ümummilli lider Heydər Əliyevin siyasi kursunun layiqli davamçısı Prezident İlham Əliyevin apardığı uğurlu siyasət müstəqil respublikamızın taleyinin etibarlı və layiqli əllərdə olduğunu sübut edir. Bu siyasət nəticəsində Azərbaycanın iqtisadi qüdrətinin artması onu dünyanın sürətlə inkişaf edən ölkələri arasına çıxarmış, bölgədə lider dövlətə çevirmişdir.

Ölkədə iqtisadi sahədə aparılan islahatlar, əldə olunan uğurlar Səbail rayonundan da yan keçməmişdir. Səbail rayonunda yerləşən iri dövlət müəssisələri, neft şirkətləri rayonumuzun iqtisadi potensialının güclənməsinə öz töhfələrini verirlər. Bu müəssisələrdə istehsalın və xidmətlərin həcminin ilbəil çoxalması rayon üzrə iqtisadi göstəricilərin artımına gətirib çıxarır. Rayonun sosial-iqtisadi həyatının formalaşmasında mühüm yer tutan nəqliyyat sektorunda fəaliyyət göstərən müəssisələr tərəfindən 2003-cü ildə görülən iş və xidmətlərin həcmi 125,5 milyon manat olduğu halda, 2010-cu ildə bu rəqəm artaraq 476,8 milyon manata çatmış, yük və sərnişin daşınmaları dövriyyəsi artmışdır. Rabitə müəssisələri tərəfindən 2003-cü ildə 178,6 milyon manatlıq rabitə xidmətləri göstərildiyi halda 2010-cu ildə bu rəqəm 785,4 milyon manata çatmışdır. Götürülən gəlirin 9,6 faizi dövlət, 90,4 faizi qeyri-dövlət müəssisələri tərəfindən əldə olunmuşdur. Avtomat telefon stansiyalarının tutumu 2002-ci ildə 55956 nömrə, 2010-cu ildə isə 126434 olmuşdur. Rayon üzrə pərakəndə əmtəə dövriyyəsinin həcmi 2003-cü ildə 90,9 milyon manat olmuş, 2010-cu ildə isə artaraq 324,3 milyon manata çatmışdır. Əhaliyə göstərilən pullu xidmətlərin həcmi 2003-cü ildə 42,6 milyon manat, 2010-cu ilin sonunda isə 299,5 milyon manat olmuşdur. Beləliklə, 2003-cü illə müqayisədə ümumi məhsul buraxılışı 4 dəfə artmışdır. İqtisadiyyatın inkişafındakı artım özünü yeni iş yerlərinin açılmasında, müxtəlif sahələr üzrə çalışan işçilərin sayının artmasında göstərmişdir.

Prezident İlham Əliyevin sahibkarlığın inkişafı ilə bağlı proqram tapşırıqlarının həyata keçirilməsi istiqamətində rayonda məqsədyönlü işlər davam etdirilərək sahibkarlığın inkişafına hərtərəfli şərait yaradılmış, bir sıra müəssisələrin fəaliyyəti bərpa olunmuş, yeni hüquqi və fiziki şəxslərin fəaliyyətinə imkanlar açılmışdır. Bunun da nəticəsidir ki, hazırda Səbail rayonunda 5752 hüquqi və fiziki şəxs sahibkarlıq fəaliyyəti ilə məşğul olur. Daimi əhalisinin sayı 93134 nəfər təşkil edən rayonumuzda hazırda çalışan işçilərin sayı 88912 nəfər, orta aylıq əməkhaqqının məbləği isə 901,7 manat təşkil edir. 2003-cü ilin noyabrından 2011-ci ilin iyul ayının 1-dək rayonun müəssisə, idarə və təşkilatları tərəfindən 33803 yeni iş yeri açılmışdır ki, bunlardan 32935-i daimidir. Bu, Bakı şəhərinin rayonları arasında ən yüksək göstəricidir.

Bildiyiniz kimi, cari ildən ölkə başçısının tapşırığına əsasən Sahibkarlığa Kömək Milli Fondunun xətti ilə Bakıətrafı qəsəbələrin sakinlərinə kreditlərin verilməsinə başlanmış, bütövlükdə respublika üzrə özəl sektora təkcə bu il 125 milyon manat kredit verilməsi planlaşdırılmışdır. Bu il avqust ayının 17-də Badamdar qəsəbəsində Sahibkarlığa Kömək Milli Fondu tərəfindən "Bakı şəhərində sahibkarlığın inkişafına dövlət dəstəyi" mövzusunda tədbir keçirilmişdir. Tədbirdə Səbail rayonunun qəsəbələrində fəaliyyət göstərən 100-dən çox sahibkar iştirak etmişdir. Tədbirdə rayonun iqtisadi potensialına uyğun olaraq güzəştli kreditlər hesabına maliyyələşdirilməsi nəzərdə tutulan iki istiqamət üzrə - müasir çörək istehsalı müəssisələrinin və kiçik həcmli müasir ət kəsimi və emalı müəssisələrinin yaradılması üzrə nümunəvi investisiya layihələrinin təqdimatı olmuşdur. Tədbirin yekununda müvəkkil kredit təşkilatları vasitəsilə Səbail rayonunda fəaliyyət göstərən 23 sahibkarlıq subyektinə 1,4 milyon manata yaxın güzəştli kredit verilib. Bu kreditlər hesabına 81 yeni iş yerinin yaradılması nəzərdə tutulur.

Əldə olunan nailiyyətlər Səbail rayonunda iqtisadi sahədə çalışanları arxayınlaşdırmır. Yeni istehsal sahələrinin yaradılması, mövcud sahələrdə aparılan yenidənqurmalar gələcəkdə rayonumuzun iqtisadi potensialının daha da artmasına səbəb olacaq, ölkəmizin günü-gündən inkişafına və çiçəklənməsinə öz töhfələrini verəcəkdir.

Bəxtiyar SADIQOV:

- Səbail rayonunun iqtisadi inkişafı sosial sferaya diqqətin daha da artırılmasına təsirsiz ötüşmür. İqtisadi dirçəliş, yeni xidmət və istehsal müəssisələrinin yaradılması əhalinin məşğulluğunun artırılmasına, yeni iş yerlərinin yaradılmasına öz töhfələrini verir. Eləcə də əlillərin, şəhid ailələrinin, aztəminatlı vətəndaşların da sosial rifahı, gənclərin asudə vaxtlarını səmərəli keçirmələri Səbail rayonunda diqqət mərkəzindədir. Bu barədə danışmaq üçün söz Yeni Azərbaycan Partiyası Səbail rayon təşkilatı gənclər birliyinin sədr müavini Faiq Qurbanova verilir.

Faiq QURBANOV:

- Ölkəmizdə həyata keçirilən sosial-iqtisadi islahatlar Səbail rayonunda da insanların sosial rifahının yüksəlməsinə öz töhfələrini verməkdədir. Son illər rayonda Məşğulluq Mərkəzi tərəfindən dəfələrlə əmək yarmarkaları keçirilmiş, yüzlərlə işsiz vətəndaş müxtəlif işlərə və sənət kurslarına cəlb olunmuşdur. Həmçinin Azərbaycan Dövlət İqtisad Universitetində artıq 5 ildir məzun yarmarkaları keçirilir ki, bu da gənclərin işlə təminatında böyük rol oynayır. Hazırda Səbail rayonunda müxtəlif növ və kateqoriyalar üzrə 2509 nəfər sosial müavinət alır. 367 ailənin hər birinə orta hesabla 111 manat ünvanlı sosial yardım verilir. Sosial yardımların, təqaüd və müavinətlərin ödənilməsində gecikmələrə yol verilmir.

Məlum olduğu kimi, bu il iyul ayının 1-dən 2006-cı ilə qədər ölkədə pensiyaya çıxan 845 min vətəndaşın pensiyası 40 faiz artmışdır. Səbail rayonunda qeydiyyatda olan 13438 nəfər təqaüdçünün 9880 nəfərinə bu artım şamil olunmuşdur. Rayonda vətəndaşların mənzil-məişət şəraitinin yaxşılaşdırılması, xüsusilə imtiyazlı təbəqəyə aid vətəndaşların mənzillə təmin olunması üçün müvafiq işlər görülür. Belə ki, rayonda 100-ə yaxın Qarabağ müharibəsi və 20 Yanvar əlili, şəhid ailəsi üzvləri mənzil növbəsində durublar. Yalnız 2011-ci ilin birinci yarısı ərzində Əmək və Əhalinin Sosial Müdafiəsi Nazirliyinin köməyi ilə imtiyazlı təbəqəyə aid ailələrdən 1 Çernobıl əlili ailəsi, 1 20 Yanvar əlili ailəsi, II Dünya müharibəsi veteranı, 8 şəhid və Qarabağ müharibəsi əlili ailəsi, ümumilikdə 15 ailə yeni mənzillərlə təmin olunmuşdur. İlin sonuna kimi daha bir neçə ailənin mənzillə təminatı planlaşdırılmışdır.

Rayon ərazisində məskunlaşmış 4631 nəfər qaçqın və 10615 nəfər məcburi köçkün soydaşlarımızın rastlaşdığı problemlərin həlli də daim diqqət mərkəzindədir. Məcburi köçkünlərin məskunlaşdığı bir sıra yataqxana və inzibati binalarda təmir aparılmış, digər yerlərdə daxili imkanlar hesabına elektrik, su və kanalizasiya xətlərinin yenilənməsi və təmiri işləri görülmüş, 6 ünvandakı yataqxana binası isə Qaçqınların və Məcburi Köçkünlərin İşləri üzrə Dövlət Komitəsi tərəfindən təmir siyahısına salınmışdır. Qaçqın və məcburi köçkünlərin digər müraciətləri də operativ şəkildə həll olunur.

Rayonda ahıl və yaşlı sakinlərlə bağlı müvafiq işlər aparılır. Belə ki, rayon Veteran Təşkilatları Şurasının, Qarabağ müharibəsi veteranlarının, "20 Yanvar" cəmiyyətinin qərargahları, 20-ci Sahədəki Veteranlar bağı və bağdakı Veteran Neftçilər Klubu əsaslı təmir olunaraq onların istifadəsinə verilmiş, keçən il Bibiheybət qəsəbəsində II Dünya müharibəsi veteranlarının şərəfinə abidə ucaldılmışdır. Keçirilən müxtəlif tədbir və toplantılara veteranların, digər ictimai təşkilatların nümayəndələri dəvət olunur, onlara müxtəlif yardımlar göstərilir.

Mən bir gənc olaraq rayonda gənclərlə bağlı görülən işlər barədə də danışmaq istəyirəm. Çünki Səbail rayonu həm də gənclər rayonudur. Rayonda 24 mindən çox gənc yaşayır, əlavə olaraq rayonda təhsil alan, müxtəlif idarə və təşkilatlarda çalışanlar arasında 30 min nəfəri gənclərdir. Səbail Rayon Gənclər və İdman İdarəsi ilə rayonumuzun ərazisində fəaliyyət göstərən əl oyunları stadionu, uşaq-gənclər idman, şahmat, idman-gənclər gimnastika məktəbləri, 35 saylı texniki yaradıcılıq, 20 saylı uşaq yaradıcılıq mərkəzləri ilə sıx əlaqələr yaradılmışdır. Bu məktəblərdə və mərkəzlərdə gənclərin iştirakı ilə çoxsaylı tədbir və idman yarışları təşkil olunur ki, bunun da nəticəsində nailiyyətlərimizin sayı durmadan artır. Dövlət proqramının müddəalarına uyğun olaraq, gənclər və idman sahəsi üzrə Badamdar qəsəbəsində yeni idman zalının tikintisi nəzərdə tutulmuşdur.

Gənclərlə iş çərçivəsində idman yarışları və spartakiadaların keçirilməsi üçün orta məktəblərin bazalarından da istifadə olunur. Yeniyetmələrin asudə vaxtlarının, yay istirahətinin təşkili istiqamətində bir sıra uğurlar əldə olunmuşdur. Rayon icra hakimiyyətinin təşkilatçılığı ilə bu il artıq 6-cı dəfə təşkil olunan "Şahinlər" hərbi-vətənpərvərlik istirahət düşərgəsinin fəaliyyəti, tətillər zamanı aztəminatlı ailələrin övladları üçün "Park Bulvar" Ticarət və İstirahət Mərkəzində filmlərin göstərilməsi və əyləncələrin təşkili valideynlər tərəfindən rəğbətlə qarşılanmışdır.

İdarəmizin tədbirlər planına uyğun olaraq hər il "Cəsurlar" hərbi-idman və turizm oyunlarının rayon mərhələsi, "Xəmsə" Milli İntellektual Oyunu üzrə gənclər arasında rayon birinciliyi, "Şahin" hərbi-idman oyununun rayon mərhələsi, orta məktəblərdə yeniyetmə və gənclər arasında hüquq pozuntuları, narkomanlıq, QİÇS və digər neqativ halların profilaktikası ilə əlaqədar "dəyirmi masa"lar, bir çox əlamətdar hadisələrlə bağlı silsilə tədbirlər keçirilir. Bu tədbirlərdə xeyli sayda yeniyetmə və gənclərin iştirakı təmin olunur.

Ümumiyyətlə, Səbail rayonunda sakinlərin sosial problemlərinin həlli istiqamətində bir sıra işlərin həyata keçirilməsi nəzərdə tutulmuşdur. Təbii ki, rayonumuzun gəncləri bu işlərdə daim ön sıralarda olacaqlar.

Bəxtiyar SADIQOV:

- Dinamik inkişafın və maliyyə imkanlarının artmasının nəticəsi olaraq hazırda ölkəmizin hər bir guşəsində genişmiqyaslı abadlıq və quruculuq işləri həyata keçirilir. Bakının Səbail rayonunda da bu istiqamətdə görülən işlər olduqca təqdirəlayiqdir. Rayonun elə bir ünvanı yoxdur ki, gözəlləşməsin, müasirləşməsin. Bu barədə əvvəlki çıxışlarda ətraflı məlumat verildi. Abadlıq və quruculuq işləri rayonun qəsəbələrində də geniş vüsət alıb və bununla bağlı danışmaq üçün söz Badamdar qəsəbəsinin sakini, iş adamı Fəxrəddin Quliyevə verilir:

Fəxrəddin QULİYEV:

- Səbail rayonunda abadlıq və quruculuq işləri bir neçə istiqamətdə həyata keçirilir ki, bunların biri mədəni sahədir. Mədəniyyətimizin inkişafına çox böyük diqqət və qayğı göstərən Prezident İlham Əliyevin birbaşa təşəbbüsləri ilə respublikamızın aparıcı mədəniyyət mərkəzlərinin yerləşdiyi Səbail rayonundakı teatrlar, muzeylər, parklar, dini ibadət yerləri və digər mədəniyyət obyektləri təmir olunaraq sakinlərimizin və şəhərimizin çoxsaylı qonaqlarının istifadəsinə verilmişdir.

Səbail rayonunda bir sıra yerli əhəmiyyətli işlər də həyata keçirilmişdir ki, bu da bir rayon sakini kimi məni çox sevindirir. Son illər ərzində 20-ci yaşayış sahəsində 120 yerlik, Bibiheybət qəsəbəsində 70 yerlik yeni uşaq bağçaları, 51, 236 və 239 saylı orta məktəblər üçün yeni tədris korpusları, 2 saylı lisey üçün yeni akt və idman zalı, 20-ci Sahədə yolötürücü dairə inşa olunmuşdur. Təkcə bu il rayonda 1 orta və 1 musiqi məktəbi sökülərək yenidən tikilmiş, 5 məktəbdə, 1 peşə məktəbində, 2 yaradıcılıq mərkəzində əsaslı təmir-yenidənqurma işləri aparılmışdır. Rayondakı 1 məktəb üçün 660 şagird yerlik yeni korpus, 1 məktəb üçün isə idman və akt zalı olan korpus tikilir, 2 uşaq bağçasında təmir aparılır.

Badamdar qəsəbəsindəki Mədəniyyət evi 1957-ci ildə inşa olunmuş, heç vaxt təmir edilməmişdir. 15 ildən çox bir müddətdə həmin binada qaçqın ailələri məskunlaşdığından bura yararsız hala düşmüşdü. Rayon icra hakimiyyətinin təşəbbüsü ilə ilk növbədə burada məskunlaşmış qaçqın ailələri üçün Şıx sanatoriyasında gözəl şərait yaradılaraq onlar ora köçürülmüş, yeni layihə sənədləri əsasında yenidənqurma aparılmışdır. Mədəniyyət evində tədbirlərin keçirilməsi, dərnəklərin fəaliyyəti üçün hər cür şərait yaradılmışdır.

Rayonda həyata keçirilən "Abad həyət" layihəsinə də xüsusilə toxunmaq istəyirəm. Badamdar qəsəbəsində yaşadığım həyət də daxil olmaqla, 12 həyətdə əsaslı təmir-abadlıq işləri görülmüş, sakinlər üçün hər cür şərait yaradılmışdır. Ən başlıcası, sakinlərin müraciətləri nəzərə alınaraq Badamdar qəsəbəsində 250 nəfərlik hər cür şəraiti olan xeyir-şər evi tikilərək istifadəyə verilmişdir. Bu, qəsəbədə çox böyük ehtiyac duyulan problemin həllində böyük rol oynamışdır. Hazırda həmin tikilinin yanında daha bir zal inşa olunur.

Bu ilin aprel ayının 20-də ölkə başçısı cənab İlham Əliyev Badamdar qəsəbəsində olarkən sakinlərin ona müraciətini nəzərə alıb burada 120 yerlik uşaq bağçası və 880 şagird yerlik ümumtəhsil məktəbinin tikintisi üçün sərəncam imzalamışdır. Daha bir sərəncamla qəsəbəmizdə çox böyük ehtiyac duyulan xəstəxananın tikintisinə də start verilmişdir.

Yalnız son bir il ərzində rayonun Badamdar, Bibiheybət qəsəbələrinin, 20-ci Sahə-Bayıl ərazilərində 500.000 kv.metr sahəyə yeni asfalt qatı salınmış, müxtəlif diametrli su və kanalizasiya xətləri yenilənmişdir. Hazırda 20-ci Sahədəki Elçin Əzizov küçəsində asfaltlama işləri aparılır və burada artıq 6.000 kvadratmetr sahədə yollar təmir olunaraq asfalt salınmışdır. Badamdar qəsəbəsində, 20-ci sahənin digər yerlərində də məhəllədaxili yolların təmiri davam etdirilir.

Bu gün Səbail rayonu nəhəng tikinti meydanını xatırladır. Onlarla layihə həyata keçirilir, yeni yollar, yeraltı keçidlər salınır. Həyata keçirilən, inşası nəzərdə tutulan yeni müasir layihələr ümid etməyə əsas verir ki, yaxın illər ərzində Bakı şəhərinin mərkəzi rayonu olan Səbail rayonunun qəsəbə və yaşayış sahələri daha da müasirləşəcək, görülən işlər nəticəsində paytaxtımız dünyanın ən gözəl şəhərlərindən birinə çevriləcəkdir.

Bəxtiyar SADIQOV:

- 2004-cü ildən fəaliyyət göstərən Heydər Əliyev Fondu qısa müddətdə ölkəmizdə və onun hüdudlarından kənarda xeyirxahlığın, mərhəmətin və quruculuğun əsas ünvanına çevrilib. Təbii ki, Fondun həyata keçirdiyi sosial layihələr Səbail rayonunu da əhatə edir. Digər tərəfdən, Heydər Əliyev Fondu Səbail rayonu üçün həm də ona görə doğmadır ki, Fondun inzibati binası burada yerləşir. Çıxış üçün söz Səbail rayonundakı 132-134 saylı Təhsil Kompleksinin direktoru, əməkdar müəllim Sara Xanlarovaya verilir:

Sara XANLAROVA:

- Dövlət müstəqilliyinin bərpasının 20-ci ilinə qədəm qoyan Azərbaycan Respublikası xalqımızın ümummilli lideri Heydər Əliyevin müəyyən etdiyi yolla inkişaf edir, inamla gələcəyə doğru addımlayır. Ölkəmizin müstəqillik tarixində baş verən proseslərə nəzər saldıqda bir daha aydın olur ki, Azərbaycanın tərəqqisinin, qüdrətlənməsinin yolu məhz Heydər Əliyev siyasi kursunun davam etdirilməsindən, ulu öndərin ideyalarının gerçəkləşdirilməsindən keçir.

7 il öncə fəaliyyətə başlayan Heydər Əliyev Fondu ulu öndərin ideyalarını, xeyirxah və müqəddəs əməllərini yaşatmaq üçün ictimai həyatın ən müxtəlif sahələrində fundamental, çoxşaxəli layihələr həyata keçirir, hər bir vətəndaşın zəruri istək və arzularının gerçəkləşməsində, problemlərinin həllində həm maddi, həm də mənəvi dəstəyə çevrilir. Ölkəmizin inkişafına böyük töhfələr verən Heydər Əliyev Fondunun fəaliyyəti eyni zamanda bəşəriyyətin həmrəyliyi üçün sivilizasiyalararası dialoqa yönəlib. Elə buna görə də təsadüfi deyil ki, Heydər Əliyev Fondunun prezidenti, Azərbaycanın birinci xanımı, YUNESKO və İSESKO-nun xoşməramlı səfiri, Milli Məclisin deputatı Mehriban Əliyevanın adı nəinki respublikamızda, həmçinin onun hüdudlarından çox-çox kənarlarda xeyirxahlıq, nəciblik, vətənpərvərlik rəmzinə çevrilmişdir. Bizim üçün xüsusilə əlamətdar və sevindirici haldır ki, hər bir azərbaycanlı üçün müqəddəs məbədgah sayılan Heydər Əliyev Fondu paytaxtımızın mərkəzi olan Səbail rayonunda yerləşir, öz gözəl memarlıq üslubuna görə şəhərimizə xüsusi gözəllik verir.

Rayonumuzun idarə və təşkilatları, ali təhsil müəssisələri daim Heydər Əliyev Fondunun nəcib və xeyriyyəçilik təşəbbüslərinə qoşulmuş, rayon icra hakimiyyətinin təşkilatçılığı ilə mütəmadi olaraq talassemiya və hemofiliyadan əziyyət çəkən uşaqlar üçün könüllü qanvermə aksiyaları təşkil olunmuşdur. Azərbaycan Dövlət Pedaqoji və İqtisad universitetlərində il ərzində bir neçə dəfə bu aksiyalar təşkil olunur və iştirakçıların sayı ilə digərlərindən fərqlənir.

Mehriban xanım Əliyevanın gərgin əməyi və səyləri nəticəsində Azərbaycan muğamına ikinci nəfəs verilmiş, o, dünya mədəniyyəti inciləri səviyyəsində tanıdılaraq qəbul edilmişdir. 2008-ci il dekabırın 27-də Dənizkənarı Milli Parkda Heydər Əliyev Fondunun təşəbbüsü və YUNESKO-nun dəstəyi ilə unikal mədəniyyət abidəsi olan Beynəlxalq Muğam Mərkəzinin istifadəyə verilməsi bu istiqamətdə görülən işlərin bir hissəsidir. 2009-cu ilin mart ayında burada "Muğam aləmi" Beynəlxalq festivalı təşkil edilərək bir çox xarici ölkələrdən nümayəndələr dəvət olunmuşdur. Səbail rayonu üçün bu müsabiqənin əhəmiyyəti daha sevindiricidir. Çünki rayonumuzun 239 nömrəli orta məktəbinin məzunu Arzu Əliyeva müsabiqənin laureatları arasında olmuşdur.

2008-ci ildə Fondun yeni layihəsinə start verilmiş, Dənizkənarı Milli Parkda Azərbaycan Xalçası və Xalq Tətbiqi Sənəti Dövlət Muzeyinin binasının təməlqoyma mərasimi keçirilmiş və hazırda burada genişmiqyaslı işlər aparılır. 2010-cu ildə burada əlavə olaraq Musiqi Mədəniyyəti Dövlət Muzeyinin tikintisi ilə bağlı işlərə başlanmışdır.

Heydər Əliyev Fondunun dəstəyi ilə Azərbaycanın qədim tarixi-memarlıq incilərindən olan 500-dən çox dövlət əhəmiyyətli abidənin yerləşdiyi, YUNESKO-nun "Dünya İrs siyahısı"na salınmış İçərişəhərdə abadlıq, təmir-restavrasiya işləri aparılır. Bizim üçün doğma olan İçərişəhər həm yenilənir, həm də öz qədim cizgilərini qoruyub saxlayır.

Gələn il respublikamız "Eurovision-2012" mahnı müsabiqəsinin iştirakçılarını qəbul edəcəkdir. Qeyd edim ki, müsabiqə üçün yeni konsert meydançası - "Bakı-Büllur" zalı da Səbail rayonu ərazisində inşa olunur. Əminik ki, bu müsabiqə də ölkəmizdə keçirilən digər möhtəşəm tədbirlər kimi, müvəffəqiyyətlə təşkil olunacaq, müsabiqə ölkəmizin təbliği və Azərbaycan həqiqətlərinin dünyaya çatdırılması işində mühüm hadisəyə çevriləcəkdir.

Ulu öndər Heydər Əliyev həmişə öz çıxışlarında qeyd etmişdir ki, təhsil millətin gələcəyidir. Bu gün Heydər Əliyev Fondu ulu öndərin ideyalarına sadiq qalaraq Azərbaycanda təhsilin inkişafına töhfələrini verməkdədir. Mehriban xanım Əliyevanın təşəbbüsü ilə Heydər Əliyev Fondunun "Yeniləşən Azərbaycana yeni məktəb" layihəsi uğurla həyata keçirilmişdir. Bu layihə çərçivəsində respublikamızın bölgələrində yüzlərlə məktəb tikilmiş, məktəblərin maddi-texniki bazası əsaslı surətdə yeniləri ilə əvəz olunmuşdur.

Səbail rayonuna gəldikdə isə, qeyd etmək istərdim ki, rayonumuzun əraizisində yerləşən 7 nömrəli orta məktəbdə Heydər Əliyev Fondunun yaxından köməyi ilə əsaslı təmir işləri aparılmışdır. 1966-cı ildə inşa olunmuş və 1940 şagirdin təhsil aldığı Badamdar qəsəbəsindəki 236 saylı orta məktəbdə də Heydər Əliyev Fondu tərəfindən tam əsaslı təmir və yenidənqurma işləri aparılmış, məktəb bütün müasir avadanlıqlarla təmin olunmuşdur. 2010-cu il sentyabr ayının 7-də 236 saylı orta məktəbin təmirdən sonrakı açılış mərasimində Mehriban xanım Əliyeva da iştirak etmiş, məktəbi gəzmiş, burada görülən işlərdən razı qalmışdır.

Keçən il Səbail rayonu üçün təhsil sahəsində daha bir əlamətdar hadisə ilə yadda qalmışdır. 2010-cu il sentyabr ayının 15-də - Bilik Günündə 132-134 saylı Təhsil Kompleksinin ən müasir beynəlxalq standartlara uyğun əsaslı təmir və yenidənqurmadan sonra açılış mərasimi olmuşdur. Müasir təhsil üçün hər cür şərait yaradılmış bu kompleksin binası şəhərimizin mərkəzinə xüsusi gözəllik verən bir memarlıq nümunəsi olmuşdur. Bu bilik ocağının yenidən qurulması şagirdlərin təhsil şəraitini tamamilə dəyişməyə, tədrisin səviyyəsini yüksəltməyə imkan yaradır. 132-134 saylı Təhsil Kompleksində əsaslı təmir və yenidənqurma işlərinin aparılması, Prezident İlham Əliyevin açılış mərasimində məktəb kollektivi, şagirdlər və valideynlər qarşısında çıxışı dövlətimizin rəhbərinin təhsilə göstərdiyi diqqət və qayğının bariz nümunəsidir.

Bu ili isə Səbail təhsili üçün tərəqqi ili adlandırmaq olar. Rayonun tarixində birinci dəfədir ki, dövlət proqramına uyğun olaraq 1 yeni məktəb inşa olunmuş, 5 ümumtəhsil və 1 peşə məktəbində, 1 uşaq yaradıcılıq və 1 texniki yaradıcılıq mərkəzində əsaslı təmir işləri aparılmışdır. Bu, rayonda təhsilin səviyyəsinin yüksəlməsi üçün mühüm bir amildir. Hazırda 7 saylı məktəb üçün idman, akt zalı və 8 sinif otağından ibarət əlavə yeni korpus, 49 saylı məktəb üçün isə 660 şagird yerlik yeni tədris korpusu tikilir. Ölkə başçısının sərəncamı ilə yaxın vaxtlarda Badamdar qəsəbəsində 120 yerlik uşaq bağçası və 880 şagird yerlik yeni ümumtəhsil məktəbinin tikintisinə başlanacaqdır.

Təhsil sahəsində görülən bütün bu işlər Səbail rayon ictimaiyyəti tərəfindən razılıqla qarşılanır. İnanırıq ki, dövlətimizin inkişafı və Heydər Əliyev Fondunun əzmkar fəaliyyəti sahəsində Bakı şəhərində və bütövlükdə respublikamızda daha böyük nailiyyətlərin şahidi olacağıq.

Bəxtiyar SADIQOV:

- Hörmətli "dəyirmi masa" iştirakçıları!

Müstəqillik, həqiqətən, gözəl nemətdir və biz bunun aydın təcəssümünü ölkəmizin gündən-günə artan qüdrətində, beynəlxalq birlikdəki yerinin möhkəmlənməsində, kompleks dinamik inkişafında görürük. Bütün bu uğurların əsası görkəmli siyasi və dövlət xadimi Heydər Əliyevin uzaqgörənliyi, dövlət idarəçiliyi sahəsindəki təcrübəsi ilə qoyulmuşdur. Heydər Əliyevin ölkəmizə rəhbərlik etdiyi illər ərzində Azərbaycanda bütün istiqamətlərdə dövlət quruculuğu prosesi uğurla həyata keçirildi, müstəqilliyimizin möhkəmlənməsinə xidmət edən təxirəsalınmaz addımlar atıldı, dövlətçilik ənənələri zənginləşdirildi.

Ulu öndərin ən layiqli siyasi davamçısı Prezident İlham Əliyevin yeni dövrün tələblərinə uyğun, zamanın nəbzini tutmaqla həyata keçirdiyi düşünülmüş, sürətli və davamlı inkişaf strategiyasının nəticəsi olaraq artıq Azərbaycan iqtisadi sahədə keçid dövrünü başa vurub. Sərəncamda deyildiyi kimi, bu gün özünün uzunmüddətli inkişaf strategiyasının istiqamətlərini müəyyən edən Azərbaycan dünya miqyasında iqtisadi artım sürətinə görə ön sıralarda gedərək islahatçı ölkə kimi tanınır. Respublikamızda neft və qeyri-neft sektorlarının yüksəlişi, çoxşaxəli iqtisadiyyatın ahəngdar inkişafı təmin olunmuşdur. Ümumi daxili məhsul, büdcə və valyuta ehtiyatları ildən-ilə artmaqdadır.

Dövlət müstəqilliyimizin bərpasının 20-ci ildönümü ərəfəsində respublikamız üçün növbəti əlamətdar hadisə baş verdi. Xəzər dənizinin Azərbaycan sektorundakı "Abşeron" blokunda aparılan qazma və kəşfiyyat işləri nəticəsində burada böyük qaz yatağının olduğu aşkar edildi. "Abşeron" bloku müstəqillik dövründə Xəzərin Azərbaycan sektorunda "Şahdəniz" və "Ümid"dən sonra kəşf olunan üçüncü böyük qaz yatağıdır. Prezident İlham Əliyevin qeyd etdiyi kimi, bu bizə imkan verəcək ki, öz qaz strategiyamızı daha inamla irəliyə aparaq, Azərbaycanı əsas qaz ixracatçılarından olan ölkə kimi dünyada tanıtdıraq, Azərbaycan xalqının maraqlarını təmin edək. Beləliklə, bu il müstəqilliyimizin 20-ci ildönümünü qeyd edərkən tam əminliklə deyə bilərik ki, neft-qaz sektorunda, ümumiyyətlə enerji təhlükəsizliyi sahəsində əldə edilmiş nailiyyətlər ölkəmizin beynəlxalq miqyasdakı mövqelərini əhəmiyyətli dərəcədə möhkəmləndirir.

Ölkəmizin ümumi inkişaf dinamikasına uyğun olaraq son illər paytaxt Bakının siması büsbütün dəyişmişdir. İncə zövqlə, müasirliklə tarixiliyin sintezi və həmahəngliyi təmin edilməklə aparılan yenidənqurma və abadlıq işləri Bakını dünyanın ən gözəl şəhərlərindən birinə çevirmişdir. Paytaxtımız sürətlə inkişaf edir və bu dinamikaya uyğun olaraq gözəlləşir, əvvəlki şöhrətini özünə qaytarır.

Bakıda aparılan yenidənqurma və abadlıq işlərinin mühüm bir hissəsi də Səbail rayonunun payına düşür. Bu həm də ondan irəli gəlir ki, bir çox dövlət orqanları, dövlət və strateji əhəmiyyətli binalar bu rayonun inzibati ərazisindədir. Fəvvarələr meydanı öz gözəlliyi və möhtəşəmliyi ilə fərqlənir. Ötən il istifadəyə verilən Dövlət Bayrağı meydanı da burada yerləşir. Hazırda Bakı buxtasında Səbail rayonunun ərazisində yerləşən bütün zavodlar, müəssisələr şəhərdən kənara köçürülür və Dənizkənarı Milli Parkın ərazisi Dövlət Bayrağı meydanına qədər genişləndirilir. Səbail rayonu həm də gələn il keçiriləcək "Eurovizion" mahnı müsabiqəsinə ev sahibliyi edəcək.

Bütün bunlar məhz Azərbaycanın müstəqil dövlət olmasının və bu müstəqillikdən irəli gələn inkişafının məntiqi nəticəsidir. Bu inkişaf həm də onu göstərir ki, ölkəmizdə gerçəkləşdirilən siyasət xalqımızın maraqlarına xidmət edir.

Azərbaycan.-2011.-21 sentyabr.-S.4-5.