Azərbaycanın çoxşaxəli iqtisadiyyatının yüksəlişi davam edir

Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclasında bu barədə ətraflı danışılmışdır

Gündən-günə inkişaf edib güclənən, regionun və dünyanın enerji təhlükəsizliyində mühüm yer tutan Azərbaycanın uğurlu siyasi-iqtisadi və sosial strategiyasının əsası ümummilli lider Heydər Əliyev tərəfindən qoyulmuşdur. Bu strategiya ölkəmizin müstəqilliyinin möhkəmlənməsində, təhlükəsizliyinin etibarlı şəkildə təmin olunmasında, zəngin və qüdrətli dövlətə çevrilməsində böyük rol oynadı. Bu strategiya əsasında heç bir sahə unudulmadan paralel şəkildə irəliyə aparılır. Cəmiyyətin dinamik inkişafının birinci təməli sabitlikdir. Bunu təmin edən Azərbaycan qlobal böhran şəraitində belə, inamla addımlayır, qarşıya qoyulan bütün iqtisadi və sosial proqramları uğurla həyata keçirir, çoxşaxəli iqtisadiyyatını inkişaf etdirir.

Hazırda ölkəmizin nəinki Qafqazda, dünyada söz sahibi olduğunu ən güclü dövlətlər də etiraf edir, bu təkamülün təməlində düşünülmüş, düzgün, elmi əsaslara söykənən strategiyanın olduğunu bildirirlər. Regionda həyata keçirilən bütün qlobal layihələr Azərbaycanın iştirakı ilə reallaşır, onun coğrafi mövqeyi nəzərə alınır, praqmatik iqtisadi islahatlarından yararlanırlar. Bir çox qlobal əhəmiyyətli layihələrin reallaşması üçün ilk növbədə, məhz Azərbaycandan razılıq alınır. Azərbaycanın güclü sənaye potensialı var. Onların çoxunun bünövrəsini ulu öndər Heydər Əliyev qoymuş, bir neçəsinin təməlqoyma mərasimində şəxsən iştirak etmişdi. Bir neçə sənaye müəssisələri də yenidən bərpa edilmiş, indi bu cür yüngül və ağır sənaye müəssisələrində ən müasir texnologiyalardan istifadə olunur.

Təkcə 2010-cu ildə ölkə iqtisadiyyatının inkişafına 15,5 milyard vəsait qoyulmuşdur. Ən sevindirici nəticə isə odur ki, daxili investisiyalar xarici investisiyaları üstələyir. Yanvarın 14-də Prezident İlham Əliyevin sədrliyi ilə Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclasında dövlət başçısı bu məsələlərə xüsusilə toxundu: "Artıq birinci il deyil ki, bu belədir. Bu onu göstərir ki, həm dövlət tərəfindən, həm də özəl sektor tərəfindən ölkə iqtisadiyyatına böyük məbləğdə investisiyalar qoyulur. Qeyri-neft sektoruna qoyulan investisiyalar neft sektorundakından çoxdur. 15,5 milyard dollardan 9,3 milyard dolları qeyri-neft sektoruna qoyulan sərmayədir. Bu da bizim siyasətimizin əsas istiqamətidir. Ölkə iqtisadiyyatının neft sektorundan asılılığını azaltmaq üçün əməli-praktik tədbirlər görülür. Bu da onu göstərir ki, bir neçə il bundan əvvəl bəyan etdiyimiz proqram və konseptual yanaşmamız həyatda öz əksini tapır..."

Dövlət başçısının qeyd etdiyi kimi, 2010-cu ildə nəzərdə tutulan bütün sosial proqramlar icra edilib. Minimum əməkhaqqı və pensiyaların baza hissəsi 75 manatdan 85 manata qaldırıldı, ünvanlı sosial yardım proqramı həyata keçirildi.

Sosial infrastrukturun yaradılmasında böyük işlər görülmüşdür. 40-dan çox tibb müəssisəsi, 70-dən çox məktəb tikilmiş, təmir edilmişdir. Ölkənin inkişafı üçün vacib olan sahə diqqət mərkəzindədir və gələcəkdə də sosialyönümlü layihələrin həyata keçirilməsi nəzərdə tutulur.

Regionların inkişaf proqramı uğurla icra edilir. Keçən il 70 mindən çox iş yeri açılmışdır ki, onun 53 mini daimidir. İş yerlərinin açılması, yeni müəssisələrin yaradılması, eyni zamanda, ölkə daxilində istehsalın artması deməkdir.

Ötən il nəqliyyat sektoruna da böyük investisiyalar qoyulmuşdur. Ölkədə avtomobil yolları tikilir, körpülər salınır.

İnformasiya və kommunikasiya texnologiyalarının əhəmiyyətinin gündən-günə artdığı qloballaşan dünyada Azərbaycan rabitəsinin müasir dövrün tələblərinə uyğun qurulması da ümummilli lider Heydər Əliyevin adı ilə bağlıdır. Bu strategiyadan irəli gələn vəzifələr Prezident İlham Əliyevin rəhbərliyi ilə uğurla həyata keçirilir. Azərbaycanın rabitə texnologiyaları dünya standartlarına uyğundur. Bu strategiyanın məntiqi davamı olaraq ölkə başçısı tərəfindən Azərbaycan Respublikasında rabitə və informasiya texnologiyalarının inkişafı üzrə 2010-2012-ci illər üçün Dövlət Proqramı təsdiq edilmişdir. Ölkəmiz doğrudan da, bu gün rabitəsilə ilə öyünməyə haqlıdır.

Ayrı-ayrılıqda hər hansı bir sahəyə müraciət etsək, o sahənin son bir neçə ildə, xüsusən, 2010-cu ildə dinamik inkişafının şahidi olarıq. Bütün bunlar onu deməyə əsas verir ki, Azərbaycanın regionda analoqu olmayan inkişaf mərhələsinə qədəm qoyması, büdcə gəlirlərinin ildən-ilə nəzərəçarpacaq dərəcədə çoxalması iqtisadi-soial sahələrdə islahatların genişləndirilməsinə, daha qlobal layihələrin icrasına şərait yaradır.

Azərbaycan.- 2011.- 16 yanvar.- S. 1.