«İki sahil» qəzeti Neftçilər Gününə həsr olunmuş xüsusi buraxılış hazırlamışdır

AzərTAc xəbər verir ki, 20 sentyabr - Neftçilər Günündə "İki sahil" qəzetinin işıq üzü görən 164 səhifəlik xüsusi buraxılışı Azərbaycan neft-qaz sənayesinin son 17 ildə keçdiyi inkişaf yolunu əks etdirən maraqlı yazılar, rəngli şəkillər və yüksək poliqrafik tərtibatı ilə diqqəti cəlb edir.

1994-cü il sentyabrın 20-də ümummilli lider Heydər Əliyevin qətiyyəti sayəsində Xəzər dənizinin Azərbaycana aid hissəsində yerləşən "Azəri-Çıraq-Günəşli" yataqlarının neft-qaz sərvətlərinin birgə işlənməsinə dair nüfuzlu xarici şirkətlərlə Azərbaycan Respublikası Dövlət Neft Şirkəti arasında imzalanan, tarixə "Əsrin müqaviləsi" kimi daxil olan neft sazişindən sonra ölkəmizin ictimai-siyasi, iqtisadi həyatında yeni mərhələnin başlanması xüsusi buraxılışın ana xəttini təşkil edir.

Xüsusi buraxılışın üz qabığında ulu öndər Heydər Əliyevin "Neft-Azərbaycanın ən böyük sərvəti olub, xalqa, özü də təkcə indiki nəslə deyil, həm də gələcək nəsillərə mənsubdur" fikri qeyd olunmuşdur. Birinci səhifədə isə ümummilli liderin "Bizim bütün sərvətlərimiz xalqa məxsusdur və bu sərvətlərdən istifadə olunmasında heç kəsin müstəsna haqqı yoxdur" fikrinin davamı olaraq Prezident İlham Əliyevin "Azərbaycanın neft gələcəyi çox parlaqdır. Hesab edirəm ki, respublikamız bundan əldə etdiyi gəliri düzgün xərcləyəcək və beləliklə, iqtisadiyyatımızın bütün sektorları inkişaf edəcəkdir" tezisi öz əksini tapmışdır.

Xüsusi buraxılışda Azərbaycan neft sənayesinin çoxəsrlik tarixinə işıq salınaraq, son 17 ildə imzalanmış beynəlxalq neft sazişlərinin iqtisadiyyatımızın dinamik inkişafında müstəsna rol oynadığı diqqətə çatdırılır. "Əsrin müqaviləsi"nin əhəmiyyəti xüsusi buraxılışda dərc olunan yazıların hər birində önə çəkilir.

ARDNŞ-in prezidenti Rövnəq Abdullayevin Azərbaycanın neft sənayesi işçilərinə bayram təbrikində bildirilir ki, dünya enerji bazarında etibarlı neft ixracatçısı kimi özünü çoxdan təsdiq etmiş Azərbaycan son illərdə beynəlxalq qaz tədarükü sisteminə inamla daxil olaraq, bu sahədə yeni-yeni nailiyyətlər qazanmışdır. Bir il ərzində neftçilərimiz tərəfindən iki böyük qaz-kondensat yatağının kəşf olunması ölkəmizin qaz ixrac potensialının genişləndirilməsi baxımından xüsusi əhəmiyyət kəsb etmişdir. Son 20 ildə ilk dəfə olaraq, ARDNŞ-in daxili imkanları hesabına "Ümid" perspektiv strukturunda apardığı axtarış-kəşfiyyat işləri böyük müvəffəqiyyətlə nəticələnmişdir. Neftçilər builki peşə bayramları ərəfəsində xalqımıza daha bir müjdə verdilər. Xarici tərəfdaşlarla birgə işlənilən "Abşeron" strukturunda da böyük qaz yatağı kəşf edildi.

Xüsusi buraxılış ümumilikdə ARDNŞ-in strukturlarının fəaliyyəti, onların əlamətdar gün - neftçilərin peşə bayramını hansı nailiyyətlərlə qeyd etməsi və qarşıda hansı vəzifələrin dayandığı barədə dolğun təəssürat yaradır. Yazılarda "Əsrin müqaviləsi"nin imzalanmasından sonra ölkəmizin neft-qaz sektorunda əldə olunan uğurlar diqqətə çatdırılır və ulu öndər Heydər Əliyevin müəllifi olduğu neft strategiyasının təntənəsi kimi dəyərləndirilir. Bildirilir ki, neft gəlirlərinin idarə olunmasında şəffaflığın yüksək səviyyədə qorunması ölkəmizin hərtərəfli inkişafını sürətləndirir.

Xüsusi buraxılış ulu öndər Heydər Əliyevin "Əsrin müqaviləsi"ndə qarşıya qoyulmuş vəzifələrə layiqincə əməl edilməsi, yeni neft strategiyamızın uğurla həyata keçirilməsi Azərbaycanın dövlət müstəqilliyinin əsas qarantlarından biridir..." fikri ilə tamamlanır. Azərbaycan neftinin 2006-cı il 28 May - Respublika Günündə Ceyhan terminalına çatması da bu həqiqəti bir daha nümayiş etdirmişdir. Dövlət başçısı İlham Əliyev bu münasibətlə xalqa müraciətində bildirmişdir ki, Azərbaycan neftinin məhz bu gündə Ceyhan terminalına çatmasının rəmzi mənası vardır. Bu, bir daha Azərbaycanın dövlət müstəqilliyinin möhkəmləndirilməsində "Əsrin müqaviləsi"nin böyük rol oynadığının təsdiqidir.

Azərbaycan bu gün ulu öndər Heydər Əliyevin müəllifi olduğu neft strategiyasının Prezident İlham Əliyev tərəfindən uğurla həyata keçirilməsi nəticəsində ən yüksək zirvələr fəth edir.

Azərbaycan.-2011.-21 sentyabr.-S.6.