ATƏT PA-nın 2014-cü il yaz sessiyası Azərbaycanda keçiriləcək

Milli Məclis Sədrinin müavini Bahar Muradova: "Həmin vaxtadək Azərbaycanın inkişafı, mövcud durumu barədə geniş məlumatlar üzv dövlətlərə çatdırılacaq"

"ATƏT Parlament Assambleyasının (ATƏT PA) 2014-cü il yaz sessiyasının Bakıda keçirilməsi ilə bağlı razılıq əldə olunub. İqtisadi məsələlərə həsr olunacaq sessiyada Azərbaycanın təklif edəcək bir neçə layihələri olacaq". Bunu dünən Milli Məclisdə keçirilən mətbuat konfransında ATƏT PA-da Azərbaycan nümayəndə heyətinin rəhbəri, Milli Məclis Sədrinin müavini Bahar Muradova söyləyib. Qeyd edək ki, parlamentdə təşkil olunan mətbuat konfransında həm Azərbaycanın ATƏT PA-dan, həm də Avronest PA-dakı nümayəndə heyətlərinin səfərləri barədə geniş məlumat verilib.

Bakıda keçirilməsi nəzərdə tutulan sessiyadan danışan Bahar Muradova bildirib ki, 2014-cü ilə kimi ATƏT PA tədbirləri çərçivəsində Azərbaycanın inkişafı, mövcud durumu barədə məlumatlar üzv dövlətlərə çatdırılacaq. Eyni zamanda, avropalı həmkarlarını may ayında Bakının ev sahibliyi edəcəyi 57-ci "Evrovizion" mahnı müsabiqəsinə dəvət edən Bahar Muradova bu tədbirin Azərbaycan xalqının mədəniyyəti, adət-ənənələri, milli dəyərləri və qonaqpərvərliyi ilə ölkəmizə gələnlərin yaxından tanış olmaları üçün gözəl fürsət yaradacağını vurğulayıb.

Fevralın 21-dən 25-dək Avstriyanın Vyana şəhərində keçirilən toplantıya qatılan Azərbaycan nümayəndə heyətinin üzvləri - Milli Məclisin Aqrar siyasət komitəsinin sədri Eldar İbrahimov, İnsan hüquqları komitəsinin sədri Rəbiyyət Aslanova, Regional məsələlər komitəsinin sədr müavini Fəttah Heydərov və deputat Ağalar Vəliyev ATƏT PA-nın sessiyasında Dağlıq Qarabağ münaqişəsi və Xocalı faciəsi ilə bağlı məlumat veriblər. Bahar Muradovanın sözlərinə görə, ATƏT-in baş katibi Lamberto Zannier də çıxışında Dağlıq Qarabağ münaqişəsinə toxunub. Azərbaycan nümayəndə heyətinin üzvlərinin Fransada qondarma erməni soyqırımının inkarına görə cinayət məsuliyyətini nəzərdə tutan qanun və Xocalı faciəsi ilə bağlı çıxışlarına erməni təmsilçiləri etiraz etməyə çalışıb. Bahar Muradova deyib: "Məqsəd ATƏT və Fransa rəsmilərinin bu məsələyə reaksiya verməsinə nail olmaq idi. Fransa nümayəndə heyətinin rəhbəri bildirdi ki, "soyqırımı"nın inkarına görə cinayət məsuliyyətini nəzərdə tutan qanun hələ Konstitusiya Şurasındadır, bu, Türkiyəyə qarşı yönəlməyib. ATƏT baş katibi Lamberto Zannier isə tərəfləri Dağlıq Qarabağ münaqişəsində ortaq mövqelərin tapılmasına çağırdı".

Bahar Muradova diqqətə çatdırıb ki, ATƏT-in Minsk qrupunun məqsədi Dağlıq Qarabağ münaqişəsi ilə bağlı status-kvonun, atəşkəsin qorunub saxlanması deyil, münaqişənin həllinə nail olmaqdır: "Ancaq ATƏT məruzəçisinin hazırladığı sənəddə Dağlıq Qarabağ münaqişəsi ilə bağlı yalnız bir ifadə yer alıb və bu münaqişənin həllinə deyil, digər məqama yönəldilir. Biz buna etirazımızı bildirdik. Monakoda qəbul ediləcək qətnamədə Dağlıq Qarabağ münaqişəsi ilə bağlı bizim zəruri saydığımız müddəalar əksini tapmalıdır. Biz bu istiqamətdə çalışacağıq".

Bahar Muradovanın bu il ATƏT-ə sədrlik edən İrlandiyanın ATƏT PA-dakı nümayəndə heyəti ilə görüşündə də əsas müzakirə mövzusu Dağlıq Qarabağ münaqişəsi ilə bağlı olub. İrlandiya parlament nümayəndə heyətinin rəhbəri Yorqan Mörfi bildirib ki, ölkəsinin siyasi rəhbərliyi ATƏT-ə sədrlik çərçivəsində Dağlıq Qarabağ münaqişəsi də daxil olmaqla dondurulmuş münaqişələri diqqət mərkəzində saxlayacaq və bu istiqamətdə dönüş yaratmağa çalışacaq. Bununla əlaqədar 2012-ci ilin İrlandiyanın xarici siyasətində gərgin il olacağını qeyd edən Y.Mörfi aprel ayında Dublin şəhərində beynəlxalq ekspertlərin iştirakı ilə Şimali İrlandiya nümunəsində münaqişələrin nizamlanmasına həsr olunmuş konfrans keçiriləcəyini bildirib.

B.Muradova qeyd edib ki, münaqişənin həlli üçün ilk növbədə ATƏT-in Minsk qrupunun həmsədrləri işğalçı ölkəyə təzyiq göstərməlidirlər. İrlandiya isə bu baxımdan məsələyə qlobal yanaşaraq Ermənistanın beynəlxalq hüququn norma və prinsiplərinə riayət etməsinə çalışmalıdır.

Azərbaycanın ATƏT Parlament Assambleyasındakı nümayəndə heyətinin üzvü, Milli Məclisin İnsan hüquqları komitəsinin sədri Rəbiyyət Aslanova isə jurnalistlərin diqqətinə çatdırıb ki, qurumun qış sessiyasında, komitə iclaslarında Azərbaycanda insan hüquqları ilə bağlı məsələ müzakirə olunmayıb. Onun sözlərinə görə, Azərbaycanda məhkəmə islahatları nəticəsində əldə edilən nailiyyətlər, Azərbaycanın milli azlıqlarla bağlı qazandığı uğurlar da sessiyada qeyd edilib.

Sonda Bahar Muradova vurğulayıb ki, Azərbaycan nümayəndə heyəti Dağlıq Qarabağ münaqişəsinin ATƏT PA-nın iclaslarında aktual mövzu kimi qalması üçün bundan sonra da daim səylərini davam etdirəcək, avropalı həmkarları ilə müvafiq iş aparacaq.

Mətbuat konfransında Milli Məclisin deputatı Azay Quliyev Avronest Parlament Assambleyasının Elm-təhsil və vətəndaş cəmiyyəti komitəsinin Ermənistanda keçirilən iclasında müzakirə olunan məsələlər və əldə olunan nəticələr barədə məlumat verib. Onun sozlərinə görə, Azərbaycan nümayəndə heyəti sözügedən toplantıda bəzi təzyiqlərə baxmayaraq, Ermənistan-Azərbaycan, Dağlıq Qarabağ münaqişəsinə toxunaraq ölkəmizin 20 faiz torpağının işğal edildiyini, 1 milyondan çox qaçqın və məcburi köçkünümüzün olduğunu iştirakçıların diqqətinə çatdırıb. İki gün davam edən iclasda sosial, elm-təhsil, vətəndaş cəmiyyəti, yoxsulluq və Avropaya inteqrasiya məsələləri müzakirə edilib, görüşlər keçirilib.

İclasdan sonra nümayəndə heyəti Ermənistan prezidenti Serj Sarkisyanla görüşüb. Həmin görüşdə Litvadan olan deputat qaçqın və məcburi köçkünlərin hüquqlarının müdafiəsi ilə bağlı sual verib. Azay Quliyev deyib: "Serj Sarkisyan bu sualdan yayındı. Bundan sonra onun qarşısında sual qoyuldu ki, münaqişənin həlli üçün hansısa bir vaxt çərçivəsi müəyyənləşdirə bilərsizmi? Təəssüf ki, bu suala da cavab verilmədi. Serj Sarkisyanla görüşdə hər hansı bir formada sülhə yaxınlaşacaq, konstruktiv məcraya yönələcək mövqeyin şahidi olmadıq. Rövşən Rzayev çox təkidlə icmaların görüşü üçün şəraitin yaradılmasının vacibliyini bildirdi. Ancaq buna da müsbət cavab verilmədi. Lakin görüşdə Avronestin Azərbaycan və Ermənistan nümayəndə heyətlərinin dialoq qurmaları üçün imkanlar yaradılacağı haqda razılıq əldə olundu. Nümayəndə heyətləri öz aralarında vaxt təyin edərək dialoq quracaq və hər iki tərəfin icmalarının görüşünün baş tutması üçün müzakirələr aparılacaq".

Mətbuat konfransında həm ATƏT PA, həm də Avronest PA-dakı nümayəndə heyətinin üzvləri jurnalistlərin suallarını cavablandırıblar.

Rəşad BAXŞƏLİYEV

Azərbaycan.- 2012.- 29 fevral.- S.6.