Bakıda açılmış “I love absurde” sərgisi iki ay davam edəcəkdir

İyulun 19-da Kiçik QalArt qalereyasında rəssam Afət Bağırovanın əsərlərindən ibarət "I love absurde" ("Mən cəfəngiyatı sevirəm") adlı sərgi açılmışdır.

AzərTAc xəbər verir ki, iki ay davam edəcək sərgidə rəssamın 20-dən çox əsəri nümayiş olunur.

Tədbirdə rəssamın özünəməxsus yaradıcılıq yolundan söz açılmışdır.

Bildirilmişdir ki, Afət Bağırova öz əsərləri ilə tamaşaçıları dünyaya digər nöqteyi-nəzərdən baxmağa çağırır. O, ağlasığan surətləri və obyektləri uyğunlaşdıraraq, sanki öz pərəstişkarlarına stereotipi kəsib atmaq üçün bıçaq verir. Rəssamın əsərlərini, instalyasiyalarını, heykəllərini və videosunu beyinlə dərk etmək tamamilə mümkündür, fikrini tamamlamaq isə yox. Çünki onu ilhamlandıran hadisələrin bünövrələrini qeyri-məntiqi və struktursuz əsaslar təşkil edir.

Afət Bağırova vizual surətlərdən istifadə edərək anlayışımızda xaos yaradır. Hər əsərin dəqiq bir məna daşıması məcburiyyətində olmasına əmin olmağımız bizi məntiqi labirintə salır, rəssam isə bu labirinti sındırmağa cəhd edir. Onun əsərlərində heç bir hadisə izah olunmur.

Rəssamın "Əsəbi qadın", "Qəssab", "Qarğalar" və digər əsərləri sənətsevərlər tərəfindən maraqla qarşılanmışdır.

Azərbaycan.- 2012.- 20 iyul.- S. 5.