Bakıda “Ənənəvi mediadan onlayn mediaya keçid” mövzusunda konfrans keçirilmişdir

İyulun 17-də Bakıda "Ənənəvi mediadan onlayn mediaya keçid" mövzusunda konfrans keçirilmişdir.

Avropa Şurası, Avropa İttifaqı, Azərbaycan Mətbuat Şurası, ATƏT-in Bakı Ofisi və Böyük Britaniyanın ölkəmizdəki səfirliyinin dəstəyi ilə keçirilən konfransın əsas məqsədi ənənəvi və onlayn media sahəsində beynəlxalq təcrübəni bölüşmək olmuşdur.

Konfransı açan Azərbaycan Mətbuat Şurasının sədri Əflatun Amaşov belə tədbirlərin müntəzəm olaraq keçirilməsinin medianın inkişafına təkan verdiyini bildirmişdir. Qeyd edilmişdir ki, hazırda Azərbaycanda 40 gündəlik, 200 həftəlik qəzet, 14 regional və kabel televiziyası, 30-dan çox provayder və bir sıra portallar fəaliyyət göstərir.

Onlayn medianın inkişafı üçün mühüm tədbirlərin görüldüyünün vurğulandığı tədbirdə bir milyondan artıq Azərbaycan vətəndaşının "Facebook", "Twitter" kimi sosial şəbəkələrdən istifadə etdiyi diqqətə çatdırılmışdır.

Tədbirdə çıxış edən Prezident Administrasiyasının İctimai-siyasi məsələlər şöbəsinin müdir müavini Ərəstun Mehdiyev ənənəvi KİV-lərə dəstək verilməsinin, eləcə də elektron mediaya diqqət yetirilməsinin əhəmiyyətini vurğulamışdır. Prezident Administrasiyasının rəsmisi demişdir ki, Azərbaycanda söz, məlumat azadlığının təmin edilməsinə, mətbuatın müstəqilliyinin artırılmasına böyük diqqət göstərilir. Bu məsələlərin müzakirəsi Azərbaycanda mətbuatın daha da inkişafına, media-cəmiyyət, media-dövlət münasibətlərinin tənzimlənməsinə və KİV-lərin sərbəst fəaliyyətinə müsbət təsir göstərəcəkdir.

Avropa Şurasının Azərbaycandakı nümayəndəliyinin siyasi məsələlər üzrə müşaviri Andrey Valentinov müasir demokratik cəmiyyətlərdə KİV-lərin rolundan, fikir və söz azadlığının əhəmiyyətindən danışmışdır.

ATƏT-in Bakı ofisinin rəhbəri Koray Tarqay isə çıxışında belə tədbirlərin keçirilməsinin ölkədə KİV-lərin daha da inkişafına kömək edəcəyini bildirmişdir.

Avropa Şurasının baş katibinin Azərbaycandakı xüsusi nümayəndəsi Konstantin Yerokostopulos və Böyük Britaniyanın ölkəmizdəki səfiri Piter Beytman isə bu cür tədbirlərin medianın inkişafı istiqamətində təcrübə mübadiləsi baxımından əhəmiyyətini vurğulamışlar.

AzərTAc

Azərbaycan.- 2012.- 18 iyul.- S. 4.