«Xəzər həftəsi»nə məktəblilər də qatılıb

Beynəlxalq Dəniz Günü ilə əlaqədar ölkəmizdə "Xəzər həftəsi"nin qeyd olunması məqsədilə Ekologiya və Təbii Sərvətlər Nazirliyi müvafiq tədbirlər keçirir.

"Xəzər həftəsi"nə ETSN dünən start verib. Tədbirlər sentyabrın 30-dək davam edəcək. Bu günlərdə respublikanın bir sıra orta təhsil müəssisələrində "Mavi Xəzərimiz" mövzusunda lektoriyalar təşkil olunmaqla müxtəlif kütləvi, maarifləndirici tədbirlər keçiriləcək. Nazirliyin nümayəndələrinin iştirak etdiyi tədbirlərdə su hövzələrinin zənginliyi, eyni zamanda onun resurslarının qorunmasının vacibliyi, Xəzərin ekoloji problemlərinin həlli istiqamətində görülmüş işlər barədə şagirdlərə məlumatlar verilir.

Beynəlxalq Dəniz Günü ilə əlaqədar keçiriləcək tədbirlər dənizin ekoloji cəhətdən saflığının və davamlılığının qorunmasına, onun sərvətlərinin mühafizə olunmasına, eyni zamanda ictimaiyyətin maarifləndirilməsinə yönəldilib.

Məlumatı nazirliyin mətbuat xidmətindən almışıq.

Azərbaycan.-2011.-27 sentyabr.-S.6.