Azərbaycan Ermənistan-Azərbaycan, Dağlıq Qarabağ münaqişəsinin beynəlxalq hüququn normaları və prinsipləri çərçivəsində, beynəlxalq təşkilatların müvafiq sənədləri və qərarları əsasında sülh yolu ilə həllinə tərəfdardır

Azərbaycanın Xarici İşlər Nazirliyinin mətbuat xidmətindən AzərTAc-a bildirmişlər ki, nazir Elmar Məmmədyarov BMT Baş Məclisinin 66-cı sessiyası çərçivəsində İslam Əməkdaşlığı Təşkilatının (İƏT) üzvü olan ölkələrin xarici işlər nazirlərinin illik əlaqələndirmə görüşündə çıxış etmişdir.

Nazir qeyd etmişdir ki, hazırda tarixi əhəmiyyəti sosial, mədəni və siyasi proseslərdə baş verən ziddiyyətlərlə xarakterizə olunan bir zaman yaşanır: "Analitik mühakimə bəzən proseslərin dinamikasından geridə qalır. Qloballaşan dünyamız sürətlə dəyişir. Bunun davamı olaraq, dünya nizamı və beynəlxalq münasibətlər sistemi də dəyişir. Bu günlərdə dünyanın müxtəlif regionlarında baş vermiş siyasi hadisələr istənilən regionun geosiyasi vəziyyətini dəyişməyə qadirdir. Bu hadisələr elə sürətlə baş verir ki, güclü ölkələr də buna mane ola bilmir və bu, qloballaşmanın özüdür".

Dünyada geosiyasi proseslərə çox həssas olan bir sıra regionların olduğunu deyən E.Məmmədyarov vurğulamışdır ki, Yaxın və Orta Şərq ölkələrində baş verən sonuncu siyasi proseslər beynəlxalq ictimaiyyətə sülh və sabitliyin necə kövrək olduğunu nümayiş etdirdi. Azərbaycan bütün üzv ölkələri islam dünyasında baş verən münaqişələrin həlli istiqamətində göstərilən səyləri beynəlxalq hüququn normalarına və prinsiplərinə əsasən davam etdirməyə təşviq edir. Bizim Fələstindəki vəziyyətlə bağlı narahatlığımız davam edir. Azərbaycan qardaş Fələstin xalqına sülh və sabitliyə nail olunması, paytaxtı Şərqi Qüds olmaqla, suveren və müstəqil Fələstin dövlətinin yaradılması istiqamətində atdığı addımları dəstəklədiyini bir daha bəyan edir və Fələstinin BMT-nin tam hüquqlu üzv olmaq istəyini tam dəstəkləyir".

Nazir Azərbaycanın Somalidəki humanitar vəziyyətlə bağlı narahatlıq keçirdiyini də qeyd etmişdir: "Dəhşətli aclıq və quraqlığın ölkə ərazisinin böyük hissəsini əhatə etməsi nəticəsində on minlərlə insan həyatını itirmiş və yüz minlərlə Somali vətəndaşı kütləvi şəkildə qonşu ölkələrə köçmüşdür. BMT-nin sonuncu hesabatlarına görə, 12 milyon insan hələ də böhran içərisindədir və 750 min insan ölüm riski ilə üz-üzədir. Bu, bəşəriyyətin son 100 ildə üzləşdiyi və presedenti olmayan bir faciədir. Bununla əlaqədar, biz, İƏT-in və müsəlman ölkələrin Somalidəki humanitar fəlakətin qarşısının alınması üçün zəruri olan yardımın təmin edilməsi istiqamətində tam potensialını reallaşdırmalıyıq. Azərbaycan bu qardaş ölkəyə artıq humanitar yardım göstərmişdir".

E.Məmmədyarov bildirmişdir ki, BMT Təhlükəsizlik Şurasında (TŞ) islahatların aparılması bütün üzv ölkələri ciddi narahat edən bir məsələdir: "İƏT-in BMT TŞ-də təmsil olunmağa və müsəlman ölkələrin maraqlarını müdafiə etmək üçün legitim tələb irəli sürməyə haqqı vardır. Biz TŞ-nin üzv ölkələr üçün daha təmsilçi, demokratik, səmərəli, şəffaf və məsul bir quruma çevrilməsi üçün hərtərəfli islahatların aparılmasını dəstəkləyirik. Bununla əlaqədar, hörmətli həmkarlarımı məlumatlandırıram ki, Azərbaycan BMT Baş Məclisinin 66-cı sessiyası zamanı keçiriləcək seçkilərdə 2012-2013-cü illər üçün BMT TŞ-nin qeyri-daimi üzvlüyünə öz namizədliyini irəli sürmüşdür. İƏT-in BMT TŞ-də təmsilçiliyinin olması zərurətindən çıxış edərək, üzv ölkələrin Azərbaycana davamlı dəstəyinə güvənirik".

Nazir Ermənistan-Azərbaycan, Dağlıq Qarabağ münaqişəsinin nizamlanmasında Azərbaycanın haqlı mövqeyini dəstəklədikləri üçün İƏT üzvlərinə təşəkkürünü bildirmişdir: "Ermənistanın Azərbaycana hərbi təcavüzü ilə bağlı İƏT tərəfindən qəbul edilmiş çoxsaylı qərar və qətnamələr, eyni zamanda, İƏT-in üzvü olan ölkələrin dəstəyi beynəlxalq ictimaiyyətin, xüsusilə də BMT Baş Məclisinin və TŞ-nin Azərbaycanın işğal olunmuş əraziləri ilə bağlı mövqeyinin formalaşmasında mühüm rol oynamışdır. Azərbaycan hökuməti bu uzun sürən münaqişənin beynəlxalq hüququn normaları və prinsipləri çərçivəsində, BMT TŞ və İƏT qətnamələrinin yerinə yetirilməsi, eyni zamanda, ATƏT, Avropa Şurası və Avropa Parlamenti tərəfindən qəbul edilmiş müvafiq sənədlər və qərarlar əsasında sülh yolu ilə həllinə sadiq qalır".

Azərbaycan.-2011.-27 sentyabr.-S.6.