Ermənistanın qeyri-konstruktiv hərəkətləri BMT Baş Məclisinin 66-cı sessiyasında narazılığa səbəb olmuşdur

BMT Baş Məclisinin 66-cı sessiyasının ümumi müzakirələri çərçivəsində Azərbaycanın xarici işlər naziri Elmar Məmmədyarovun çıxışına Ermənistanın BMT yanında daimi nümayəndəsi cavab vermək hüququndan istifadə edərək ölkəsinin təcavüzkar siyasətinə bəraət qazandırmağa cəhd göstərmişdir.

Azərbaycanın BMT yanında Daimi Nümayəndəliyindən AzərTAc-a bildirmişlər ki, öz növbəsində söz alan Azərbaycan nümayəndə heyəti Ermənistan tərəfinin yersiz və əsassız şərhlərinin BMT Nizamnaməsini və beynəlxalq hüquq üzrə götürdüyü öhdəlikləri kobud şəkildə pozduğunun və qeyri-konstruktiv mövqeyinin bariz nümunəsi olduğunu vurğulamışdır.

BMT-nin üzvü olan dövlətlərin nümayəndələrinin diqqətinə çatdırılmışdır ki, Azərbaycana qarşı təcavüz edən, kütləvi şəkildə etnik təmizləməni həyata keçirən, münaqişə zamanı digər ağır cinayətlər törədən və açıq şəkildə ayrı-seçkilik ideologiyasını təbliğ edən Ermənistanın bu siyasətin qurbanı olan Azərbaycana qarşı çıxış etmək haqqı yoxdur. Ermənistanın xalqların öz müqəddəratını təyinetmə hüququ kimi təqdim etdiyi hərəkətlər BMT Təhlükəsizlik Şurası və Baş Məclisi, eləcə də digər beynəlxalq təşkilatlar tərəfindən Azərbaycanın suverenliyinə və ərazi bütövlüyünə qarşı qanunsuz güc tətbiqetmə, BMT Nizamnaməsi və beynəlxalq hüququn normalarının və prinsiplərinin kobud şəkildə pozulması kimi qiymətləndirilmişdir.

Həmçinin vurğulanmışdır ki, işğal olunmuş Azərbaycan ərazilərində Ermənistan tərəfindən yaradılmış və ona tabe olan separatçı qurumun qeyri-qanuniliyi beynəlxalq səviyyədə dəfələrlə təsdiq edilmişdir. Öz ərazisində və işğal edilmiş Azərbaycan torpaqlarında etnik təmizləmə siyasətini həyata keçirərək, monoetnik cəmiyyətin yaradılmasına nail olan Ermənistan rəhbərliyinin suveren dövlətlərdən etnik qrupların birtərəfli qaydada ayrılması məsələsini qaldırmaq haqqı ümumiyyətlə yoxdur. Son vaxtlar cəbhə xətti boyunca Azərbaycanın vətəndaşlarına və mülki obyektlərinə qarşı artmış hücumlar və Ermənistan rəhbərliyinin tarixi saxtalaşdırma, münaqişənin səbəblərinə və nizamlama prosesinə dair təhriflərlə dolu bəyanatlar Ermənistan siyasətinin bölgədə sülhə, təhlükəsizliyə və sabitliyə qarşı təhdid yaratdığını nümayiş etdirir.

Bildirilmişdir ki, Ermənistan bu cür təxribat siyasəti ilə öz məqsədinə heç vaxt çatmayacaq və son nəticədə Azərbaycan ərazilərinin işğalına və qonşu dövlətlərə qarşı ərazi iddialarına son qoymağa və bölgədə yerləşən ölkələrlə sivil münasibətlər qurmağa məcbur olacaqdır.

Ermənistan səfiri Azərbaycan nümayəndə heyətinin ədalətli şərhlərinə cavab tapmayaraq, onların faktiki olaraq əsaslı olduğunu qəbul etmək məcburiyyətində qalmışdır. Eyni zamanda, Ermənistan tərəfinin BMT Baş Məclisinin ümumi müzakirələrində qeyri-konstruktiv hərəkətləri üzv dövlətlərin haqlı narazılığına və Azərbaycana münasibətdə həmrəyliyin açıq şəkildə nümayişinə səbəb olmuşdur.

Azərbaycan.-2011.-30 sentyabr.-S.5.