Pakistanın nüfuzlu «Daily Xabrian» qəzetində «Azərbaycan-Pakistan münasibətləri - 20 il, XXI əsrin çağırışları» sərlövhəli məqalə dərc olunmuşdur

Pakistanın nüfuzlu urdudilli "Daily Xabrian" qəzetində "Azərbaycan-Pakistan münasibətləri - 20 il, XXI əsrin çağırışları" sərlövhəli məqalə dərc edilmişdir.

Ölkəmizin Pakistandakı səfirliyindən AzərTAc-a bildirmişlər ki, məqalənin müəllifi Azərbaycan-Pakistan Fondunun rəhbəri, Azərbaycan Diplomatik Akademiyasının məzunu, Pakistan Təhlükəsizlik Siyasəti Mərkəzinin sədri Çoudri Naman Zəfərdir.

Məqalədə ölkələrimiz arasındakı səmimi dostluq münasibətlərindən bəhs edilmiş, Pakistanın Azərbaycanın müstəqilliyini tanıyan ilk ölkələrdən olduğu qeyd olunmuşdur. Müəllif Azərbaycanın ümummilli lideri Heydər Əliyev və Pakistanın tanınmış siyasətçisi Benazir Bhutto tərəfindən iki dövlət arasında strateji əlaqələrin özülünün qoyulduğunu, bu münasibətlərin həyatın bütün sahələrini əhatə etdiyini diqqətə çatdırmışdır.

N.Z.Çoudri Pakistanın Azərbaycanla əlaqələrin daha da genişlənməsində maraqlı olduğunu, hər iki ölkənin beynəlxalq və regional məsələlərdə mövqelərini dəstəklədiklərini vurğulamışdır.

Yazıda rəsmi İslamabadın Ermənistan-Azərbaycan, Dağlıq Qarabağ məsələsində birmənalı mövqedən çıxış edərək minlərlə günahsız insanı qəddarcasına qətlə yetirdiyinə görə işğalçı Ermənistanı bir dövlət kimi tanımadığı, Pakistan parlamentində Xocalı soyqırımını tanıyan və Azərbaycanın ərazi bütövlüyünü dəstəkləyən qətnamə qəbul edildiyi də qeyd edilmişdir. Müəllif, urdudilli oxuculara Azərbaycanın da Kəşmir məsələsində Pakistanın mövqeyini BMT və digər beynəlxalq forumlarda dəstəklədiyi barədə məlumat vermişdir.

N.Z.Çoudri ölkələrimiz arasındakı yüksək səviyyəli siyasi münasibətlərin daha da genişləndirilməsini, parlamentlər arası əlaqələrin inkişafının, qarşılıqlı səfərlərin təşkilinin vacibliyini vurğulamış, Azərbaycan-Pakistan Fondunun qarşısında duran vəzifələrdən söz açmışdır. Məqalənin tam mətni ilə bu http://azembassy-pakistan.com/archives/1612 linkdən tanış ola bilərsiniz.

Azərbaycan.-2012.- 31 dekabr.- S.7.