Azərbaycanın xarici siyasətində Almaniya ilə əlaqələr əhəmiyyətli yer tutur

Fevralın 15-də Yeni Azərbaycan Partiyası (YAP) sədrinin müavini - icra katibi, Milli Məclisin deputatı Əli Əhmədov ölkəmizdə səfərdə olan Almaniya Buntestaqının üzvü Mixail Fuks ilə görüşmüşdür.

YAP-ın mətbuat xidmətindən AzərTAc-a bildirmişlər ki, görüşdə Ə.Əhmədov ölkələrimiz arasında əməkdaşlıq münasibətlərindən danışmış, Azərbaycanın xarici siyasətində Almaniya ilə əlaqələrin əhəmiyyətli yer tutduğunu bildirmişdir.

İcra katibi qonağa Ermənistan-Azərbaycan, Dağlıq Qarabağ münaqişəsi, bu məsələnin sülh yolu ilə həll edilməsi istiqamətində Azərbaycanın həyata keçirdiyi siyasətdən, həmçinin YAP-ın yaranma tarixi, keçdiyi inkişaf yolu və ölkəmizin ictimai-siyasi həyatındakı mövqeyi barədə ətraflı məlumat vermişdir.

Görüşdə YAP ilə Almaniya Xristian Demokrat Birliyi arasında əlaqələrin daha da inkişaf etdirilməsi istiqamətində qarşılıqlı görüşlərin keçirilməsinin vacibliyi vurğulanmışdır.

Almaniya Buntestaqının üzvü Mixail Fuks ölkəmizdə olmağından məmnunluğunu bildirmiş, son vaxtlar Azərbaycanda geniş quruculuq-abadlıq işlərinin aparılmasını ölkənin iqtisadi inkişafının göstəricisi olduğunu demişdir. Qonaq Azərbaycanın Avropanın enerji təhlükəsizliyində xüsusi rol oynadığını vurğulamışdır.

Azərbaycan.- 2012.- 16 fevral.-S.2.