Dövlət orqanlarına, hüquqi və fiziki şəxslərə gömrük məsələləri üzrə məlumatların verilməsi qaydaları

Azərbaycan Respublikası Nazirlər Kabinetinin 2012-ci il 3 avqust tarixli 167 nömrəli qərarı ilə təsdiq edilmişdir

1. Ümumi müddəalar

1.1. Bu qaydalar Azərbaycan Respublikasının Gömrük Məcəlləsinin (bundan sonra - Gömrük Məcəlləsi) 8.0.27-ci maddəsinə əsasən hazırlanmışdır və dövlət orqanlarına, hüquqi və fiziki şəxslərə (bundan sonra - şəxslər) gömrük məsələləri üzrə məlumatların verilməsi qaydalarını müəyyən edir.

1.2. Bu qaydalar Azərbaycan Respublikasının Dövlət Gömrük Komitəsi (bundan sonra - Komitə) tərəfindən idxal-ixrac əməliyyatları və digər gömrük məsələləri ilə bağlı aidiyyəti dövlət orqanlarına mütəmadi verilən məlumatlara şamil edilmir.

1.3. Gömrük orqanlarının aşkar etdiyi hüquqpozmaların araşdırılması digər hüquq-mühafizə orqanlarının səlahiyyətinə aid olduğu hallarda müvafiq məlumatlar və onlara dair sənədlər həmin orqanlara verilir.

1.4. Gömrük orqanları digər hüquq-mühafizə orqanlarının sorğuları əsasında barəsində inzibati xətalar haqqında iş üzrə icraat və ya cinayət işi başlanılmış şəxslər haqqında onlarda olan məlumatları həmin orqanlara verirlər.

2. Gömrük məsələləri üzrə məlumatların əldə edilməsi üsulları

2.1. Şəxslər gömrük məsələləri üzrə məlumatları aşağıdakı üsullarla əldə edə bilərlər:

2.1.1. gömrük orqanlarının girişində quraşdırılmış məlumat köşklərindən və ya internet vasitəsilə;

2.1.2. gömrük orqanının vəzifəli şəxsinə bilavasitə və ya telefonla şifahi müraciət etməklə;

2.1.3. gömrük orqanına şəxsən, poçt, telefaks, yaxud elektron poçtla yazılı sorğu təqdim etməklə;

2.1.4. gömrük orqanlarının elektron məlumat sisteminin istifadəçisi kimi təsdiq edilməklə.

2.2. Gömrük orqanlarının girişində quraşdırılan məlumat köşklərində və Komitənin rəsmi internet saytında aşağıdakı məlumatlar yerləşdirilir:

2.2.1. Komitənin qaynar xəttinin nömrəsi;

2.2.2. gömrük orqanlarının adları və əlaqə məlumatları (poçt ünvanı, elektron poçt ünvanı, telefon nömrələri və s.);

2.2.3. gömrük orqanlarının struktur bölmələri haqqında əsasnamələr;

2.2.4. gömrük orqanlarının fəaliyyəti ilə bağlı hazırlanmış təlimatlar;

2.2.5. gömrük orqanlarının ştat cədvəlləri, həmin orqanlarda çalışan vəzifəli şəxslərin adları, soyadları, telefon nömrələri, elektron poçt ünvanları, həmçinin onların təhsili və ixtisasları barədə məlumatlar;

2.2.6. gömrük orqanlarının fəaliyyəti barədə hesabatlar;

2.2.7. normativ hüquqi aktların layihələri - razılaşdırılmağa və ya təsdiq olunmağa göndərildiyi andan;

2.2.8. Komitənin əmr, sərəncam və qərarları - qüvvəyə mindiyi gündən;

2.2.9. gömrük orqanlarının vakansiyaları haqqında məlumatlar;

2.2.10. məlumatların təqdim edilməsi üçün sorğuların verilməsinə dair tələblər;

2.2.11. ən çox verilən suallar üzrə normativ hüquqi aktlardan çıxarışlar;

2.2.12. məlumatların verilməsindən imtina üçün əsaslar;

2.2.13. göstərilən elektron gömrük xidmətlərinin siyahısı və bu xidmətlərdən istifadə qaydaları haqqında məlumatlar;

2.2.14. gömrük orqanlarının göstərdikləri xidmətlə bağlı dəyişikliklərə dair məlumatlar - bu dəyişikliklərin edilməsinə ən geci on gün qalanadək;

2.2.15. gömrük orqanları rəhbərlərinin qəbul saatları barədə məlumatlar;

2.2.16. gömrük orqanlarında əməyin ödənilməsinə dair təlimatlar, habelə əlavə haqların ödənilməsi qaydaları və xüsusi güzəştlər barədə məlumatlar;

2.2.17. qanunvericilik aktları, Azərbaycan Respublikasının tərəfdar çıxdığı beynəlxalq müqavilələr, gömrük işinə aid digər normativ hüquqi aktlar və təsnifatlar;

2.2.18. ümumiləşdirilmiş statistik məlumatlar, o cümlədən Azərbaycan Respublikasının xarici ticarətinin ümumiləşdirilmiş gömrük statistikası;

2.2.19. dövlət sirri təşkil edən məlumatların siyahısı;

2.2.20. açıqlanması xüsusi qanunvericiliklə, beynəlxalq müqavilələrlə və ya onların əsasında qəbul edilən normativ aktlarla müəyyənləşdirilən informasiyalar;

2.2.21. gömrük işi və gömrük orqanlarının fəaliyyəti ilə bağlı yeniliklər.

2.3. Bu qaydaların 2.2-ci bəndində qeyd olunan məlumatlarda baş verən dəyişikliklər barədə Komitənin mətbu nəşrində məlumat dərc edilir.

2.4. Gömrük işi sahəsində qanunvericilik aktlarında baş verən dəyişikliklər, həmçinin digər kütləvi informasiya vasitələrinin köməyi ilə ictimaiyyətə çatdırılır.

2.5. Telefon vasitəsilə məlumatlandırma Komitənin "qaynar xətt"i və gömrük orqanının vəzifəli şəxsinin birbaşa iş telefonu vasitəsilə həyata keçirilir.

2.6. Şəxslər Komitənin "qaynar xətt"i vasitəsilə gömrük işinin aşağıdakı sahələri üzrə məlumat ala bilərlər:

2.6.1. maliyyə məsələləri və gömrük ödənişləri üzrə:

2.6.1.1. nəqliyyat vasitələri və aksizli mallar üzrə;

2.6.1.2. respublika ərazisinə idxal olunan digər mallar üzrə;

2.6.1.3. gömrük dəyəri üzrə;

2.6.1.4. valyuta gömrük nəzarəti üzrə;

2.7.1.5. tarif tənzimlənməsi üzrə;

2.6.1.6. yol vergiləri üzrə;

2.6.1.7. icazə blankları üzrə;

2.6.2. gömrük nəzarətinin təşkili üzrə:

2.6.2.1. ticarət dövriyyəsi üzrə;

2.6.2.2. qeyri-ticarət dövriyyəsi üzrə;

2.6.2.3. sərnişinlərə gömrük nəzarəti üzrə;

2.6.2.4. baytarlıq, fitosanitar və sanitar karantin nəzarəti üzrə;

2.6.3. qaçaqmalçılıq və gömrük qaydalarının pozulması faktları üzrə;

2.6.4. digər dövlət qurumları ilə məlumatların üzləşdirilməsi üzrə;

2.6.5. kadrlarla işin təşkili üzrə;

2.6.6. şikayətlər üzrə;

2.6.7. məktublar üzrə;

2.6.8. gömrük qanunvericiliyinin tətbiqinə dair istənilən digər məlumatlar.

2.7. "Qaynar xətt" vasitəsilə verilən məlumatlar texniki vasitələrin köməyi ilə elektron daşıyıcılarda yazılır və şəxsin istəyi ilə ona təqdim edilir.

2.8. Gömrük ödənişlərinin məbləğinə dair "qaynar xətt" vasitəsilə alınan məlumatlar gömrük orqanları üçün məcburidir.

2.9. Şəxs "qaynar xətt" vasitəsilə ona bildirilən məbləğdən artıq gömrük ödənişlərinin ödənilməsinə məcbur edilə bilməz.

2.10. Şəxslər həmçinin lazımi gömrük məlumatlarını elektron hökumət portalında yerləşdirilmiş elektron gömrük xidmətləri vasitəsilə də əldə edə bilərlər.

3. Sorğuya dair tələblər

3.1. Hər bir şəxs sorğu vermək yolu ilə gömrük orqanlarından bu qaydaların 4.1-ci bəndində nəzərdə tutulmuş məlumatlar istisna edilməklə, gömrük məsələləri üzrə istənilən məlumatı əldə edə bilər.

3.2. Gömrük işi və gömrük orqanlarının səlahiyyətlərinə aid və Komitənin rəsmi internet saytında açıqlanmayan məsələlər üzrə məlumatların verilməsi üçün əsas şəxsin gömrük orqanının müvafiq struktur bölməsinə müraciətidir.

3.3. Müraciət yazılı və şifahi sorğu formasında edilə bilər.

3.4. Yazılı sorğu gömrük orqanına şəxsən təqdim edilə, yaxud poçt, telefaks və ya elektron poçt vasitəsilə göndərilə bilər.

3.5. Gömrük orqanının məsul vəzifəli şəxsi mütəmadi olaraq (gündə 2 dəfədən az olmayaraq), elektron poçt vasitəsilə məktubların daxil olmasını yoxlayır və daxili kargüzarlıq qaydalarına müvafiq olaraq sorğuları icra edir.

3.6. Elektron poçtla göndərilən sorğular yazılı sorğulara qoyulan tələblərə cavab verməlidir.

3.7. Yazılı sorğu aşağıdakı məlumatları özündə əks etdirməlidir:

3.7.1. şəxsin müraciət etdiyi gömrük orqanının adı;

3.7.2. məlumat almaq istəyən hüquqi şəxsin adı və ya fiziki şəxsin adı və soyadı;

3.7.3. şəxsin əlaqə məlumatları (poçt və ya elektron poçt ünvanı, telefon və ya telefaks nömrəsi);

3.7.4. sorğunun məzmunu;

3.7.5. informasiyanın təqdim edilmə forması;

3.7.6. imza.

4. Məlumatın verilməsindən imtina üçün əsaslar

4.1. Gömrük orqanlarının vəzifəli şəxsləri aşağıdakı hallarda sorğunun icrasından imtina edirlər:

4.1.1. sorğunun əldə edilməsi qanunla məhdudlaşdırılan informasiyaya aid olduqda, yaxud sorğuçunun bu informasiyanı əldə etməyə səlahiyyəti çatmadıqda;

4.1.2. sorğuçunun hansı informasiyanı əldə etmək istədiyini aydınlaşdırmaq mümkün olmadıqda;

4.1.3. sorğu gömrük məsələləri ilə əlaqədar olmadıqda.

4.2. Məlumatın verilməsindən imtina qərarı imtinanın səbəbi aydın və əsaslandırılmış şəkildə göstərilməklə, yazılı şəkildə sorğunun alındığı tarixdən 5 (beş) iş günündən gec olmayaraq şəxsə göndərilir.

4.3. Gömrük orqanının qərarı ilə razı olmayan şəxslər həmin qərardan inzibati qaydada və ya məhkəməyə şikayət edə bilərlər.

5. Sorğunun cavablandırılması

5.1. Gömrük orqanları informasiyanı şəxsə onun istəyindən asılı olaraq və ya onunla razılaşdırmaqla aşağıdakı üsullarla təqdim edir:

5.1.1. elektron məlumat daşıyıcısında yazmaqla və ya sorğuda göstərilən elektron poçt ünvanına göndərməklə;

5.1.2. sənədin surətini və ya sənəddən çıxarışı şəxsə bilavasitə təqdim etməklə və ya onun poçt ünvanına göndərməklə;

5.1.3. telefaksla;

5.1.4. şifahi formada;

5.1.5. məlumatlarla tanış olmaq üçün ayrılmış yerə girməyə icazə verməklə;

5.1.6. məlumat daşıyıcısının növünü nəzərə almaqla, digər üsullarla.

5.2. Sorğu yalnız aşağıdakı hallarda şifahi cavablandırılır:

5.2.1. gömrük orqanının vəzifəli şəxsinə bilavasitə müraciət edildikdə;

5.2.2. sorğu üzrə məlumatlar soruşulduqda;

5.2.3. gömrük orqanlarında şəxsi maraqlandıran məlumatın olub-olmadığı öyrənildikdə.

5.3. Sorğu ən qısa müddətdə, lakin 7 (yeddi) iş günündən gec olmayaraq icra edilir.

5.4. Bu müddətdə həmin məlumat öz operativliyini itirərsə, sorğuya dərhal, bu mümkün olmadıqda isə 24 saatdan gec olmayaraq cavab verilməlidir.

5.5. İnsan həyatı, sağlamlığı, yaxud şəxsin azadlığı üçün real təhlükə yarandığı hallarda axtarılması və hazırlanması müəyyən vaxt tələb edən məlumatlar 48 saat ərzində (iş günü hesab edilməyən günlər istisna olmaqla) təqdim edilir.

5.6. Əgər sorğu natamam və ya qeyri-dəqiq tərtib olunubsa, gömrük orqanının vəzifəli şəxsi müəyyən edilmiş çatışmazlıqlar barədə şəxsə 5 (beş) iş günü müddətində məlumat verir.

5.7. Gömrük orqanı həddən artıq sorğu aldıqda və bu səbəbdən məlumatı hazırlamaq üçün əlavə vaxt tələb olunduqda və ya sorğunun mahiyyətini dəqiqləşdirmək, yaxud məlumatın aydınlaşdırılması üçün çoxsaylı sənədləri araşdırmaq lazım gəldikdə, nəzərdə tutulmuş icra müddətini əlavə olaraq 7 (yeddi) iş günü də uzada bilər.

5.8. Gömrük orqanı şəxsə səbəblərini göstərməklə, müddətin uzadılması barədə 5 (beş) iş günü ərzində məlumat verir.

5.9. Sorğu ilə bağlı məlumatlar şəxslərə ödənişsiz verilir.

Azərbaycan.- 2012.- 5 avqust.- S. 3.