Dünyanın heç bir yerində qaçqın və məcburi köçkünlərə Azərbaycandakı kimi qayğı göstərilmir

Azərbaycan bu kateqoriyadan olan insanların həyat səviyyəsinin yaxşılaşdırılması baxımından ən fəal siyasət yürüdən ölkə hesab olunur

Ölkəmizdə qaçqın və məcburi köçkünlərin sosial vəziyyətinin yaxşılaşdırılması və onların ən müasir kommunal xidmət növləri ilə təchiz olunmuş yaşayış mənzilləri ilə təmin edilmələri sosial siyasətin başlıca hədəflərindən birini təşkil edir. Öz inkişaf tempinə görə, regionun lider dövləti olan Azərbaycanda əhalinin sosial rifahının yaxşılaşdırılması istiqamətində mühüm addımlar atılmaqdadır. Ermənistan-Azərbaycan, Dağlıq Qarabağ münaqişəsinin həlli istiqamətində danışıqların davam etdirilməsi ilə yanaşı, qaçqın və məcburi köçkünlərin məskunlaşması, onların sosial şəraitinin yaxşılaşması, səhiyyə, təhsil, infrastruktur təminatları ilə əhatə olunmaları, mənzil-məişət problemlərinin həll edilməsi üçün davamlı tədbirlər həyata keçirilməkdədir.

Əsası ulu öndər Heydər Əliyev tərəfindən qoyulan bu siyasət bu gün Prezident İlham Əliyev tərəfindən davam etdirilməkdədir. 2003-cü ildə prezident seçkiləri ərəfəsində cənab İlham Əliyev bəyan etmişdi ki, növbəti beş ildə Azərbaycanda bir dənə də olsun çadır şəhərciyi qalmayacaq. Artıq bu məsələ də tam şəkildə öz həllini tapıb. Belə ki Prezident İlham Əliyevin rəhbərliyi ilə həyata keçirilən siyasət nəticəsində hazırda ölkəmizdə bir dənə də olsun çadır şəhərciyi qalmayıb.

Prezident İlham Əliyev qaçqın və məcburi köçkünlərin həyat səviyyəsinin yüksəldilməsini prioritet kimi önə çəkmişdir. Bu istiqamətdə aparılan fəaliyyət, həyata keçirlən dövlət proqramları təsdiqləyir ki, ötən müddət ərzində verilən vədə tam əməl olunub.

Qaçqınların və məcburi köçkünlərin yaşayış səviyyəsinin yaxşılaşdırılması və məşğulluğunun artırılması ilə bağlı 2004-cü ildə qəbul olunmuş dövlət proqramı ötən dövr ərzində böyük uğurla icra edilib. Azərbaycanın sürətli sosial-iqtisadi inkişafının əsas xarakterik xüsusiyyətlərindən biri yaşanan tərəqqinin hər bir vətəndaşın həyatında öz əksini tapması, insanların rifah halının günü-gündən yaxşılaşmasıdır. Əhalinin maddi gəlirlərinin davamlı şəkildə çoxalması, əməkhaqqı və pensiyaların, eləcə də büdcədən maliyyələşən işçilərə ödənilən vəsaitlərin Prezident İlham Əliyevin müvafiq sərəncamlarına əsasən vaxtaşırı artırılması və bu qəbildən olan digər tədbirlər ölkədə sosial sferada vəziyyətin daha da yaxşılaşmasını xarakterizə edən mühüm parametrlərdəndir. Əldə edilən bu uğurlar Ermənistanın həyata keçirdiyi işğalçılıq siyasəti üzündən öz doğma yurd-yuvalarını tərk edərək qaçqın və məcburi köçkün həyatı yaşamağa məcbur olan insanların yaşayış durumuna və sosial vəziyyətinə də təsirsiz ötüşmür. MDB, eləcə də Avropa məkanında qaçqın və məcburi köçkünlərin sayına görə Azərbaycan ilk yerlərdə gələn dövlətlərdən biri olmasına baxmayaraq bu kateqoriyadan olan insanların həyat səviyyəsinin yaxşılaşdırılması baxımından ən fəal siyasət yürüdən və yüksək nəticələr əldə edən ölkələrdən hesab olunur.

Əhalinin sosial qayğıya ən çox ehtiyacı olan təbəqəsini təşkil edən qaçqın və məcburi köçkünlərin normal yaşayışı, həyat şəraitinin təmin edilməsi hökumətin sosial siyasətinin prioritet istiqamətini təşkil edir və göstərilən sahədə lazımi nəticəyə nail olunması üçün Azərbaycanın kifayət qədər böyük iqtisadi imkanları var.

Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsi tərəfindən 2012-ci ilin 6 ayı ərzində görülmüş işlərlə bağlı hesabata nəzər saldıqda isə dövlətin qaçqın və məcburi köçkünlərin sosial rifahının, həyat şəraitinin yaxşılaşdırılması istiqamətində apardığı məqsədyönlü siyasətin nəticələri hiss edilir.

Sənəddə bildirilir ki, Azərbaycan Respublikasının Prezidenti cənab İlham Əliyev 2012-ci il yanvarın 21-də Goranboy rayonunda 525 məcburi köçkün ailəsi üçün yeni salınmış 9 ədəd beşmərtəbəli yaşayış binalarından ibarət məhəllənin açılış mərasimlərində iştirak etmişdir. Məcburi köçkün ailələrinin həmin çoxmərtəbəli binalarda mənzillərə köçürülməsi təmin olunmuşdur.

Mingəçevir şəhərində ayrılmış 8 ha torpaq sahəsində 502 ailəlik 10 ədəd 9 mərtəbəli yaşayış binasının, zəruri sosial-texniki infrastruktur obyektlərinin tikintisi artıq başa çatmaq üzrədir.

Şəki şəhərində ayrılmış 84 ha torpaq sahəsində 423 ailəlik fərdi evlərdən ibarət qəsəbənin tikintisinə cari ilin yanvar ayından başlanılmış, hazırda yaşayış evlərinin, sosial-texniki infrastruktur obyektlərin tikintisi başa çatmaq üzrədir.

Ağcabədi şəhərində 556 ailəlik 10 ədəd beşmərtəbəli yaşayış binasından ibarət məhəllənin, 360 şagird yerlik məktəb binasının, 50 yerlik uşaq bağçasının, inzibati binanın, klub icma mərkəzinin, müvafiq sosial-texniki infrastruktur obyektlərinin tikintisi və məcburi köçkün ailələrinin həmin binalara köçürülməsi başa çatdırılmışdır.

Bərdə rayonunda ayrılmış 134 ha torpaq sahəsində 195 ailəlik fərdi evlərdən ibarət qəsəbədə hazırda yaşayış evlərinin, sosial-texniki infrastruktur obyektlərin tikintisi başa çatmaq üzrədir. Bundan əlavə, rayonun ərazisində 866 ailəlik yeni hündürmərtəbəli yaşayış məhəlləsinin tikintisi məqsədi ilə 14 ha torpaq sahəsi ayrılmış, texniki şərtlər alınmış, tender proseduru keçirilmiş və layihə təşkilatı ilə müqavilə bağlanılmışdır.

İmişli rayonunda ayrılmış 100 ha torpaq sahəsində 550 ailəlik fərdi evlərdən ibarət qəsəbənin salınması məqsədi ilə texniki şərtlər alınmış, layihə təşkilatı ilə müqavilə bağlanılmış, layihə-smeta sənədlərinə Fövqəladə Hallar Nazirliyinin Dövlət Ekspertiza Baş İdarəsi tərəfindən rəy verilmişdir. Hazırda fərdi yaşayış evlərinin (1-ci mərhələdə 325 ev), sosial və infrastruktur obyektlərin tikintisi davam etdirilir.

Balakən rayonunda ayrılmış 0,7 ha torpaq sahəsində 43 ailəlik 1 ədəd beşmərtəbəli yaşayış binasının tikintisi məqsədi ilə texniki şərtlər alınmış, layihə işlərinin başlanması üçün müvafiq qaydada icazə alınaraq layihə-smeta sənədləri Fövqəladə Hallar Nazirliyinin Dövlət Ekspertiza Baş İdarəsinə təqdim edilmişdir.

İsmayıllı rayonunda ayrılmış 9 hektar torpaq sahəsində 45 ailəlik fərdi evlərdən ibarət qəsəbənin salınması məqsədi ilə texniki şərtlər alınmış, layihə işlərinin başlanması üçün müvafiq qaydada icazə alınaraq layihə təşkilatı ilə müqavilə bağlanılmış, layihə-smeta sənədləri Fövqəladə Hallar Nazirliyinin Dövlət Ekspertiza Baş İdarəsinə təqdim edilmişdir.

Hacıqabul rayonunda ayrılmış 30 hektar torpaq sahəsində 101 ailəlik fərdi evlərdən ibarət qəsəbənin salınması məqsədi ilə texniki şərtlərin alınması üçün müraciətlər edilmiş, layihə təşkilatı ilə müqavilə bağlanılmışdır. Hazırda qəsəbənin layihə-smeta sənədlərinin hazırlanması davam etdirilir.

Saatlı rayonunda 13 hektar torpaq sahəsində 230 ailəlik fərdi evlərdən ibarət qəsəbənin salınması məqsədi ilə texniki şərtlər alınmış, layihə işlərinin başlanması üçün müvafiq qaydada icazə alınmış, layihə təşkilatı ilə müqavilə bağlanılmış, layihə-smeta sənədləri Fövqəladə Hallar Nazirliyinin Dövlət Ekspertiza Baş İdarəsinə təqdim edilmişdir.

Eyni zamanda, Füzuli rayonunda ayrılmış 700 hektar torpaq sahəsində 612 məcburi köçkün ailəsi üçün yeni qəsəbənin salınması məqsədi ilə texniki şərtlərin alınması üçün müraciətlər edilmiş, layihə işlərinin başlanması üçün müvafiq təşkilatla müqavilə bağlanılmışdır.

Sabirabad rayonunda ayrılmış 30 hektar torpaq sahəsində 440 ailəlik fərdi evlərdən ibarət qəsəbənin salınması məqsədi ilə texniki şərtlər alınması üçün müraciətlər edilmişdir.

Azərbaycan Respublikası Müdafiə Nazirliyinin hərbi hissələrinə məxsus binalarda müvəqqəti məskunlaşmış 1410 məcburi köçkün ailəsi üçün Bakı şəhəri, Qaradağ rayonu, Müşfiqabad qəsəbəsinin yaxınlığında ayrılmış 22 ha torpaq sahəsində zəruri sosial-texniki infrastrukturu olan yeni yaşayış məhəlləsinin tikintisi intensiv şəkildə davam etdirilir. Bakı Dövlət Universitetinin 7 yataqxanasında müvəqqəti məskunlaşmış 758 məcburi köçkün ailəsinin də həmin məhəlləyə köçürülməsi nəzərdə tutulmuşdur.

Abşeron rayonunun Masazır kəndinin ərazisində ayrılmış 12 hektar torpaq sahəsində hündürmərtəbəli binaların, sosial-texniki infrastruktur obyektlərin tikintisi intensiv şəkildə davam etdirilir.

Ağdam rayonunun "Dördyol" adlanan ərazisində yeraltı qazmalarda, qamış və çiy kərpiç daxmalarda ağır şəraitdə yaşayan 932 ailəyə fərdi evlərdən ibarət qəsəbənin salınması üçün həmin rayonun Bənövşələr (30 ha) və İmamqulubəyli (70 ha) qəsəbələri ərazisində torpaq sahələri ayrılmış, texniki şərtlər alınmış və "İnşaat pasportu" hazırlanmışdır. İmamqulubəyli qəsəbəsi ərazisində 632 ailəlik fərdi evlərdən ibarət yeni qəsəbənin salınması məqsədi ilə layihə-smeta sənədlərinin hazırlanması üçün müvafiq təşkilat ilə müqavilə bağlanmış, hazırda mühəndis-axtarış işləri davam etdirilir.

Göygöl rayonunda ayrılmış 60 hektar torpaq sahəsində 500 məcburi köçkün ailəsi üçün yeni qəsəbənin salınması məqsədi ilə texniki şərtlər alınmış və layihə təşkilatı ilə müqavilə bağlanılmışdır.

Beyləqan rayonu ərazisində 320 ailəlik fərdi evlərdən ibarət qəsəbənin yerləşdirilməsi məqsədi ilə 385 hektar torpaq sahəsi ayrılmış (o cümlədən, 320 ha suvarılan sahə nəzərə alınmaqla), texniki şərtlər alınmış, tender proseduru keçirilmiş, layihə təşkilatı ilə müqavilə bağlanmış, qəsəbənin baş planının hazırlanması başa çatdırılmışdır. Layihə-smeta sənədləri Fövqəladə Hallar Nazirliyinin Dövlət Ekspertiza Baş İdarəsinə təqdim edilmişdir. Eyni zamanda, həmin rayonun ərazisində ayrılmış 30 hektar torpaq sahəsində 146 ailəlik yeni qəsəbənin salınması məqsədi ilə texniki şərtlər alınması üçün müraciətlər edilmişdir.

Gəncə şəhəri ərazisində 1500 ailəlik məhəllənin tikintisi ilə əlaqədar 25 hektar torpaq sahəsi ayrılmış, texniki şərtlər alınmış, məhəllənin baş planı hazırlanmış və layihə təşkilatı ilə müqavilə bağlanılmışdır. Hazırda layihə-smeta sənədlərinin hazırlanması davam etdirilir.

Qazax rayonu ərazisində ayrılmış 5 hektar torpaq sahəsində 300 məcburi köçkün ailəsi üçün yeni yaşayış məhəlləsinin tikintisi məqsədi ilə texniki şərtlər alınması üçün müraciətlər edilmişdir.

Azərbaycan Respublikası Nazirlər Kabinetinin 2012-ci il 15 fevral tarixli 29s nömrəli sərəncamı ilə Qəbələ rayonunda turizmin inkişaf etdirilməsi istiqamətində aparılan quruculuq işləri ilə əlaqədar köçürülmə zərurəti yaranmış obyektlərdə müvəqqəti məskunlaşmış 155 məcburi köçkün ailəsini yeni yaşayış sahəsi ilə təmin etmək məqsədi ilə Qəbələ rayonunun Zarağan bələdiyyəsi tərəfindən Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsinə ayrılmış 4 hektar torpaq sahəsində əvvəllər inşa edilmiş 195 ailəlik məhəllənin ərazisində 155 mənzilli yeni yaşayış binalarının layihələndirilməsi və tikintisi ilə bağlı işlərin həyata keçirilməsi üçün sifarişçi təşkilat Məcburi Köçkünlərin Sosial İnkişaf Fondu təyin olunmuşdur. Layihə işlərinin həyata keçirilməsi üçün layihə təşkilatı ilə müqavilə bağlanılmış və hazırda binaların tikintisinə başlanılmışdır.

Azərbaycan Respublikası Nazirlər Kabinetinin 2012-ci il 6 fevral tarixli 24s nömrəli sərəncamına əsasən Məcburi Köçkünlərin Sosial İnkişaf Fondunun ofis binasının genişləndirilməsi məqsədi ilə texniki şərtlər alınması üçün müvafiq müraciətlər edilmişdir.

Nazirlər Kabinetinin 2012-ci il 6 fevral tarixli 24s nömrəli sərəncamına uyğun olaraq, Dövlət Neft Akademiyasının 2 saylı yataqxanasında müvəqqəti məskunlaşmış 18 məcburi köçkün ailəsinin mənzil-məişət şəraitinin yaxşılaşdırılması məqsədi ilə Abşeron rayonunun Ramana qəsəbəsində 450 məcburi köçkün ailəsi üçün salınmış qəsəbədəki boş torpaq sahəsində beşmərtəbəli yaşayış binasının layihələndirilməsi və tikintisi üzrə texniki şərtlər alınmış və layihə-smeta sənədlərinin hazırlanması üçün layihə təşkilatı ilə müqavilə bağlanılmışdır.

2015 nəfər məcburi köçkün dövlət ehtiyacları ilə əlaqədar Abşeron rayonunun ərazisində dövlət qeydiyyatına alınmış və yaşayış üçün hər cür zəruri şərtlərə cavab verən mənzillərə köçürülmüşdür.

Dövlət proqramının məcburi köçkünlərin məşğulluğunun artırılması və yoxsulluğunun azaldılması üzrə II bölməsinə uyğun olaraq, qaçqın və məcburi köçkünlər üçün yeni iş yerlərinin açılması diqqət mərkəzindədir.

Hesabat dövründə 948 nəfər, o cümlədən məcburi köçkünlərin müvəqqəti məskunlaşdıqları sıx ərazilərdə 204 nəfər, Əmək və Əhalinin Sosial Müdafiəsi Nazirliyi və onun struktur bölmələri ilə qarşılıqlı fəaliyyət nəticəsində 744 nəfər daimi işlə, 1026 nəfər isə mövsümi işlə təmin olunmuşdur. 312 nəfərə işsiz statusu verilmiş, 386 nəfərə işsizlik müavinəti təyin edilmişdir. 183 nəfər əmək bazarının müasir tələbləri əsasında peşə hazırlığı kurslarına, 66 nəfər isə ictimai işlərə cəlb olunmuşdur.

"Məcburi Köçkünlərin Yaşayış Şəraiti və Gəlir İmkanlarının Dəstəklənməsi Layihəsi" çərçivəsində dəyəri 1,2 milyon ABŞ dolları məbləğində olan müxtəlif növ 16 icma mikrolayihəsinin icrasına başlanmışdır. Bu icma mikrolayihələrinin icrası nəticəsində 8,2 min nəfər faydalanacaqdır. 30 icma mikrolayihəsi dəqiq qiymətləndirilmiş və layihə-tender sənədləri hazırlanmışdır. Daha 31 icma mikrolayihəsi isə qiymətləndirmə mərhələsindədir.

Müxtəlif rayon və şəhərlərdə 115 nəfərə (o cümlədən 93 nəfər məcburi köçkünə) ümumi məbləği 187 min manat təşkil edən mikrokreditlər verilmişdir. Bu mikrokreditlərin verilməsi nəticəsində 381 nəfər faydalanmışdır. Faydalananların 82 faizi, yaxud 312 nəfəri məcburi köçkündür.

Sahibkarlığa Kömək Milli Fondunun vəsaiti hesabına 123 qaçqın və məcburi köçkün sahibkara 9,8 milyon manatdan çox məbləğdə güzəştli kredit verilmişdir. Həmin kreditlər hesabına 300-dən çox yeni iş yeri yaradılmışdır;

Əvvəllər büdcədən maliyyələşdirilən müəssisələrdə çalışmış və işlə təmin olunmamış 11 min nəfərdən çox məcburi köçkünə orta aylıq əməkhaqqının ödənilməsi davam etdirilmişdir.

Azərbaycan Respublikası Prezidentinin 2004-cü il 1 iyul tarixli 298 nömrəli sərəncamının 2-ci bəndi üzrə Dövlətqaçqınkoma 344 müraciət (254 müraciət qaçqın və məcburi köçkünlərdən, 90 müraciət isə yerli sakinlərdən) daxil olmuş, məcburi köçkünlərin məskunlaşdıqları yerlərdən çıxarılmalarına dair 101 məhkəmə prosesində Dövlətqaçqınkomun nümayəndəsi iştirak etmişdir.

"Azərenerji" ASC tərəfindən ümumilikdə 96642 mənzildə elektrik sayğacının quraşdırılması nəzərdə tutulmuşdur. Hazırda fərdi evlərdə 57786, yığcam məskunlaşma obyektlərində 31126 mənzildə, ümumilikdə 88912 ədəd (92 faiz) elektrik sayğacı quraşdırılmışdır. Bunlardan 26855 ədədi (31 faiz) smart-kart tipli sayğacdır.

"Bakıelektrikşəbəkə" ASC tərəfindən fərdi və yığcam yaşayış yerlərində elektrik sayğaclarının quraşdırılması tam başa çatdırılmışdır. Respublikanın bütün ərazilərində, o cümlədən Bakı şəhərində ("Bakıelektrikşəbəkə" ASC və "Azərenerji" ASC üzrə) məcburi köçkünlərin yığcam məskunlaşma obyektlərinin elektrik təchizatının, digər elektrik istifadəçilərindən asılı olmayaraq, sərbəstləşdirilməsi 100 faiz başa çatdırılmışdır. Hazırda məcburi köçkünlər elektrik enerjisi ilə fasiləsiz təchiz olunur və enerji təchizatında məhdudiyyətlərə yol verilmir.

Respublikanın bütün şəhər və rayonlarında (o cümlədən Bakı şəhərində) fərdi və yığcam məskunlaşma obyektlərində nəzərdə tutulmuş qaz sayğaclarının quraşdırılması tam başa çatdırılmışdır. Məcburi köçkünlərin məskunlaşdıqları yaşayış məntəqələri və qəsəbələri qazla təchiz edilir. Yeni binalar istismara verilərkən sayğaclaşdırılır. Hazırda respublika üzrə məcburi köçkün ailələrinin yarısından çoxu (341082 nəfər) təbii qazla təchiz olunur.

Son zamanlar məcburi köçkünlər üçün tikilmiş hündürmərtəbəli binaların mənzilləri müasir istilik sistemi ilə təchiz edilir.

2012-ci ilin 6 ayı ərzində məcburi köçkünlərin kommunal xidmətlərlə bağlı yaranmış problemlərinin həll edilməsi üçün Dövlətqaçqınkom tərəfindən respublikanın müxtəlif şəhər və rayonlarının 43 məskunlaşma obyektinə 24 ədəd müxtəlif markalı güc transformatoru, 13 ədəd transformatorun KTP şkafı, 22 ədəd artezian və digər su nasosu, 2010 metr müxtəlif markalı güc kabeli, 51200 metr elektrik naqili və başqa yardımçı avadanlıq və materiallar verilmişdir.

Məcburi köçkünlərin müvəqqəti məskunlaşdıqları 25 obyektdə cari təmir işləri aparılmışdır.

Nazirlik, komitə, şirkət, konsern və səhmdar cəmiyyətlər tərəfindən bayramlar ərəfəsində məcburi köçkünlərə 3,2 milyon manat həcmində müxtəlif yardımlar göstərilmişdir.

Dövlətqaçqınkom üzrə 11 rayon (şəhər) icra hakimiyyətinə 221,8 min manat, qaçqın və məcburi köçkünlərdən daxil olmuş müraciətlər əsasında isə 83 ailəyə 7,4 min manat, cəmi 229,2 min manat məbləğində humanitar yardım verilmişdir.

Komitə tərəfindən Ermənistan-Azərbaycan, Dağlıq Qarabağ münaqişəsi haqqında həqiqətlərin dünya ictimaiyyətinin diqqətinə müntəzəm çatdırılması ilə bağlı müvafiq tədbirlər həyata keçirilmiş və bu, hazırda da davam etdirilir.

2012-ci ildə Belçika-Azərbaycan parlamentlərarası işçi qrupunun nümayəndə heyətinin üzvləri və Finlandiya parlamentinin üzvləri, Avropa Şurası Parlament Assambleyasının Avropa Şurası üzv dövlətləri tərəfindən öhdəliklərin yerinə yetirilməsi üzrə komitəsinin (Monitorinq Komitəsi) Azərbaycan üzrə həmməruzəçiləri, Fransa Senatının üzvü xanım Natali Qulenin rəhbərlik etdiyi nümayəndə heyəti, ölkəmizdə səfərdə olan Türkiyənin bir sıra kütləvi informasiya vasitələrinin nümayəndələri və "France 24" telekanalının əməkdaşları, Almaniyadan olan jurnalist Briqit Vetsel, Cənubi Koreyanın tanınmış dövlət televiziya kanalı olan KBS şirkətindən olan müxbirlər, Belçika Parlamentinin üzvü Alain Destexhenin rəhbərliyi ilə Avropa Parlamentinin üzvləri, ABŞ Konqres üzvlərinin bir qrup köməkçiləri, İrlandiyanın aparıcı mətbuat orqanı olan "İrish Times" qəzetinin müxbiri Daniel Edward, Finlandiyanın siyasi gənclər təşkilatlarının nümayəndə heyəti, Belçika Parlamentinin üzvləri Denis Dükarm və David Qerts, ABŞ-ın Avropada Təhlükəsizlik və Əməkdaşlıq üzrə Komissiyasının siyasi məsələlər üzrə müşaviri xanım Vinsom Pakerin, Avropa Parlamentinin və Almaniya Bundestaqının üzvlərindən ibarət nümayəndə heyəti komitədə olmuş, onlara Ermənistan-Azərbaycan, Dağlıq Qarabağ münaqişəsi, ölkəmizdə olan qaçqın və məcburi köçkünlərin problemləri barədə məlumat verilmiş və paytaxt Bakı, eləcə də digər rayonlarda məskunlaşmış məcburi köçkünlərlə görüşmüşlər.

Həmçinin 2012-ci il martın 5-7-də Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənovun rəhbərlik etdiyi nümayəndə heyəti Belçika-Azərbaycan parlamentlərarası əlaqələr üzrə işçi qrupunun təşəbbüsü və Belçika Federal Parlamentinin Nümayəndələr Palatasının təşkilatçılığı ilə Brüsseldə "İşğal edilmiş ərazilər, unudulmuş ərazilər (Ermənistan-Azərbaycan, Dağlıq Qarabağ münaqişəsi - hüquqi və humanitar aspektlər)" mövzusunda aparılan dinləmələrdə iştirak etmiş, Belçika Senatının sədri ilə görüşmüş, "Reuters" agentliyinin və İtaliyanın "II Sole 24 Ore" qəzetinin müxbirlərinə geniş müsahibə vermişdir.

Keçirilmiş görüşlər zamanı qonaqlara xüsusi hazırlanmış 15 dəqiqəlik "Vətən həsrəti... Sönməyən ümidlər" sənədli filmi, ulu öndər Heydər Əliyevin və Prezident İlham Əliyevin fəaliyyəti dövründə qaçqın və məcburi köçkünlərin sosial müdafiəsi, onların mənzil-məişət şəraitinin yaxşılaşdırılması, yoxsulluğun azaldılması və məşğulluqlarının artırılması ilə bağlı həyata keçirilmiş tədbirlərə həsr olunmuş məlumat kitabçaları və digər materiallar təqdim olunmuşdur.

Komitənin nəzdində olan Sənaye, AS və AFT-da 565 min manatlıq sənaye malları istehsal edilmişdir. 13579 şəxsə məcburi köçkün statusu və bu barədə müvafiq vəsiqə verilmişdir. Qaçqınların və Məcburi Köçkünlərin İşləri üzrə Dövlət Komitəsinin Mərkəzi Aparatında 4685 nəfər vətəndaş qəbul olunmuş, qaçqın, məcburi köçkünlərdən və müxtəlif təşkilatlardan daxil olmuş 24808 yazılı və şifahi müraciətə baxılmış, müraciətlərin 98,1 faizi icra olunmuş, 70,7 faizi müsbət həll edilmişdir. Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədrinin qəbulunda 421 nəfər qaçqın və məcburi köçkün, o cümlədən 141 nəfər fərdi qaydada, 280 nəfər isə kollektiv formada (2 kollektiv) olmuşdur.

Bütün bunlar göstərir ki, bu gün Azərbaycanda olan inkişaf səviyyəsinə əsasən, ölkənin qaçqın və məcburi köçkün təbəqəsi Ermənistanın paytaxtındakı əhalidən sosial və iqtisadi cəhətdən dəfələrlə artıq səviyyədə yaşayır. Bu da bizə onu deməyə əsas verir ki, Azərbaycanın sosial problemlərlə üzləşən təbəqəsi Ermənistan elitasından yaxşı yaşayırsa, deməli, bütün bunlar aparılmış məqsədyönlü siyasətin bariz nümunəsidir. Dünyanın heç bir yerində Azərbaycandakı kimi qaçqın və məcburi köçkünlərə qayğı göstərilmir. Heç bir ölkənin qaçqın və məcburi köçkün təbəqəsi Azərbaycanda olduğu kimi rahat yaşamır. Bütün görülən və görüləcək işlər təbii olaraq daha on minlərlə məcburi köçkünün mənzil-məişət şəraitini daha da yaxşılaşdıracaq, onların sosial vəziyyətinin əhəmiyyətli dərəcədə yüksəlməsinə imkan verəcək. Bu həm də Azərbaycan Prezidentinin qaçqın və məcburi köçkünlərə yüksək diqqət və qayğısının bariz təzahürüdür. Prezident İlham Əliyevin siyasətini hər zaman dəstəkləyən və onun ətrafında sıx birləşən qaçqın və məcburi köçkünlər yurd həsrətinə son qoyulacaq günün uzaqda olmadığına qəti əmindirlər. Çünki dövlətin, onun rəhbərinin bu istiqamətdə atdığı addımları, həyata keçirilən məqsədyönlü siyasətin uğurlu nəticələrini aydın görürlər.

Rəşad BAXŞƏLİYEV

Azərbaycan.- 2012.- 17 avqust.- S. 2.