Kemal Tamer: Bir millətin dövlətləri olaraq biz idman sahəsində əməkdaşlığımızın daha da genişlənməsində maraqlıyıq

Bir millətin dövlətləri olaraq biz idman sahəsində əməkdaşlığımızın daha da genişlənməsində maraqlıyıq.

Bu sözləri Gənclər və İdman Nazirliyinin təşkilatçılığı ilə iyulun 6-da Bakıda türkdilli dövlətlərin universitetlərinin idman federasiyaları prezidentlərinin toplantısında iştirak edən Türkdilli Dövlətlərin Universitetlərinin İdman Federasiyasının prezidenti Kemal Tamer AzərTAc-a müsahibəsində söyləmişdir.

K.Tamer bildirmişdir ki, Bakıda olmağımızdan çox məmnunuq. Bu önəmli mərasimi təşkil etdiyinə görə Azərbaycanın Gənclər və İdman Nazirliyinə təşəkkürümü bildirirəm. İstərdim ki, bizim iş birliyimiz idman sahəsində də davam etsin, gənclərimiz arasında əlaqələr daha da genişlənsin.

Biz bu gün Bakıda türkdilli dövlətlərin universitetlərinin idman federasiyaları prezidentlərinin toplantısında bir araya gəlmişik. İki il əvvəl - 2010-cu ilin martında Ankarada türkdilli ölkələrin universitetlərinin idman federasiyalarının nümayəndələri ilə birgə toplantı keçirmişdik. Bu toplantıda Türkdilli Dövlətlərin Universitetlərinin İdman Federasiyasının yaradılması barədə qərar qəbul olunmuşdu. Federasiyanın yaradılmasının məqsədi isə eyni millətin dövlətlərinin gənclərinin bir-birini tanıması və idman sayəsində önəmli təşkilat yaratmaq idi. Bu il federasiyanın ikinci toplantısını Türkiyədə keçirmək niyyətindəyik.

Azərbaycan.- 2012.- 7 iyul.- S. 6.