Kəlbəcərlilər ümidlə, inamla yaşayırlar

Rayon icra hakimiyyətinin binası əsaslı təmir olunmuş, qarşısında üçrəngli bayraq ucaldılmışdır. Açılış zamanı çıxış edən ağsaqqallardan biri dedi ki, qoy Kəlbəcər torpağı azad olunsun, o doğma diyarda bundan da uca bayraq qaldırılacaqdır. Kəlbəcərin məcburi köçkünləri bu ümidlə yaşayır, o günü səbirsizliklə gözləyirlər. Rayon icra hakimiyyətinin illik yekun toplantısı da bu əhvalla keçdi.

Əvvəlcə icra hakimiyyətinin başçısı Vidadi Məhərrəmov rayonda görülən işlərdən, qarşıda duran vəzifələrdən ətraflı söhbət açdı, Nazirlər Kabinetinin 2011-ci ilin sosial-iqtisadi inkişafının yekunlarına və 2012-ci ildə qarşıda duran vəzifələrə həsr edilmiş iclasında Prezident İlham Əliyevin nitqində irəli sürülən məsələlərdən danışdı. Sonra ayrı-ayrı idarə və müəssisə rəhbərlərinin çıxışları dinlənildi. Qeyd edildi ki, ötən il mal-qaranın, arı ailələrinin və quşların sayı xeyli artmış, kənd təsərrüfatı məhsulları istehsalı çoxalmış, əhalinin güzəranı, həyat səviyyəsi yüksəlmişdir. Minnətdarlıqla qeyd olundu ki, bu, dövlət başçısı cənab İlham Əliyevin məcburi köçkünlərə göstərdiyi tükənməz qayğı və diqqətin bəhrəsidir.

"Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı"nda və sonralar ona edilmiş Əlavələrdə nəzərdə tutulan tədbirlər uğurla həyata keçirilir.

Naftalan şəhərindəki sanatoriyalarda müvəqqəti məskunlaşmış 595 ailə üçün Goranboy rayonu ərazisində beşmərtəbəli 9 bina tikilmişdir. Cari ilin yanvar ayının 21-də Prezident İlham Əliyevin iştirakı ilə həmin yaşayış məhəlləsinin açılışı olmuş və məcburi köçkün ailələrinə təzə mənzillərin açarları təqdim edilmişdir. Bu yaraşıqlı qəsəbədə iki yüz kəlbəcərli ailəsi də mənzil almışdır.

Ölkənin müxtəlif guşələrində müvəqqəti məskunlaşmış məcburi köçkünlərin həyat şəraitinin yaxşılaşdırılması üçün il ərzində bir sıra tədbirlər görülmüşdür. Gəncə şəhərindəki 3 nömrəli məktəbdə xeyir-şər yeri, 43 nömrəli uşaq bağçasının, tibb liseyinin, 77 nömrəli liseyin dam örtüyü təmir edilmiş, energetika və humanitar kolleclərin yataqxanalarında su, kanalizasiya və elektrik xətləri sahmana salınmışdır. Gülüstan qəsəbəsində Dövlət Aqrar Universitetinin 6 nömrəli yataqxanasında müvəqqəti məskunlaşmış 1700 ailəyə xidmət edən artezian quyusu təmir olunmuş, Goranboy rayonundakı Yeni qəsəbədə təzə artezian quyusu qazılmışdır.

Qışa hazırlıq ərəfəsində Goranboy rayonundakı Meşəli kəndində 90 məcburi köçkün ailəsinin mənzillərinə təbii qaz xətti çəkilmişdir. Göygöl rayonundakı "Murovdağ" qəsəbəsinin qazlaşdırılması işi davam edir. Burada artıq 200-dən çox evdə mavi yanacaqdan istifadə edilir.

Əhalinin məşğulluğunu təmin etmək məqsədilə son illərdə yüzlərlə yeni iş yerləri açılmışdır. Rayonda gənc nəslin təlim-tərbiyəsinə xüsusi diqqət yetirilir. İl ərzində məktəblərin maddi-texniki bazasının möhkəmləndirilməsi üçün xeyli iş görülmüşdür. Bakı şəhərində fəaliyyət göstərən 19 və 126 nömrəli məktəblər üçün yeni binalar tikilmiş, digər yerlərdəki binalarda təmir-bərpa işləri aparılmışdır.

Təhsil sahəsinə göstərilən qayğı və diqqətin nəticəsidir ki, 243 nəfər uğurla imtahan verərək ali və orta ixtisas məktəblərinə qəbul olunmuşdur. Başqa sözlə desək, əvvəlki illə müqayisədə tələbə bileti alanların sayı 91 nəfər artmışdır.

İl ərzində səhiyyə və mədəniyyət sahəsində də xeyli işlər görülmüşdür. Minlərlə məcburi köçkünə stasionar və ambulator qaydada tibbi xidmət göstərilmiş, imtiyazlı xəstələr və stasionarda müalicə olunanlar lazımi dərmanlarla kifayət qədər təchiz edilmişlər.

Hesabat dövründə vətəndaşların müraciətlərinə baxılması, səyyar qəbulların təşkili və irəli sürülən təkliflərin həyata keçirilməsi sahəsində xeyli iş aparılmışdır. Rayon icra hakimiyyətinə 625 müraciət daxil olmuşdur ki, onun da əksər hissəsi üzrə konkret tədbirlər görülmüşdür.

Kəlbəcərlilər daim dövlətin daxili və xarici siyasəti ilə maraqlanır, xüsusən Qarabağ probleminin həlli üçün Prezident İlham Əliyevin yeritdiyi uğurlu siyasəti yekdilliklə dəstəkləyirlər. Toplantıda dövlət başçısının qətiyyətli sözləri dönə-dönə səsləndi. Azərbaycan Prezidenti, Silahlı Qüvvələrin Ali Baş Komandanı İlham Əliyev Goranboy rayonunda təmas xəttindəki "N" saylı hərbi hissədə görüş zamanı demişdir: "Biz ordu quruculuğuna daim diqqət göstəririk, vəsait ayırırıq. Keçirilən hərbi paradlar bizim gücümüzü göstərir. Ərazi bütövlüyümüzü bərpa etmək üçün bütün imkanlar vardır. Bunu biz də bilirik, düşmən də, bu məsələ ilə məşğul olan vasitəçilər də bilirlər. Sülhü əldə etmək üçün bir şərt vardır: Ermənistanın işğalçı qüvvələri torpaqlarımızdan öz xoşu ilə rədd olmalıdırlar".

Prezidentin qəti qərarı bax belədir.

Kəlbəcərlilər tam əminliklə dedilər ki, dövlət başçısının inamla apardığı müdrik xarici siyasət tezliklə öz bəhrəsini verəcək, Qarabağ məsələsi xalqımızın, dövlətimizin maraqlarına uyğun şəkildə ədalətlə həll ediləcəkdir.

Yığıncaqda Prezident Administrasiyasının məsul işçisi Rövşən Ağayev iştirak etmişdir.

Əhməd İSAYEV

Azərbaycan.- 2012.- 29 fevral.- S. 7.