Milli Qəhrəman Yelmar Edilovun xatirəsi yad edildi

Azərbaycanın Milli Qəhrəmanı Yelmar Edilovun doğum günü ilə bağlı Ağdam rayonundakı Şəhidlər abidəsi önündə tədbir keçirilmişdir.

AzərTAc xəbər verir ki, Milli Qəhrəmanın ailə üzvləri, döyüş yoldaşları, rayon ictimaiyyətinin nümayəndələri və hərbçilər abidə önünə gül-çiçək qoymuş, respublikamızın müstəqilliyi və ərazi bütövlüyü uğrunda şəhid olmuş Vətən övladlarının xatirəsini bir dəqiqəlik sükutla yad etmişlər.

Mərasimdə rayon icra hakimiyyətinin başçısı Nizami Sadıqov, Y.Edilovun həyat yoldaşı, onunla bir yerdə döyüşmüş Reyhan Quliyeva, keçmiş döyüşçü, ehtiyatda olan kapitan İbad Həsənov Milli Qəhrəmanın mənalı həyat və qəhrəmanlıqla dolu döyüş yolundan danışmışlar.

Məlumat verilmişdir ki, Yelmar Şahmar oğlu Edilov 1946-cı il aprelin 10-da Ağdam rayonunun Əlimədədli kəndində anadan olmuşdur. 1954-1964-cü illərdə Əlimədədli kənd orta məktəbində təhsil almış, sonra Ağdam Kənd Təsərrüfatı Texnikumuna daxil olmuşdur. Hərbi xidmətdən qayıtdıqdan sonra M.F. Axundov adına üzümçülük sovxozunda işləmişdir.

Yelmar Edilov 1991-ci ildə Ağdamda özünümüdafiə batalyonu yaradaraq Vətənimizin erməni işğalçılarından qorunmasında fədakarlıq göstərmişdir. 1994-cü il aprelin 11-də Çəlik kökəltmə məntəqəsi uğrunda gedən döyüşdə Y. Edilov qəhrəmanlıqla vuruşaraq həlak olmuşdur.

Bakı şəhərindəki İkinci Şəhidlər xiyabanında dəfn edilmişdir.

İgid və cəsur komandir Yelmar Edilov Azərbaycan Respublikası Prezidentinin 1994-cü il 16 sentyabr tarixli fərmanı ilə ölümündən sonra "Azərbaycanın Milli Qəhrəmanı" adına layiq görülmüşdür.

Azərbaycan.- 2012.- 11 aprel.- S. 5.