Ağdamda yeni arxeoloji materiallar aşkar edilmişdir

Ağdam rayonunun cəbhə xəttində yerləşən Mirəşelli kəndi yaxınlığındakı "Palıdlı" nekropolunda aparılan arxeoloji qazıntı zamanı yeni tarixi materiallar aşkarlanmışdır.

AMEA Arxeologiya və Etnoqrafiya İnstitutu Qarabağ ekspedisiyasının rəhbəri professor Hidayət Cəfərov AzərTAc-a bildirmişdir ki, "Palıdlı" nekropolunda e.ə. XII-XI əsrlərə aid daha beş torpaq qəbir aşkar edilmişdir. Heç bir yerüstü əlamətə malik olmayan qəbirlər qadına, kişiyə, yaşlı, yeniyetmə və uşağa məxsusdur. Ölülər sol və ya sağ yanı üstə bükülü vəziyyətdə, başları əsasən Şərqə, ayaqları Qərbə olmaqla dəfn edilmişlər. Qəbirlərdən 30-a qədər saxsı qab, küp, sərnic, bardaq, cam, nehrə, qadın skeletlərinin üzərindən külli miqdarda bəzək əşyaları (qolbaqlar, üzüklər, sırğalar, mindən artıq əqiq, Misir pastası, şüşə və tuncdan muncuqlar) aşkar edilmişdir. Keramika nümunələri dulus çarxında hazırlanmışdır. Simmetrik quruluşlu, oturacaqları yastı, gövdədən yuxarı hissədə qabarıqdır. Üzəri çərtmə üsulu ilə dalğavari, həndəsi və sair naxışlarla örtülüdür. Tapıntılar nekropolda müxtəlif sosial təbəqədən olan insanların dəfn olunduğunu göstərir.

Professor Hidayət Cəfərov deyir ki, Xocalı-Gədəbəy mədəniyyətinə aid bu tapıntılar qazıntı aparılan ərazidə son tunc və ilk dəmir dövründə davamlı yaşayış olduğunu, sənətkarlığın müxtəlif sahələrinin inkişafını təsdiqləyir. Bu materiallar ermənilərin ərazi iddialarının əsassız olduğunu, Qarabağın aran və dağlıq ərazilərində tarixən eyni mədəniyyətin daşıyıcılarının yaşadıqlarını bir daha təsdiq edir. Qarabağda aparılan arxeoloji qazıntılar həm qədim tariximizin öyrənilməsi, həm də Qarabağ tarixini özününküləşdirməyə çalışan ermənilərə cavab baxımından əhəmiyyətlidir.

Tədqiqatlar sentyabrın 10-dək davam edəcəkdir. Bu tədqiqatlar Qarabağın zəngin tarixinə yeni töhfələr verəcəkdir.

Azərbaycan.- 2012.- 19 avqust.- S. 6.