Qafqaz Müsəlmanları İdarəsinin
sədri Mədinədə keçirilmiş «Təkfir amili fenomeni» adlı beynəlxalq konfransda
iştirak etmişdir
Sentyabrın 20-21-də Səudiyyə
Ərəbistanı Krallığının Mədinə
şəhərində "Təkfir amili fenomeni" adlı
beynəlxalq konfrans keçirilmişdir. Azərbaycanın Səudiyyə
Ərəbistanındakı səfirliyindən AzərTAc-a
bildirmişlər ki, konfransda ölkəmizi Qafqaz Müsəlmanları
İdarəsinin sədri Şeyxülislam Allahşükür
Paşazadənin rəhbərlik etdiyi nümayəndə heyəti
təmsil etmişdir.
İki Müqəddəs Ocağın xadimi Kral Abdullah bin Əbdüləziz Al Saud və Səudiyyə Ərəbistanı Baş nazirinin ikinci müavini, daxili işlər naziri Əmir Naif bin Əbdüləziz Al Saudun təşəbbüsü ilə keçirilən konfransda müsəlman dövlətlərinin dini işlər və vəqflər nazirləri, müftilər və dini icma rəhbərləri, tanınmış din xadimləri iştirak etmişlər.
Konfrans çərçivəsində A.Paşazadə İSESKO-nun baş direktoru Əbdüləziz bin Osman əl-Tüveycri, Türkiyə və Küveytin dini işlər və vəqflər nazirləri, Livan müftisi ilə görüşlər keçirmişdir. Görüşlərdə ikitərəfli əməkdaşlıq, qarşılıqlı səfərlər və informasiya mübadiləsi məsələləri müzakirə olunmuşdur.
Əmir Naif bin Əbdüləziz Al Saud ilə görüşdə şeyxülislam Səudiyyə Ərəbistanının rəhbərliyinə Azərbaycan Prezidenti İlham Əliyevin salamlarını çatdırmışdır. Baş nazirin ikinci müavini də onun salamlarını dövlətimizin başçısına çatdırılmasını xahiş etmiş, ölkəsinin Azərbaycan ilə ikitərəfli əməkdaşlığın inkişafına xüsusi diqqət yetirdiyini vurğulamışdır.
O qeyd etmişdir ki, Səudiyyə Ərəbistanı Ermənistan-Azərbaycan, Dağlıq Qarabağ münaqişəsi ilə bağlı Azərbaycanın haqlı mövqeyini daim dəstəkləyəcəkdir.
İSESKO-nun
baş direktoru ilə keçirilmiş görüşdə
Azərbaycanın birinci xanımı, Heydər Əliyev
Fondunun Prezidenti, YUNESKO-nun və İSESKO-nun xoşməramlı
səfiri, Milli Məclisin deputatı Mehriban Əliyevanın fəaliyyəti
yüksək qiymətləndirilmişdir. Səfər çərçivəsində
azərbaycanlı zəvvarların builki həcc ziyarəti ilə
bağlı məsələlər də müzakirə
edilmişdir.
Azərbaycan.-2011.-23 sentyabr.-S.6.