Yozef Debona QREX: Gündən-günə gözəlləşən Bakı və onun gülərüz insanları hər bir qonaqda xoş təəssürat yaradır

Dövlət müstəqilliyinin bərpasının 20-ci ildönümü münasibətilə Azərbaycan xalqını təbrik edirəm. Azərbaycan bu 20 ildə böyük inkişaf yolu keçmiş, iqtisadiyyatda tərəqqi əldə etmişdir.

AzərTAc xəbər verir ki, bu sözləri Bakıda keçirilən Azərbaycan Respublikasının dövlət müstəqilliyinin iyirminci ildönümü ilə bağlı beynəlxalq bayram tədbirində iştirak edən AŞ PA-nın Maltadan olan üzvü Yozef Debona Qrex demişdir.

Ölkəmizdə altıncı dəfə səfərdə olduğunu qeyd edən AŞ PA-nın üzvü vurğulamışdır ki, Azərbaycanın əldə etdiyi nailiyyətlər, beynəlxalq aləmdə qazandığı uğurlar çox sevindiricidir.

"Həqiqətən də böyük nailiyyətlər əldə etmisiniz. Gündən-günə gözəlləşən şəhərləriniz və gülərüz insanlarınız hər bir qonaqda xoş təəssürat yaradır" - deyə Y.Debona Qrex bildirmişdir.

Maltadan olan qonaq ölkəsinin Azərbaycan ilə hərtərəfli əməkdaşlığının və dostluq əlaqələrinin bundan sonra da inkişaf edəcəyinə əminliyini vurğulamışdır.

Azərbaycan.-2011.-25 sentyabr.-S.7.