Yeni Azərbaycan Partiyası Gənclər Birliyinin Oğuz rayonunda “Yay məktəbi”nin yeni layihəsi başlanmışdır

Yeni Azərbaycan Partiyası Gənclər Birliyinin Oğuz rayonunda "Yay məktəbi"nin yeni layihəsi başlanmışdır. Layihə gənclərin asudə vaxtlarını səmərəli keçirmələrinə, bir-biri ilə ünsiyyət qurmalarına və məlumatlarını artırmağa xidmət edir. Bunun üçün intellektual və əyləncəli yarışlar, idman oyunları ilə yanaşı, müxtəlif mövzularda diskussiyalar da təşkil olunur.

AzərTAc xəbər verir ki, növbəti diskussiya Prezident Administrasiyasının İctimai-siyasi məsələlər şöbəsinin müdiri Əli Həsənovun iştirakı ilə keçirilmişdir. Əli Həsənov bildirmişdir: "Görüşdə əsas mövzu "Heydər Əliyev və Azərbaycan gəncliyi" olmuşdur. Biz ümummilli liderin həyatından, fəaliyyətindən, onun Azərbaycan gəncliyi ilə bağlı tövsiyələrindən, gənclərimizi necə görmək istəyindən danışdıq, Azərbaycan gəncliyinin vətənpərvərliyi, dilimizi, mədəniyyətimizi, adət-ənənələrimizi bilmələri, bəşəri dəyərləri mənimsəmələri və inkişaf etdirmələri, Vətəni sevmələri, iradəli, dünyagörüşlü, xalqına layiqli övladlar kimi böyümələri ilə bağlı məsələlər ətrafında diskussiyalar apardıq".

Azərbaycan.- 2012.- 10 iyul.- S. 3.