Stanford Universitetində Azərbaycana həsr olunmuş seminar keçirilmişdir

ABŞ-ın aparıcı ali təhsil müəssisələrindən biri sayılan Stanford Universitetində (Kaliforniya ştatı) Azərbaycana həsr olunmuş seminar keçirilmişdir. Regiondakı vəziyyətlə bağlı müzakirələrdə Stanford Universitetinin professoru Geyl Lapidus və Azərbaycanın Los-Ancelesdəki baş konsulu Elin Süleymanov iştirak etmişlər. ABŞ-ın milli maraqları baxımından Azərbaycanın rolunu xüsusi vurğulayan professor G.Lapidus Vaşinqtonun Cənubi Qafqaza kifayət qədər diqqət yetirməsindən təəssüfləndiyini bildirmişdir.

Baş konsul E.Süleymanov Azərbaycan dövlətçiliyinin tarixindən, Şərqdə və müsəlman dünyasında ilk demokratik respublikanın təşəkkülündən, Azərbaycan cəmiyyətində bərqərar olmuş tolerantlıq və şəffaflıq ənənələrindən danışmış, eyni zamanda, bəzi xarici qüvvələrin ölkədə ictimai dialoqu radikallaşdırmağa cəhd göstərdiyini bildirmişdir. Diplomat cəmiyyətdə sosial və siyasi proseslərin kənar müdaxilə olmadan inkişafının əhəmiyyətini vurğulamış, bəzi KİV-lərin regiondakı vəziyyəti səthi, düşünülməmiş, hərdən isə qərəzli işıqlandırmaqla ziyan vurduğunu xatırlatmışdır.

Müstəqil inkişafın Azərbaycan cəmiyyəti xüsusi əhəmiyyət daşıdığını, ölkə rəhbərliyi üçün isə öncül istiqamət olduğunu deyən baş konsul demişdir ki, Azərbaycan vətəndaşlarının ölkənin müstəqilliyi uğrunda fədakarlığının rəmzi 1990-cı il 20 Yanvar faciəsidir. SSRİ-nin dağılması prosesi məhz 1990-cı ilin yanvarında aşkar və dönməz xarakter almışdır. Diplomat bildirmişdir ki, Avrasiya ölkələrinin çoxu öz müstəqilliyini möhkəmləndirməyə çalışdığı bir vaxtda Yerevanın təcavüzkar etno-millətçilik yolu tutması nəticəsində Ermənistan, əksinə, xarici qüvvələrdən asılılığını dərinləşdirir. Xarici hərbi bazaların uzunmüddətli əsasda Ermənistan ərazisində yerləşməsi, eləcə də ölkənin iqtisadi infrastrukturunun dəyər-dəyməzinə satılması bunu təsdiq edir.

Azərbaycan diplomatının fikrincə, ötən əsrin 90-cı illərində ABŞ region ölkələri ilə tərəfdaşlıq münasibətləri qurmaq üçün məqsədyönlü siyasət yeritmişdir. Həmin dövrdə regionun inteqrasiyasında və enerji ixrac infrastrukturunun yaradılmasında xeyli tərəqqi əldə edilmişdir. Son vaxtlar Vaşinqtonun regiona münasibətdə bir qədər fəallaşmasına baxmayaraq, Amerika tərəfinin yanaşması dəqiq düşünülmüş strategiyanı hələ də əks etdirmir. Məsələn, ABŞ Ermənistan-Azərbaycan, Dağlıq Qarabağ münaqişəsinin həlli prosesinin daha fəal iştirakçısı ola bilər və olmalıdır. Ermənistan tərəfinin günahı üzündən 20 ildən çox davam edən bu münaqişə bütün regionun gələcəyi üçün təhlükədir. Təcrübə göstərir ki, belə münaqişələrin həll olunmaması ABŞ-ın özünün mənafelərinə xeyli ziyan vura bilər. Üstəlik, daxili-siyasi fikir ayrılıqları üzündən Bakıya səfirin təyin olunmasında yaranmış fasilənin bir ildən çox çəkməsi fonunda ABŞ-ın regional strategiyasından danışmaq da çətindir. Düzdür, ABŞ Prezidenti Obamanın Senatdakı prosedurdan yan keçərək, Stanford Universitetinin və Fletçer adına Diplomatiya və Hüquq Mərkəzinin məzunu Mətyu Brayzəni səfir təyin etməsi nəticəsində vəziyyət bir qədər dəyişmişdir.

Enerji resurslarının dünya bazarlarına daşınması marşrutlarının şaxələndirilməsi siyasətinə Bakının sadiq qaldığını və Avropanın enerji təhlükəsizliyinə Azərbaycanın töhfəsini vurğulayan baş konsul avropalı tərəfdaşların bu istiqamətdə fəallaşacağına ümidvar olduğunu bildirmişdir. ATƏT-in bu yaxınlarda Astanada keçirilmiş zirvə görüşünə toxunan Azərbaycan diplomatı regionun vaxtı çatmış problemlərinin həllinə yaxınlaşmaq istiqamətində daha bir imkanın əldən verilməsindən təəssüfləndiyini bildirmişdir.

AzərTAc

Azərbaycan.- 2011.- 16 yanvar.- S. 3.