Qəbələdə "Milli mənəvi dəyərlər və gənclik" mövzusunda "dəyirmi masa" keçirilmişdir

Yeni Azərbaycan Partiyasının Gənclər Birliyinin təşkilatçılığı ilə Qəbələdə "Milli mənəvi dəyərlər və gənclik" mövzusunda "dəyirmi masa" keçirilmişdir.

AzərTAc xəbər verir ki, birliyin bütün şəhər və rayonlardakı təşkilatlarının rəhbərlərinin və fəallarının iştirak etdiyi tədbirdə milli mənəvi dəyərlərimizin qorunması, təbliği sahəsində görülən işlər barədə geniş məlumat verilmiş, müzakirələr aparılmışdır. Gənclər Avropa mədəniyyətindən xalqımızın milli mənəvi dəyərlərinə zidd olan halların daxil olmasının yolverilməzliyini qeyd etmiş, bu dəyərlərə cavab verməyən bəzi televiziya verilişlərini, internet portallarını da mənfi hal kimi qiymətləndirmiş, rəy və təkliflərini söyləmişlər.

Ölkəmizdə təhsil və erkən nikah məsələləri ətrafında müzakirələr aparılmışdır.

YAP icra katibinin müavini, Milli Məclisin deputatı Mübariz Qurbanlı, YAP Gənclər Birliyinin sədri, Azərbaycan Dövlət İqtisad Universitetinin prorektoru Seymur Orucov çıxışlarında qeyd etmişlər ki, milli mənəvi dəyərlər mədəniyyətimizin bir hissəsidir. Xalqımızın tarix boyu əldə etdiyi nə varsa, onun mənəvi dəyərləridir. Milli mənəvi dəyərlər adət-ənənələrlə nəsildən-nəslə ötürülən yazılmamış qayda-qanunlardır, onların mənfi ünsürlərdən qorunması və təbliğində gənclərin üzərinə böyük məsuliyyət düşür.

Azərbaycan.- 2011.-1 fevral.- S. 2.