Belə

Körpə gülüm, ləçəklərin

Niyə vaxtsız soldu belə?

Sinəndəki qızartılar

Lalə, yoxsa qandı belə?

Yağ qalmadı ürəklərdə,

Qəm yurd saldı diləklərdə,

Belə zülmə fələklər də

Qan ağladı, yandı belə.

Öz evində-eşiyində

Dayanıblar "keşiyində",

Körpələrin beşiyində

İlk kəlməsi dondu belə.

Vətən üçün yanır ürək,

Bir can nədir əsirgəyək?

Gedənlərə rəhmət deyək

Qalanların andı belə.

Valeh RƏHİMLİ

Azərbaycan.- 2012.- 26 fevral.- S.10.