İnkişaf bütün sahələri əhatə edir

Nazirlər Kabinetinin 2011-ci ilin sosial-iqtisadi inkişafının yekunlarına və 2012-ci ildə qarşıda duran vəzifələrə həsr olunmuş iclasında Azərbaycan Prezidenti İlham Əliyevin söylədiyi dəyərli fikirlər, verdiyi qiymətli tövsiyələr bölgələrdə geniş təhlil olunur, cari ilin aydın fəaliyyət istiqamətlərini müəyyənləşdirir. Mingəçevir şəhər fəallarının yığıncağı da məhz bu məsələyə həsr olunmuşdur.

Hesabat məruzəsi ilə çıxış edən Mingəçevir Şəhər İcra Hakimiyyətinin başçısı Mübariz Ağayev keçən il şəhərin sosial-iqtisadi həyatında qazanılmış nailiyyətləri geniş təhlil etdi. O, davamlı dövlət qayğısının ünvanına çevrilmiş Mingəçevirin öz simasını sürətlə dəyişərək gözəlləşməsini, şəhər əhalisinin həyat şəraitinin ildən-ilə yaxşılaşmasını dövlət başçısının ölkənin əsas enerji təminatçısı olan nur şəhərinə və bu şəhərin qədirbilən, əməksevər sakinlərinə xüsusi münasibətinin məntiqi nəticəsi olduğunu dönə-dönə vurğuladı.

Tikilib qurulması xalqımızın ümummilli lideri Heydər Əliyevin adı ilə sıx bağlı olan Mingəçevir son illər dinamik inkişaf etməkdədir. Tərəqqi, yüksəliş yolunda 2011-ci ilin xüsusi yeri vardır. Ötən il şəhərdə sosial-iqtisadi inkişafın yekunları kifayət qədər uğurlu olmuşdur. İl ərzində ümumi məhsul buraxılışı 41,5 faiz artaraq 287 milyon manata çatmışdır. Sənaye məhsulu istehsalı 24,9 faiz, tikinti-quraşdırma işlərinin həcmi 2,6 dəfə, ticarət və iaşə xidməti 17,6 faiz, kənd təsərrüfatı məhsulları istehsalı 28,5 faiz artmışdır. Nailiyyətlərlə yola salınan 2011-ci ildə abadlıq, tikinti-quruculuq işləri diqqət mərkəzində olmuşdur. İl ərzində şəhərin küçələrində və yaşayış massivlərində bütövlükdə 7 milyon manatlıqdan çox abadlıq və əsaslı təmir işləri aparılmışdır. Küçə və meydanlarda məhəllədaxili ərazilərdə 225 kvadratmetr sahəyə asfalt örtüyü salınmış, 540 işıqlandırıcı dirək quraşdırılmış, binaların 32 min kvadratmetr fasad hissəsi rənglənmişdir. "Dostluq" parkı bərpa edilərək yeni görkəm almışdır. Şəhərin sağ sahil hissəsində yeni istirahət parkı salınmışdır. Park və xiyabanlarda 15 min kvadratmetr sahəyə tamet və metlax döşənmişdir. Şəhərin müxtəlif yerlərində üç yeni fəvvarə inşa edilmiş, 15 min kvadratmetr sahədə yaşıllıq salınmış, 30 mindən çox ağac və dekorativ gül kolları əkilmişdir.

Şəhər əhalisinin aztəminatlı təbəqəsinə davamlı dövlət qayğısı təmin edilmişdir. 2011-ci ildə 1891 ailəyə ünvanlı sosial yardım verilmiş, 4576 nəfərə sosial müavinət ödənilmişdir. Şəhərin elektrik, qaz və su təsərrüfatı, istilik təchizatı sistemində zəruri təmir-bərpa işləri aparılmış, xidmət sahələrinin ahəngdar fəaliyyəti təmin olunmuşdur.

Hesabat ilində vətəndaşlardan daxil olan ərizə və şikayətlərin xeyli azalması yığıncaqda razılıqla qeyd olunmuşdur. Bu, ilk növbədə, vətəndaşlarla düzgün qurulan əlaqənin, qarşılıqı inam və etimaddan qaynaqlanan yaradıcı işin məntiqi nəticəsidir. Bu məsələdə ənənəyə çevrilmiş səyyar qəbulların da rolu böyükdür. Şəhər sakinlərinin rahatlığına hesablanan genişmiqyaslı abadlıq və quruculuq işləri, vətəndaşların mənzil şəraitini yaxşılaşdırmağa yönələn tədbirlər və onların maddi rifah halının yaxşılaşdırılması istiqamətində artan dövlət qayğısı cəmiyyətin müxtəlif təbəqələrində razılıqla qarşılanır, dövlət başçısının humanist və sosialyönümlü daxili siyasəti birmənalı şəkildə müdafiə olunur.

Yığıncaqda Prezident Administrasiyasının məsul işçisi Habil Əzəmmədov və Milli Məclisin deputatı Aydın Mirzəzadə çıxış etdilər.

Lazım QULİYEV,

Azərbaycan.- 2012.- 16 fevral.- S.5.