«Azərbaycan Respublikasında maliyyə nəzarəti sisteminin təkmilləşdirilməsində Dövlət Maliyyə Nəzarəti Xidmətinə dəstək» layihəsinin təqdimatı olmuşdur

Sentyabrın 28-də "Azərbaycan Respublikasında maliyyə nəzarəti sisteminin təkmilləşdirilməsində Dövlət Maliyyə Nəzarəti Xidmətinə dəstək" layihəsinin təqdimatı olmuşdur.

AzərTAc xəbər verir ki, Avropa İttifaqının (Aİ) ölkəmizdəki nümayəndəliyinin, Almaniyadakı Tvinninq layihələri üzrə milli əlaqələndiricisi və Almaniyanın Azərbaycandakı səfirliyinin təmsilçiləri layihənin məqsəd və səmərəsi barədə məlumat vermiş, bu işdə tərəflərin rolundan danışmışlar.

Maliyyə nazirinin müavini Azər Bayramov layihə barədə məlumat verərək bildirmişdir ki, məqsəd qabaqcıl Avropa təcrübəsinə və beynəlxalq səviyyədə tanınmış standartlara uyğun olaraq Dövlət Maliyyə Nəzarəti sisteminin inkişafında Azərbaycan idarəçiliyinə dəstək verməkdir. Layihənin tərəfdaşları Azərbaycan və Estoniya Maliyyə nazirliklərinin mütəxəssisləri və Almaniya Federal Maliyyə Nazirliyidir. Layihənin dəyəri 800 min avro olmaqla, 18 ay müddətinə Avropa İttifaqı tərəfindən maliyyələşdirilir.

Avropa İttifaqı "Şərq Tərəfdaşlığı" proqramı çərçivəsində Azərbaycana hər zaman dəstək göstərməyə hazırdır - deyən Aİ-nin Azərbaycandakı nümayəndəliyinin şöbə rəhbəri Jerome Pons ölkəmizdə bir sıra layihələrin həyata keçirildiyini demişdir. Bildirmişdir ki, Avropa İttifaqı 2012-ci ilədək Azərbaycana büdcəyə dəstək yönümlü 100 milyon avro investisiya yatıracaqdır. Azərbaycanın Tvinninq layihələrinə 2006-cı ildən indiyədək 7 milyon avro xərclənmişdir. Hazırda Aİ-nın Azərbaycanda 10 layihəsi icra olunur və 6 layihənin sənədləri hazırlanır. Layihələr əsasən Vergilər, Təhsil, Kənd Təsərrüfatı nazirlikləri və müxtəlif dövlət komitələrində həyata keçirilir.

Almaniya Federativ Respublikasının İqtisadiyyat və Texnologiyalar Nazirliyinin milli əlaqələndiricisi Bernd Şumaxer vurğulamışdır ki, ölkəsi Azərbaycanda 14 Tvinninq layihəsinə qatılmaq üçün tenderdə iştirak edir.

Tədbirdə layihənin komponentlərinin izahı, obyekti və s. mövzularda təqdimatlar olmuşdur.

Azərbaycan.-2011.-29 sentyabr.-S.6.