Avropa İttifaqı qondarma Dağlıq Qarabağ respublikasında keçirilən “prezident seçkiləri”nin nəticələrini tanımayacaqdır

İyulun 19-da Dağlıq Qarabağda "prezident seçkiləri" keçiriləcəkdir. Mən qeyd etmək istərdim ki, Avropa İttifaqı "seçkilər"in keçiriləcəyi konstitusion və hüquqi çərçivələri tanımır.

Bu sözləri Avropa İttifaqının xarici əlaqələr və təhlükəsizlik siyasəti üzrə ali nümayəndəsi xanım Ketrin Eşton Ermənistanın işğal etdiyi Azərbaycanın Dağlıq Qarabağ bölgəsindəki qondarma respublikada keçirilən "prezident seçkiləri"nə dair bəyanatında demişdir.

Ketrin Eşton birmənalı şəkildə bəyan etmişdir ki, bu "seçkilər"in nəticələri Avropa İttifaqı tərəfindən tanınmayacaqdır. Bəyanatda K.Eşton ATƏT-in Minsk qrupunun həmsədrlərinin münaqişənin dinc yolla həll olunması üçün göstərdikləri səyləri bir daha dəstəklədiyini bildirmişdir.

Xanım K.Eşton demişdir: "Mən tərəfləri münaqişənin danışıqlar vasitəsilə Madrid prinsipləri əsasında həlli yolunun tapılması üzrə səylərini fəallaşdırmağa çağırıram. Avropa İttifaqının bu istiqamətdəki səylərə bundan sonra da dəstək verəcəyini təsdiqləyirəm".

AzərTAc

Azərbaycan.- 2012.- 20 iyul.- S. 4.