Konstitusiya Şurası Fransa Əsas Qanununun tələblərindən çıxış edərək qondarma «erməni soyqırımı»nın inkarına görə cəza nəzərdə tutan qanunu təsdiqləməyəcəkdir

Xəbər verdiyimiz kimi, Fransa-Qafqaz dostluq qrupunun sədr müavini, Fransa-Azərbaycan işçi qrupunun rəhbəri senator xanım Natali Qulenin başçılıq etdiyi parlament nümayəndə heyəti Azərbaycanda səfərdədir. Nümayəndə heyətinin rəhbəri və üzvləri Azərbaycan Dövlət Teleqraf Agentliyinə (AzərTAc) məxsusi müsahibə vermişlər. Həmin müsahibəni oxuculara təqdim edirik.

- Azərbaycana səfərinizin, keçirdiyiniz çoxsaylı görüşlərin nəticələrini necə qiymətləndirirsiniz?

Senator Natali Qule: İlk növbədə qeyd etmək istərdim ki, mən artıq Azərbaycanda bir neçə dəfə olmuşam. Həmkarlarımın isə ölkənizə ilk səfəridir. Hesab edirəm ki, onlar fikirlərini bildirsələr daha yaxşı olar.

Bildiyiniz kimi, səfərimizin proqramı çox sıx idi. Biz bir çox maraqlı məsələlərin müzakirə edildiyi olduqca məhsuldar görüşlər keçirdik.

Senator Cani Lorju: Azərbaycanda yüksək qonaqpərvərliyin şahidi olduq. Görüşlərimiz olduqca səmimi şəraitdə keçdi. Biz həmçinin ölkənizdə tolerantlığın nə dərəcədə yüksək olduğunu gördük.

Senator xanım Silvi Qo-Şavan: Bu, mənim də Azərbaycana ilk səfərimdir. Çox şadam ki, yüksək mədəniyyətə, sivilizasiyaya malik bir xalqı yaxından tanıdım. Mən Bakıdan Parisə xoş təəssüratlarla qayıdacağam.

Səfər çərçivəsində qaçqın və məcburi köçkünlərlə görüşdük, onların vəziyyəti ilə tanış olduq. Şəxsən mən bu görüşü heç vaxt unutmayacağam. Hesab edirəm ki, Azərbaycanın üzləşdiyi əsas problemlərdən biri məhz qaçqın və məcburi köçkünlərlə bağlıdır. Bu sahədə bir çox işlərin görülməsinə ehtiyac vardır. Mən və buradakı senatorların hər biri Azərbaycanın problemlərini yaxşı başa düşürük və bu problemlərin həlli istiqamətində töhfəmizi verməyə hər zaman hazırıq.

Senator Erve More: Azərbaycana səfərimiz zamanı mən zəngin mədəniyyətə malik bir ölkə kəşf etdim. Ölkənizin siyasi, iqtisadi, mədəni həyatına dair çoxlu informasiya əldə etdim.

Biz azərbaycanlı qaçqın və məcburi köçkünlərin yaşayış şəraiti ilə tanış olduq. Hesab edirəm ki, Fransa ictimaiyyətinin onların vəziyyəti haqqında daha geniş məlumatı olmalıdır və biz bu istiqamətdə səylə çalışacağıq.

Senator Andre Rexar: Yüksək mədəniyyət, qonaqpərvərlik, məhsuldar görüşlər, faydalı fikir mübadiləsi - Azərbaycana səfərimizlə bağlı təəssüratlarım bundan ibarətdir. Bu səfər mənim üçün Azərbaycanın regional məsələlərə həssas münasibətini daha dərindən anlamaq baxımından faydalı oldu.

- Qondarma "erməni soyqırımı"nın inkarına görə cəza nəzərdə tutan qanunla bağlı Konstitusiya Şurasının çıxaracağı qərar haqqında nə deyə bilərsiniz?

Xanım Natali Qule: Fransa Senatında bir çox senatorlar bu qanunla bağlı Konstitusiya Şurasına şikayət ərizəsinə imza atmışlar. Çünki hesab edirik ki, parlamentarilər tarix yazmamalı, yalnız qanunverici fəaliyyətlə məşğul olmalıdırlar. Bu məsələ Fransa Konstitusiyasının 34-cü maddəsində də öz əksini tapmışdır. Ona görə də biz çox böyük ümidlə və inamla gözləyirik ki, Konstitusiya Şurası Fransa Konstitusiyasının tələblərini rəhbər tutaraq bu qanunu təsdiq etməyəcəkdir.

Qanunla bağlı Senatda gedən müzakirələr Azərbaycanın da diqqət mərkəzində olmuşdur. Azərbaycan cəmiyyətində bununla bağlı narazılıqlar başa düşüləndir. Səfər zamanı keçirdiyimiz görüşlərdə də bunun tam şahidi olduq.

Cani Lorju: Mən bir məsələni qeyd etmək istəyirəm. Fransa Prezidenti Nikola Sarkozi Konstitusiya Şurasının sözügedən qanunu təsdiqləməyəcəyi təqdirdə, onu ikinci dəfə quruma təqdim edəcəyini bildirmişdir. Əgər belə bir hal baş verərsə, bu, hakimiyyətlərin bölünməsi prinsipinə zidd olaraq Konstitusiya Şurasına təzyiq kimi qəbul ediləcəkdir. Ancaq mən hesab edirəm ki, Konstitusiya Şurası elə birinci dəfədən bu qanunu təsdiq etməyəcəkdir.

- Fransa ATƏT-in Minsk qrupunun həmsədridir. Senatın qəbul etdiyi qanun Ermənistan-Azərbaycan, Dağlıq Qarabağ münaqişəsinin nizamlanması prosesində bu ölkənin tərəfsizliyini şübhə altında qoyur. Bu məsələyə münasibət bildirmənizi xahiş edirəm.

Cani Lorju: Senatda qəbul edilən qanunun bu məsələ ilə bağlı Azərbaycan ictimaiyyətində narahatlıq yaratdığını yaxşı başa düşürük. Bu barədə keçirdiyimiz görüşlərdə də müzakirələr aparıldı. Əlbəttə, səhv addımın qarşısı alınmalıdır. Biz əminik ki, Fransa ATƏT-in Minsk qrupu çərçivəsində obyektivliyini qoruyub saxlayacaqdır.

Xanım Natali Qule: Ermənistan-Azərbaycan, Dağlıq Qarabağ münaqişəsi ilə bağlı Fransanın mövqeyi qətidir. Fransa Azərbaycanın ərazi bütövlüyünü dəstəkləyir. Biz hesab edirik ki, işğal edilmiş torpaqlar geri qaytarılmalı, qaçqın və məcburi köçkünlər doğma yurdlarına dönməlidirlər. Bir daha vurğulamaq istəyirəm ki, Fransanın bu mövqeyi dəyişməyəcəkdir.

Andre Rexar: Mən də tam əminliklə deyə bilərəm ki, sağlam düşüncə qalib gələcəkdir. Fransanın Dağlıq Qarabağ münaqişəsi ilə bağlı mövqeyi dəyişməz olaraq qalacaqdır.

Azərbaycan.- 2012.- 10 fevral.- S.3.