Lənkəran şəhərinin sosial-iqtisadi inkişafının sürətləndirilməsinə dair əlavə tədbirlər haqqında

Azərbaycan Respublikası Prezidentinin Sərəncamı

Zəngin tarixi yol keçmiş Lənkəran şəhəri əsrlər boyu ölkəmizin ictimai-siyasi və mədəni həyatında əhəmiyyətli rol oynamışdır.

Rayonun ərazisində müasir dövrədək mühafizə olunmuş Bəlləbur qalası, Dairəvi qala, Şeyx Zahid və Seyid Xəlifə türbələri, eləcə də Lənkəran mayakı və digər tarixi memarlıq abidələri maddi mədəniyyətin qiymətli nümunələri sırasındadır.

Hirkan Milli Parkı, Qızılağac Dövlət Təbiət Qoruğu və Kiçik Qızılağac Təbiət Yasaqlığı bölgənin flora və faunasının zənginliyini əks etdirir. Füsunkar təbiəti, məhsuldar torpaqları hazırda da Lənkəranın iqtisadiyyatının əsasını təşkil edən qədim ənənəvi əkinçilik və bağçılıq mədəniyyətinin formalaşmasını şərtləndirmişdir.

Respublikanın hazırda mühüm sosial-iqtisadi, mədəni və turizm mərkəzlərindən birinə çevrilməkdə olan Lənkəran şəhərində bir sıra mühüm infrastruktur layihələri uğurla həyata keçirilmiş, o cümlədən Hava limanı, Olimpiya İdman Kompleksi, Müalicə-Diaqnostika, Uşaq Sağlamlıq və Əlillərin Reabilitasiya mərkəzləri, mehmanxana və istirahət obyektləri, sənaye müəssisələri istifadəyə verilmişdir.

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Lənkəran şəhərinin tarixi-mədəni irsinin mühafizəsi və bərpası, şəhərsalma, istirahət, turizm infrastrukturunun bölgənin təbiətinə, memarlıq ənənələrinə uyğun müasir şəkildə yenidən qurulması işlərini sürətləndirmək, habelə "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nda müəyyən olunmuş tədbirlərin həyata keçirilməsini təmin etmək məqsədi ilə qərara alıram:

1. Lənkəran şəhərinin sosial-iqtisadi inkişafının sürətləndirilməsi üçün Azərbaycan Respublikasının 2012-ci il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Lənkəran Şəhər İcra Hakimiyyətinə 5,0 (beş) milyon manat vəsait ayrılsın.

2. Azərbaycan Respublikasının Maliyyə Nazirliyi bu sərəncamın 1-ci hissəsində nəzərdə tutulan məbləğdə maliyyələşməni müəyyən olunmuş qaydada təmin etsin.

İlham ƏLİYEV,

Azərbaycan Respublikasının Prezidenti

Bakı şəhəri, 1 avqust 2012-ci il

Azərbaycan.- 2012.- 2 avqust.- S. 4.