Dünyanın digər ölkələri kimi Serbiya da Azərbaycanın işğal olunmuş Dağlıq Qarabağ bölgəsində keçirilən qondarma “prezident seçkiləri”ni tanımır

Serbiya Respublikasının Xarici İşlər Nazirliyi Azərbaycanın işğal olunmuş Dağlıq Qarabağ bölgəsində keçirilən qondarma "prezident seçkiləri" ilə bağlı bəyanat yaymışdır.

Azərbaycanın Serbiyadakı səfirliyindən AzərTAc-a daxil olmuş bəyanatda vurğulanır: "Serbiya Respublikasının Xarici İşlər Nazirliyi bir daha ATƏT-in Minsk qrupunun Dağlıq Qarabağ ilə bağlı fəaliyyətini, münaqişənin həlli istiqamətində apardığı işi və səylərini tam dəstəklədiyini bildirir və qarşılıqlı məqbul nəticə əldə etmək üçün hər iki tərəfi əlavə səylər göstərməyə çağırır.

Cari il iyulun 19-da Dağlıq Qarabağda keçirilmiş "prezident seçkiləri" ilə bağlı Serbiya Respublikasının Xarici İşlər Nazirliyi hesab edir ki, bu seçkilər qeyri-legitimdir. BMT-nin üzvü olan dövlətlərin suverenliyinə və ərazi bütövlüyünə hörmət edilməsi beynəlxalq nizamın söykəndiyi əsas prinsipdir. Buna görə bu seçkilər regionun gələcək statusuna və münaqişənin sülh yolu ilə həllinə nail olunması məqsədilə aparılan danışıqlar prosesinə təsir göstərə bilməz".

Azərbaycan.- 2012.- 22 iyul.- S. 5.