Beynəlxalq Mətbuat İnstitutunun Dünya Konqresinin iştirakçılarına Azərbaycanda mətbuatın vəziyyəti barədə məlumat verilmişdir

Beynəlxalq Mətbuat İnstitutunun təşəbbüsü ilə Tayvanın paytaxtı Taypeydə "Asiyada media əsri" mövzusunda keçirilən Dünya Konqresi yekunlaşmışdır.

Mətbuat Şurasından (MŞ) AzərTAc-a bildirmişlər ki, Azərbaycanın media nümayəndələrinin də iştirak etdiyi tədbirin ikinci günündə Şura sədri Əflatun Amaşov çıxış edərək ölkəmizdə medianın vəziyyəti, MŞ-nin fəaliyyəti barədə iştirakçılara ətraflı məlumat vermişdir. Şuranın başlıca missiyasının media-ictimaiyyət, media-hakimiyyət münasibətlərinin tənzimlənməsi olduğunu bildirən Ə.Amaşov vurğulamışdır ki, MŞ bəzi mühüm qanunvericilik təşəbbüsləri ilə də çıxış etmişdir.

Konqresin sessiyaları çərçivəsində aparılan müzakirələrdə jurnalist təhlükəsizliyinin müxtəlif istiqamətləri, KİV-də yeni texnologiyaların tətbiqi, yeni medianın xarakterik cəhətləri, medianın böhranlı situasiyalarda biznes strukturu kimi qalması yollarının müəyyənləşdirilməsi və s. məsələlər ətrafında fikir mübadiləsi aparılmışdır. Azərbaycan nümayəndə heyəti ABŞ, Avstriya, Finlandiya və digər ölkələrin nüfuzlu KİV nümayəndələri ilə görüşmüş, ölkəmizdə mətbuatın hazırkı vəziyyəti barədə ətraflı məlumat vermişdir.

Azərbaycan.-2011.-30 sentyabr.-S.2.