SOCAR-AQŞ ən yeni qazma texnologiyalarından istifadə edir

SOCAR-AQŞ Məhdud Məsuliyyətli Cəmiyyət (MMC) təsisçiləri olan iki şirkətin - Azərbaycan Respublikası Dövlət Neft Şirkətinin və Abşeron Qazma Şirkətinin adından ad alıb. Bu, inteqrə olunmuş qazma və quyu xidmətləri ilə məşğul olan bir şirkətdir.

SOCAR-AQŞ 2011-ci ildə "Azneft" İstehsalat Birliyinin sifarişi ilə 24533 metr qazma işi həyata keçirərək plana 101 faiz əməl edib. Bundan əlavə, keçən il "Günəşli" yatağındakı 11 nömrəli özüldən layihə dərinliyi 3373 metr olan 209 nömrəli quyuda qazma işləri də müəssisə tərəfindən 43 gün ərzində başa çatdırılıb. Bu, rekord nəticə hesab olunur. Üstəlik də, qazma işləri tam təhlükəsiz şəraitdə aparılıb, ətraf mühitə və avadanlıqlara heç bir ciddi ziyan dəyməyib, bütün quyularda səmərəli vaxt itkisi minimuma endirilib.

Bunlar şirkətin qazandığı ilk nailiyyətlər deyil. Özü cavan olsa da, təsisçilərindən böyük səriştə əxz edib. Yəni ARDNŞ birgə müəssisəyə sənaye üsulu ilə neft və qaz quyularının qazılması sahəsində qazandığı təcrübədən "pay verib". Abşeron Qazma Şirkəti isə buraya qabaqcıl qazma texnologiyalarını və yeni idarəetmə üsullarını gətirib.

Bu təcrübə və idarəetmə metodları birləşərək müəssisəyə öz işini yüksək səviyyədə qurmağa imkan verir. Beləliklə, SOCAR-AQŞ fəaliyyətinin əsas meyarlarını müəyyənləşdirib. Təhlükəsizliyi, keyfiyyəti, dürüstlüyü, yenilikçiliyi, qənaətçilliyi ön cərgəyə çəkib.

Şirkət bunları göstərdiyi bütün xidmət sahələrində tətbiq etməyə çalışır. Bu xidmətlər isə geniş əhatə dairəsinə malikdir. Belə ki, SOCAR-AQŞ quyuların layihələşdirilməsi və planlaşdırılması ilə məşğul olur. O, həm də neft və qaz quyularının qazılmasını həyata keçirir. Şirkətin maili və üfiqi qazmada yüksək səriştəyə malik olan işçiləri quyuların mənimsənilməsində də uğur əldə etməyə qabildirlər.

Qazma sahəsində yan lülələrin, eləcə də çoxşaxəli quyuların qazılması asan işlərdən sayılmır. Lakin SOCAR-AQŞ-nin qazmaçılarının həmin mürəkkəb işi yerinə yetirmək üçün də bilik və səriştəsi kifayət qədərdir. Təbii ki, bütün bu çətin vəzifələrin öhdəsindən layiqincə gələ bilən mütəxəssislər, texniklər və ixtisaslı fəhlələr hər bir quyunun "dərd"inə çarə tapmağı da bacarırlar. Yəni hər bir quyunu yaxşı tanıdıqları üçün onları əsaslı təmir etməkdə problemləri olmur.

Kadrlardan söz düşmüşkən:

SOCAR-AQŞ işçilərini ən böyük sərvət hesab edir. Müəssisə əməkçilərə hərtərəfli qayğı göstərir və əmindir ki, bunun cavabında onlar SOCAR-AQŞ-ni dünya səviyyəli qazma şirkətinə çevirəcəklər.

Şirkət Xəzərdə üç qazma qurğusundan istifadə edərək tapşırıqları yüksək səviyyədə yerinə yetirir. Sifarişçisi isə "Azneft" İstehsalat Birliyidir.

Bütün işlərdə STTƏMM başlıca məqsəd kimi qarşıya qoyulur. Bu da təsadüfi deyil. Çünki STTƏMM - Sağlamlıq, Texniki Təhlükəsizlik və Ətraf Mühitin Mühafizəsi deməkdir. Bunları rəhbər tutmaqla SOCAR-AQŞ "İlin hər bir gününü, saatını və anını qəzasız işləmək və yaşamaq mümkündür!" fikrini sübut edə bilir. Müəssisə ətrafdakı təbii mühitdə ekoloji balansın qorunub saxlanılması və yaxşılaşdırılması üçün əlindən gələni edir.

Bütün bunlar şirkətin nüfuzunu ildən-ilə artırır. İndi müəssisənin öz nailiyyətləri barədə deməyə sözü çoxdur. Təsadüfi deyil ki, o, öz təcrübəsi və müvəffəqiyyətləri ilə keçən il Bakıda keçirilən XVIII beynəlxalq neft və qaz sərgisinə də gəlmişdi. Məlum oldu ki, şirkət yeni qazma texnologiyalarının və idarəetmə üsullarının tətbiqinə görə Xəzər Enerji İnteqrasiya İşgüzar Klubunun mükafatını alıb.

SOCAR-AQŞ həmçinin bir sıra beynəlxalq sertifikatlara layiq görülüb. Bunlar İnteqrə olunmuş İdarəetmə Sisteminin müvəffəqiyyətlə tətbiq edilməsinə görə verilən ISO 9001:2008, ISO 14001:2004 və OHSAS 18001:2007 sertifikatlarıdır.

2009-cu ilin iyun ayından etibarən Qazma Podratçılarının Beynəlxalq Assosiasiyasının (IADC) üzvü olan şirkət qazandığı müvəffəqiyyətlərlə kifayətlənmir. Qazmaçılar öz bilik və səriştələrini daim artırmağa, peşə ustalıqlarını daha da təkmilləşdirməyə çalışırlar.

Flora SADIQLI

Azərbaycan.- 2012.- 5 fevral.- S. 4.