Əfqanıstan Dağlıq Qarabağ münaqişəsinin həlli məsələsində Azərbaycanın ədalətli mövqeyini tam dəstəkləyir

Azərbaycanın Pakistanda, eyni zamanda, Əfqanıstanda akkreditə olunmuş səfiri Daşqın Şikarov Əfqanıstan Milli Assambleyasının sədri Alhac Abdul Rauf İbrahimi ilə görüşmüşdür.

Səfirlikdən AzərTAc-a bildirmişlər ki, görüşdə diplomat ölkələrimiz arasında münasibətlər, Azərbaycanın uğurlu daxili və xarici siyasəti, iqtisadi islahatlar, həyata keçirilən strateji layihələr, Ermənistanın Azərbaycana qarşı hərbi təcavüzü və Xocalı soyqırımı haqqında sədrə ətraflı məlumat vermişdir.

Səfir Heydər Əliyev Fondunun prezidenti, Azərbaycanın birinci xanımı Mehriban Əliyevanın təşəbbüsü ilə ölkəmizdə və xaricdə həyata keçirilən humanitar layihələrdən danışaraq fond tərəfindən Kabildəki "Avisenna" uşaq evinə də yardımın göstərildiyini qeyd etmişdir.

Milli Assambleyanın sədri isə xalqlarımız arasında dostluq əlaqələrindən, mövcud oxşarlıqlardan danışaraq Əfqanıstanın çətin günlərində dəstəyə görə Azərbaycana minnətdarlığını bildirmişdir. Ermənistan-Azərbaycan, Dağlıq Qarabağ münaqişəsinə toxunan sədr ölkəsinin bu məsələdə Azərbaycanın ədalətli mövqeyini tam dəstəklədiyini vurğulamışdır. O, özünün də türk mənşəli olduğunu bildirərək hər zaman azərbaycanlı qardaşlarının yanında olduğunu bəyan etmişdir.

Azərbaycan.- 2012.- 21 aprel.- S. 3.