Mübarizənin yeni mərhələsi

Düşmən heç zaman yatmır - demişlər. Xalqın bu müdrik deyimində bir neçə məna var. Əvvəla, düşmənin yatmırsa, deməli, sən də yatmalı deyilsən. Yoxsa elə yuxuda başının üstünü alar, düşmənçiliyini edər. Digər tərəfdən, sən daim hazırlıqlı olmalısan, haçan, hansı istiqamətdə zərbə endiriləcəyini müəyyənləşdirib tədbir görməlisən. Ən nəhayət, daim ayıq-sayıq olmaqla düşməni qabaqlamalı, zərərsizləşdirməlisən!

Taleh Azərbaycana dünya erməniliyi adlı bir düşmən qismət edib. Bu düşmən Azərbaycan torpaqları hesabına özünə dövlət qurub, bizə əbədi qonşu olub. Heç birimizin başqa yerə köçüb getmək fikri yoxdur! Əksinə, ermənilər məqam düşən kimi torpaqlarımızı işğal etməklə ərazilərini genişləndirirlər. Havadarları güclü olduğundan indiyədək bu niyyətlərində uğurlar qazanmışlar.

Adətən, ermənilər onları himayə edən dövlətlərin başçılarına yol tapanda, mövqeləri güclənəndə hücuma keçirlər. Bir də Azərbaycan xalqı və dövləti üçün taleyüklü məqamlarda, ölkədə qeyri-sabitlik yarananda! Hər dəfə də böyük qırğınlar, soyqırımıları törədərək, sonradan əsas silahlarını, hiylə və yalanı işə salırlar. Yəni, öz əməllərini başqalarının adına yazmağa çalışaraq "soyqırımına məruz qalan zavallı millət" olduqlarını dünyaya qəbul etdirməyə fasiləsiz cəhdlər göstərirlər. 1905-1906; 1918-1920; 1988-1993-cü illərdə məhz belə olub. Sonuncu dəfə ermənilər Xocalıda 613 günahsız insanı qətlə yetirməklə faşist xislətlərini bir daha nümayiş etdirdilər! Bütövlükdə XIX-XX əsrlərdə ermənilər tərəfindən 280500 nəfər azərbaycanlı vəhşicəsinə öldürülmüşdür, hazırda isə ölkə ərazisinin 20 faizi düşmən işğalındadır.

Xalqımız heç zaman torpaqlarının işğalı, soyqırımı əməllərilə barışmamış, coxsaylı qurbanlar versə də, düşmənə qarşı mübarizəni bir an belə dayandırmamışdır. Qırmızı imperiyanın dağılması, dövlət müstəqilliyinin bərpası ilə müşahidə olunan sonuncu Qarabağ savaşında 20 ildir ki, atəşkəsdir.

Atəşkəs barışıq deyil!

Atəşkəs sülh demək deyil!

Atəşkəs Azərbaycanın mövcud status-kvo ilə razılaşması deyil!

Əslində, atəşkəs mübarizənin yeni formada davamıdır!

Ermənistan-Azərbaycan, Dağlıq Qarabağ münaqişəsi indiyədək üç mərhələ keçib. Bu mərhələnin hər birinin özünəməxsus çətinlikləri olmaqla müəyyən dövrü əhatə edir. Ulu öndər Heydər Əliyevin adı ilə bağlı olan birinci mərhələdə başlanan mübarizənin hərbi-diplomatik əsasları qoyuldu. Milli ordu quruculuğu prosesinə başlayan ümümmilli liderimiz məsələnin sülh yolu ilə həllinə də böyük diqqət yetirirdi.

Münaqişənin ilk dövrlərində Azərbaycan dünyaya və SSRİ məkanına mərkəzi qəzetlər və Sovet İttifaqının informasiya agentlikləri vasitəsilə çıxırdı. Həmin qaynaqlar ermənipərəst qüvvələrin əlində olduğundan Azərbaycanın Dağlıq Qarabağ vilayətində baş verən hadisələr ictimaiyyətə təhrif edilmiş formada, ermənilərin maraq və mənafelərinə uyğun şəkildə təqdim olunurdu. Başqa sözlə, bütün informasiyalarda azərbaycanlılar "vəhşi, qaniçən", ermənilər isə "zavallı, məzlum xalq" kimi göstərilirdi.

Ulu öndər Heydər Əliyevin ən böyük xidmətlərindən biri Azərbaycan ətrafında yaradılmış informasiya blokadasını yarmaq oldu. O, bu işi təkbaşına, böyük qətiyyət və əzmkarlıqla gördü. Xəritə qarşısında dayanaraq səfər etdiyi ölkələrin rəhbərlərinə və siyasətçilərinə real həqiqətləri faktlar və sübutlar əsasında çatdırdı. Beləliklə, ermənilərin əsl xislətlərini göstərərək azərbaycanlıların mövcud simasını özünə qaytardı. 2001-ci ildə ölkəmizin Avropa Şurasına qəbuluna nail olaraq daha bir nəhəng tribunadan düşmənlərimizin əməllərinin ifşası və Azərbaycan həqiqətlərinin yayılması üçün təməl yaratdı.

Mübarizənin ikinci mərhələsinə Prezident İlham Əliyevin rəhbərliyi ilə başlandı. Hələ Avropa Şurası Parlament Assambleyasında ölkəmizin deputat qrupuna başçılıq etdiyi dövrdə bu nüfuzlu qurumda necə mübarizə aparılmasının mükəmməl nümunəsini göstərən cənab İlham Əliyev dövlət başçısı tək fəaliyyətində beynəxalq qurumlarda uğurlarımızın bünövrəsini qoydu. Dünyada yaranmış situasiyanı, Azərbaycan dövlətinin Cənubi Qafqazda və beynəlxalq arenadakı mövqeyini düzgün qiymətləndirən Prezident İlham Əliyev "hücum diplomatiyası" taktikasını gündəmə gətirdi. Qısa vaxt ərzində bu uğurlu taktika öz səmərəsini göstərdi!

Artıq dünya Ermənistan-Azərbaycan, Dağlıq Qarabağ münaqişəsi barədə əsl həqiqətləri bilir!

Bir sıra nüfuzlu beynəlxalq təşkilatlar - BMT, ATƏT, AŞ PA, Avropa İttifaqı, İƏT qəbul etdikləri sənədlərdə Ermənistanın Azərbaycan ərazilərinin işğalını təsdiq etmiş, onu işğalçı dövlət adlandırmışlar!

Daha ermənilər öz yalanlarını dünyada rahat yeridə, asudə və maneəsiz çalışa bilmirlər!

Heydər Əliyev Fondunun azərbaycanlıların soyqırımının tanıdılması məsələsinə dəstəyi, fondun vitse-prezidenti Leyla xanım Əliyevanın başçılığı ilə "Xocalıya ədalət" kampaniyasının genişlənməsi də ikinci mərhələnin uğurlarındandır. Cari ildə Xocalı soyqırımının 20-ci ilinin keçirilməsi, bu münasibətlə dünyanın 60-dan çox ölkəsində kütləvi tədbirlərin baş tutması yeni mərhələnin başlanğıcının göstəricisidir.

Azərbaycan Prezidenti İlham Əliyev torpaqlarımızın bir qarışının da heç kəsə verilməyəcəyini, Azərbaycanın ərazi bütövlüyünün danışıqlar mövzusu olmadığını bəyan edib! Artıq Azərbaycan güclü iqtisadiyyata və modern orduya malik dövlətdir! Hələlik münaqişənin sülh yolu ilə həllinə çalışır və bu istiqamətdə yeni addımlar atır.

Mübarizənin üçüncü mərhələsi Azərbaycanın dünyada artan nüfuzu, iqtisadi gücü və onu dəstəkləyənlərin say çoxluğu ilə xarakterizə edilir. Bu mərhələ ölkə Prezidenti İlham Əliyevin Xocalı soyqırımı günündə keçirilən ümumxalq yürüşündəki iştirakından güc alır. Artıq Azərbaycan Avropanın enerji təchizatında xüsusi yeri olan, xarici dövlətlərə sərmayə qoyan, böyük 20-liyin sammitinə dəvət alan, 155 dövlətin dəstəyi ilə BMT TŞ-yə üzv seçilən dövlətdir! Bu siyasi, iqtisadi dividendlər ona aparılan mübarizədə əlavə güc və imkanlar verir!

Bu mərhələnin xarakterik xüsusiyyəti dünya dövlətlərinin parlamentlərində işlərin gücləndirilməsidir. Artıq Meksika və Pakistan parlamenti Xocalı soyqırımı ilə bağlı qərar qəbul etmişdir. Qısa müddətdə belə qərarların sayı daha da artacaqdır.

Dövlət başçısı cənab İlham Əliyev Şuşa şəhərinin Ermənistan silahlı qüvvələri tərəfindən işğalının iyirminci ildönümü haqqında sərəncam imzalamışdır. Bu kədərli ildönümünün də beynəlxalq miqyasda qeyd olunması üçün hər bir azərbaycanlı əlindən gələni etməlidir!

Azərbaycanlıların soyqırımının dünya tərəfindən qəbul edilməsi üçün dayanmadan, ilboyu iş aparılmalıdır. Artıq Azərbaycanda yeni, müasir biliklərə və informasiya-kommunikasiya texnologiyalarına bələd olan nəsil yetişmişdir. Onların bir qismi xaricdə təhsil almış, yaxud almaqdadır. Gənclərimizin bu müqəddəs işə qoşulması son dərəcə vacib və effektlidir. Ermənilərin çoxsaylı yalan və böhtan yayan internet saytları mövcuddur. Gənclərimiz daim bu sahədə iş aparmalı, erməni yalanlarını və saxtalığını sübut edən faktlarla cavablandırmalıdır. Hər bir azərbaycanlı gənc bu işə vətəndaşlıq borcu kimi yanaşmalı, hücum diplomatiyasına şəxsi töhfəsini verməlidir!

Üçüncü mərhələdə də bizi uzun və gərgin mübarizə gözləyir!

Bu mübarizədə biz qalib gəlməyə borcluyuq və qalib gələcəyik!

Qələbəni isə yalnız birliyimiz, qətiyyətimiz, fəallığımız təmin edəcək!

Yorulmadan, fasilə vermədən qələbəyədək, sonadək mübarizəyə!

Azərbaycan.- 2012.- 13 aprel.- S. 5.