Azərbaycan ilə Hindistan xarici işlər nazirlikləri arasında siyasi məsləhətləşmələr

Azərbaycan Respublikası ilə Hindistan Respublikası xarici işlər nazirlikləri arasında siyasi məsləhətləşmələr keçirilmişdir.

XİN-in mətbuat xidmətindən AzərTAc-a bildirmişlər ki, Azərbaycan nümayəndə heyətinə xarici işlər nazirinin müavini Xələf Xələfov, qarşı tərəfdən isə ölkəmizdə rəsmi səfərdə olan Hindistanın xarici siyasət idarəsinin Şərq ölkələri üzrə dövlət katibi Sanjay Sinq başçılıq etmişlər.

Tərəflər müxtəlif istiqamətlərdə, xüsusilə də, siyasi, ticarət, iqtisadi, neft-kimya, kənd təsərrüfatı, əczaçılıq, mədəni, humanitar, təhsil və enerji sahələrində əlaqələrin genişləndirilməsində maraqlı olduqlarını bildirmişlər. Görüşdə, həmçinin qarşılıqlı maraq doğuran regional və beynəlxalq məsələlərə dair fikir mübadiləsi aparılmışdır.

X.Xələfov Ermənistan-Azərbaycan, Dağlıq Qarabağ münaqişəsi və onun nizamlanması prosesi barədə Hindistan tərəfinə ətraflı məlumat vermişdir. Nazir müavini Azərbaycanın Hindistan ilə əlaqələrə önəm verdiyini və mövcud münasibətlərin daha da genişləndirilməsinin vacibliyini vurğulayaraq parlamentlərarası əməkdaşlığın ikitərəfli əlaqələrin inkişafında mühüm rol oynadığını qeyd etmişdir. X.Xələfov parlamentlərarası dostluq qruplarının qarşılıqlı səfərlərinin təşkilinin faydalı olacağını demişdir.

Hindistanın Azərbaycanın suverenliyini və ərazi bütövlüyünü dəstəklədiyini bir daha təsdiq edən S.Sinq respublikamızın müstəqillyinin bərpa edilməsinin 20-ci ildönümü münasibətilə Hindistan hökumətinin təbriklərini çatdırmışdır.

Tərəflər 2012-ci ildə ölkələrimiz arasında diplomatik əlaqələrin qurulmasının 20 illiyi münasibətilə hər iki ölkədə birgə silsilə tədbirlərin keçirilməsi məsələsini müzakirə etmişlər. Bununla yanaşı, qarşılıqlı olaraq mədəniyyət günlərinin, o cümlədən kinofestivalların təşkili ilə bağlı fikir mübadiləsi aparılmışdır.

Məsləhətləşmələrdə informasiya və kommunikasiya texnologiyaları sahəsində əməkdaşlığın qurulması məsələsi, cari ilin noyabrında Bakıda keçirilməsi nəzərdə tutulan hökumətlərarası birgə komissiyanın növbəti iclasının gündəliyi müzakirə olunmuşdur. Eyni zamanda, ölkələrimiz arasında müqavilə hüquq bazasanın genişləndirilməsi məqsədilə müzakirə mərhələsində olan ikitərəfli sənədlərin razılaşdırılmasının tezləşdirilməsinə dair razılıq əldə edilmişdir.

Tərəflər iqtisadi-ticarət əlaqələrinin daha da inkişaf etdirilməsi məqsədilə ölkələrimiz arasında sərmayələrin təşviqi və qorunması, eyni zamanda, ikiqat vergitutmanın aradan qaldırılmasına dair saziş layihələrinin tezliklə razılaşdırılması, biznes forum və simpoziumların təşkili istiqamətində işlərin davam etdirilməsi və s. məsələləri müzakirə etmişlər. Həmçinin Şimal-Cənub nəqliyyat dəhlizinin inkişaf etdirilməsi istiqamətində səylərin artırılması və müvafiq tədbirlərin həyata keçirilməsi məqsədəuyğun hesab olunmuşdur.

Azərbaycan.-2011.-25 sentyabr.-S.7.