GUAM-ın dünyada nüfuzu getdikcə artır

Dekabrın 19-da Milli Məclisin Sədri Oqtay Əsədov GUAM PA-nın Bakıda keçirilən beşinci iclasında iştirak etmək üçün Bakıya gəlmiş təşkilata üzv ölkələrin parlament nümayəndə heyətlərinin rəhbərləri ilə görüşdü.

GUAM-a üzv olan ölkələr arasında əlaqələrin həm ikitərəfli, həm də təşkilat çərçivəsində inkişaf etdiyini bildirən Oqtay Əsədov bildirdi ki, Assambleyanın beşinci sessiyası qarşılıqlı əməkdaşlığıın daha da genişlənməsinə xidmət edir. Milli Məclisin Sədri diqqətə çatdırdı ki, GUAM-ın dünyada nüfuzu getdikcə artır, mövqeyi daha da möhkəmlənir. Bakıda keçirilən V iclasda Avropanın beş aparıcı təşkilatının iştirak etməsi, iki gün əvvəl BMT ilə GUAM arasında əməkdaşlığa dair sənədin imzalanması buna parlaq misaldır: "Düşünürəm ki, bizim beynəlxalq tərəfdaşlarımızın sayı daha da artacaq və qarşıya qoyduğumuz məqsədlərə nail olacağıq".

GUAM-ın baş katibi Valeri Çeçelaşvili Bakıda keçirilən tədbirin yüksək səviyyədə təşkilinə görə nümayəndə heyətləri adından minnətdarlığını bildirdi. O qeyd etdi ki, bu cür tədbirlər qarşıya qoyulan məqsədlərə çatmaq, ölkələrin qarşılaşdığı problemlərin həlli, eləcə də əməkdaşlığın daha da genişləndirilməsi baxımından çox əhəmiyyətlidir. Onun sözlərinə görə, təşkilata üzv olan ölkələr GUAM çərçivəsində çox sıx əməkdaşlıq edirlər. Azərbaycanın təşkilata rəhbərliyi dövründə əldə olunan nailiyyətləri yüksək qiymətləndirən baş katib dedi ki, bu dövrdə bir çox beynəlxalq təşkilatların GUAM-la əməkdaşlıq etməsi beynəlxalq aləmdə təşkilatın nüfuzunun artmasına və mövqelərinin möhkəmlənməsinə xidmət edir.

Görüşdə GUAM-a üzv olan ölkələr, eləcə də tərəfdaş dövlətlər arasında əməkdaşlığın inkişaf perspektivləri və qarşılıqlı maraq doğuran məsələlər ətrafında fikir mübadiləsi aparıldı.

Rəşad BAXŞƏLİYEV,

Azərbaycan.-2012.- 20 dekabr.- S.3.