Dövlət Dəniz Administrasiyasında 20 Yanvar şəhidlərinin xatirəsi anıldı

Azərbaycan Respublikası Dövlət Dəniz Administrasiyasında 20 Yanvar faciəsinin 21-ci ildönümünə həsr olunmuş toplantı keçirilmişdir. Tədbirin əvvəlində 20 Yanvar şəhidlərinin əziz xatirəsi bir dəqiqəlik sükutla yad olunmuşdur. Dövlət Dəniz Administrasiyasının rəisi Qüdrət Qurbanov çıxış edərək bildirmişir ki, 20 Yanvar həm hüzn günü, həm də Azərbaycanın azadlıq və ərazi bütövlüyü uğrunda mübarizə tarixinə qəhrəmanlıq salnaməsi kimi daxil olmuşdur. 1990-cı il yanvar ayının 19-dan 20-nə keçən gecə o vaxtkı sovet qoşunlarının tərkibində çoxlu sayda ermənilərin də iştirakı ilə Azərbaycan xalqına qarşı qanlı terror hadisəsi törədilmişdir. Bu qanlı hadisəyə həyatını təhlükə qaraşısında qoyaraq, ilk olaraq öz kəskin münasibətini bildirən şəxs xalqımızın ümummmilli lideri Heydər Əliyev olmuşdur. Ulu öndərimizin bu hadisənin ertəsi günü Azərbaycanın Moskvadakı daimi nümayəndəliyinə gələrək faciəni törədən şəxsləri kəskin şəkildə tənqid etmiş, hadisəni insanlığa, hüquqa, demokratiyaya, humanizmə zidd hesab etmişdir.

Görkəmli ictimai-siyasi və dövlət xadiminin yenidən respublika rəhbərliyinə qayıdışından sonra 20 Yanvar hadisələrində şəhidlik zirvəsinə ucalmış mərd mübarizlərimizin xatirəsi daim əziz tutulmuş, onların ailə üzvlərinə və zərər çəkən şəxslərə ardıcıl qayğı göstərilmişdir.20 Yanvar faciəsinə hüquqi-siyasi qiymət də məhz ümummilli liderimizin təşəbbüsü ilə verilmişdir.

Administrasiyanın hüquq şöbəsinin müdiri, Yeni Azərbaycan Partiyası "Dənizçilər" ərazi təşkilatının sədri Əhməd İsmayılov, gəmi heyəti şöbəsinin müdiri Ehtiram Rəhimov, sektor müdiri Vaqif Hüseynov və başqaları çıxışlarında Mixail Qorbaçov başda olmaqla o vaxtkı imperiya rəhbərlərinin xalqımıza qarşı düşmən siyasətini, Əbdürrəhman Vəzirovun, respublikanın digər rəhbər vəzifəli şəxslərinin öz xalqının taleyinə biganəliyini və dönüklüyünü qətiyyətlə pislənmiş, 20 Yanvar hadisələri zamanı Azərbaycan dənizçilərinin fədakarlığı, mübarizliyi və öz xalqı ilə birgə fəal mübarizəsindən söz açaraq, faciə barədə acı xatirələrini bölüşmüşlər.

Azərbaycan.- 2011.-20 yanvar.- S. 7.