Bürünc medallı olimpiyaçılarımız

Bütün dünyanın böyük həyəcanla izlədiyi London Olimpiadasına sabah yekun vurulur. Hər Olimpiya Oyunlarında qazandığı yüksək nəticələrlə xalqımızı sevindirən idmançılarımız budəfəki yarışlarda da uğurla çıxış edərək Vətənə medallarla qayıdırlar. Hələ medal aktivimizdə qızıl əyarlı mükafat olmasa da, olimpiyaçılarımızın göstərdiyi nəticələr diqqətəlayiqdir. Ümid edirik ki, London-2012-nin son günündə olsa da, idmançılarımız qızıl medal qazanaraq xalqımızı sevindirəcəklər.

Məlum olduğu kimi, bürünc medal qazanmış idmançılarımızın arasında ağır atlet və güləşçilər də var. Bunlar Valentin Xristov (ağırlıqqaldırma), Emin Əhmədov (yunan-Roma) və Yuliya Ratkeviçdir (qadın güləşi).

Şübhəsiz, Olimpiadada qazanılan ilk uğur daha yaddaqalan olur. Olimpiyaçılarımız bu uğura idmanın ağırlıqqaldırma növündə imza atdılar. Medal bürünc oldu, sahibi isə 18 yaşlı Valentin Xristov idi. 56 kiloqram çəki dərəcəsində mübarizə aparan Valentin bu mükafatı 286 xalla əldə etdi.

Ağır atletimiz birdənqaldırmada 120 kiloqram, təkanlaqaldırmada isə 150 kiloqram sifariş etmişdi. İdmançımızın ilk cəhdi uğurlu oldu. O, 120 kiloqram çəkini 123 kiloqram çəkiyə dəyişdi və bunun öhdəsindən asanlıqla gəldi. Rəqiblərinin çıxışına uyğun olaraq, Valentin ikinci cəhdində 127 kiloqram çəki sifariş verdi və bu "yük"ü də qaldırmağı bacardı. Nəhayət, üçüncü cəhddə atletimiz 130 kiloqram sifariş versə də, buna nail ola bilmədi və 127 kiloqram çəki ilə kifayətlənməli oldu. Nəticədə idmançımız birdənqaldırmada dördüncü yeri tutdu.

Təkanlaqaldırmada idmançımız rəqiblərinin çıxışına uyğun olaraq, 154 kiloqram sifariş etdi və ağırlığı başı üzərinə qaldırdı. İkinci cəhddə 158 kiloqram sifariş etsə də, bunun öhdəsindən gələ bilmədi. Amma üçüncü cəhddə Valentin 159 kiloqram çəki sifariş etdi və bu dəfə ağırlığı qaldıra bildi.

Beləliklə, ümumi nəticədə 286 xal toplayan Valentin Xristov üçüncü pillədə qərarlaşdı və Olimpiadada Azərbaycanın ilk medalını qazandı.

Yarış başa çatdıqdan sonra dövlət başçısı İlham Əliyevin ağır atletimizi və yığmamızın məşqçilər korpusunu qələbə münasibətilə təbrik etdi. Bu, Valentin üçün ən unudulmaz anlardan biri idi...

Valentin Xristov 1994-cü il martın 30-da Bolqarıstanda anadan olmuşdur. Yaşının az olmasına baxmayaraq, karyerası çox zəngindir. Ötən il Fransanın paytaxtı Parisdə keçirilmiş kişilər və qadınlar arasında dünya çempionatında 3-cü yeri tutmuş təmsilçimiz elə həmin il Türkiyənin Antalya şəhərində qitə birinciliyinin qızıl medalına layiq görülmüşdür. Xristov həm də gənclər arasında Avropa, yeniyetmələr arasında dünya rekordçusudur.

Təmsilçimiz London Olimpiadasına vəsiqəni 2011-ci və 2012-ci illərdə Türkiyə və Fransada təşkil olunmuş lisenziya xarakterli yarışların yekunlarına əsasən əldə etmişdir.

Hər dəfə Olimpiya Oyunları kimi mötəbər idman turnirlərində Azərbaycan komandasının heyətində idmançılardan biri nümayiş etdirdiyi görüşlərlə diqqəti cəlb edir. Londonda yunan-Roma güləşi üzrə 74 kq çəki dərəcəsində çıxış etmiş Emin Əhmədov məhz belə bir idmançı oldu.

Emin ilk dəfə idi ki, Yay Olimpiya Oyunlarında iştirak etmək imkanı qazanmışdı. Dünyanın ən mötəbər idman turnirində mübarizəyə 1/8 final mərhələsindən başlayan gənc idmançı əvvəlcə xorvatiyalı Neven Zuqaj ilə qarşılaşdı. Pəhləvanımız Xorvatiya təmsilçisini hər iki hissədə məğlub edərək 1/4 final mərhələsinə adladı. Növbəti mərhələdə isə Eminin rəqibi daha güclü idmançı idi. Buna baxmayaraq, gənc güləşçimiz gürcüstanlı Zurab Datunaşvilini də mübarizədən kənarlaşdırdı. O, ilk hissədə rəqibinə uduzsa da, sonrakı hissələrdə qələbə qazandı və yarımfinala çıxdı. Təəssüf ki, pəhləvanımız finala vəsiqə qazana bilmədi. Bununla belə, azərbaycanlı güləşçi Olimpiya Oyunlarını mükafatla başa vurdu. Emin bürünc medal uğrunda görüşdə belaruslu Aleksandr Kikinyov ilə qarşılaşdı. Gərgin keçən görüşün ilk hissəsində rəqib irəlidə olsa da, Emin növbəti hissələrdə ona heç bir şans vermədi. Nəticədə dalbadal iki hissədə qalib gələn pəhləvanımız bürünc medala yiyələndi. Bu, olimpiyaçılarımızın Londonda qazandığı üçüncü medal oldu.

Qeyd edək ki, Emin bir çox ölkədaxili və beynəlxalq turnirlərin qalibi olmuşdur. Ən böyük nailiyyətlərindən biri 2009-cu il "Qızıl Qran-pri" turnirində qazandığı bürünc medaldır. Pəhləvan London Yay Olimpiya Oyunlarına lisenziyanı Çinin Tayuan şəhərində keçirilən güləş üzrə dünya təsnifat turnirində qazanmışdır. Londondan isə sinəsində bürünc medalla qayıdır...

Eminin idmançı karyerasında parlaq gələcəyi hələ qabaqdadır. Ümid edirik ki, ilk iştirakındaca bürünc mükafat almış pəhləvanımız növbəti Olimpiya Oyunlarında qızıl medalı da qazanacaq.

Olimpiadada qadın güləşçilərimiz ölkə idmanının tarixinə yeni səhifə yazdılar desək, yanılmarıq. Mariya Stadnikin gümüş medal qazanmasından bir gün sonra Yuliya Ratkeviçin daha bir uğura imza ataraq bürünc əyarlı mükafata sahib olması qadın güləş məktəbinin inkişafından xəbər verir.

Yuliya Olimpiadada mübarizəyə 1/8 final mərhələsindən qoşulmuşdu. Burada yunanıstanlı Mariya Prevolaraki ilə qarşılaşmış təmsilçimiz ilk raundun əvvəllərində çətinlik yaşasa da, yekunda qalib gəlməyi bacarmışdı. Birinci hissəni 2:0 hesabı ilə öz xeyrinə bitirən Yuliya ardınca 1:0 hesabı ilə rəqibini məğlub etmişdir. Lakin təmsilçimiz 1/4 finalda ciddi rəqabətlə üzləşmişdi. Belə ki, Yuliya Yaponiya təmsilçisi Saori Yoşida ilə görüşdə istənilən nəticəni əldə edə bilməmişdi: hər iki hissədə güclü olan (1:0, 2:0) yaponiyalı idmançı mərhələ adlamışdı.

Buna baxmayaraq, Ratkeviç isə medal şansını itirməmişdi. Saori Yoşida finala çıxdığından güləşçimiz 3-cü yer uğrunda təsəlliverici görüşlərə qatılmışdı. Onun burada ilk rəqibi amerikalı Kelsi Kampbell oldu. Təmsilçimiz üçün asan keçən görüşdə rəqib bir xal belə qazana bilmədi və Yuliya hər iki hissəni qələbə ilə başa çatdırdı - 4:0, 1:0.

İdmançımız bürünc medal uğrunda həlledici mərhələdə rusiyalı Valeriya Jolobova ilə üz-üzə gəldi. 19 yaşlı rəqib Ratkeviçə heç bir müqavimət göstərə bilmədi. O, ilk hissədə 0:6, növbəti 2 dəqiqədə 1:2 hesabı ilə uduzdu. Nəticədə, Yuliya Azərbaycana növbəti medalı qazandırdı.

Yuliya Ratkeviç 1985-ci il iyulun 16-da Belarusda anadan olmuşdur. Uşaqlıq illərindən güləşə maraq göstərmiş, idmanın bu növündə uğur əldə etmək üçün səylə çalışmış, nəticə etibarilə qələbələr bir-birinin ardınca gəlmişdir. Qadın güləşçimiz 2009-cu ildə dünya çempionu ünvanına sahib olmuşdur. Həmin il Bakıda Azərbaycan xalqının ümummilli lideri Heydər Əliyevin xatirəsinə həsr olunmuş güləş üzrə "Qızıl qran-pri" beynəlxalq turnirinin gümüş medalına sahib çıxmışdır. Bir il sonra dünya çempionatında gümüş medal qazanmış Yuliya 2011-ci ildə Avropa çempionu olmuşdur.

İdmançımız London Yay Olimpiya Oyunlarına lisenziyanı Bolqarıstanın paytaxtı Sofiya şəhərində keçirilmiş Avropa təsnifat turnirində əldə etmişdir.

Elçin CƏFƏROV

Azərbaycan.- 2012.- 11 avqust.- S. 1.