Azərbaycan Dağlıq Qarabağda keçirilmiş «bələdiyyə seçkiləri» ilə bağlı Xarici İşlər Nazirliyinin bəyanatını BMT Baş Məclisinin gündəliyinə daxil etmək üçün müraciət etmişdir

Azərbaycan işğal olunmuş Dağlıq Qarabağ bölgəsində "yerli özünü idarəetmə orqanlarına" qondarma "seçkilər" məsələsini sentyabrın 18-də BMT Baş Məclisində keçirilmiş sessiyada qaldırmışdır.

Azərbaycanın BMT-dəki daimi nümayəndəsi, səfir Aqşin Mehdiyev BMT-nin baş katibinə məktubunda, Azərbaycanın Xarici İşlər Nazirliyinin bəyanatını Baş Məclisin və Təhlükəsizlik Şurasının gündəliyinə daxil etməyi xahiş etmişdir.

Qeyd edək ki, Baş Məclisin gündəliyinə "GUAM ərazisində həlli uzadılmış münaqişələr və onların beynəlxalq sülhə, təhlükəsizliyə və inkişafa təsiri", "Azərbaycanın işğal olunmuş ərazilərində vəziyyət" və "İrqçilik, irqi ayrı-seçkiliyin, ksenofobiyanın və dözümsüzlüyün aradan qaldırılması" məsələləri daxildir.

Məktubda vurğulanır: "Azərbaycan bir daha bəyan edir ki, Azərbaycanın işğal olunmuş ərazilərində mövcud olan tanınmamış separatçı rejim Ermənistanın bu əraziləri azərbaycanlı əhalidən etnik təmizləməsi əsasında yaratdığı qanunsuz qurumdan başqa heç nəyi təmsil etmir. Qondarma "seçkilər" də Ermənistanın qəsbkarlıq siyasətini və Azərbaycanın beynəlxalq səviyyədə tanınmış ərazilərində davam edən işğalı nəticələrini pərdələmək üçün keçirilmişdir. Azərbaycan Ermənistan tərəfini pozucu, qanunsuz addımları dayandırmağa çağırır. Çünki bu addımların heç bir perspektivi yoxdur. Bunun yerinə Ermənistan xoş niyyət göstərməli, münaqişənin davamlı və tez həllini tapmaq üçün danışıqlar prosesində konstruktiv mövqe tutmalı və beynəlxalq hüququn normalarına və prinsiplərinə əməl etməlidir".

AzərTAc

Azərbaycan.-2011.-25 sentyabr.-S.7.